រាជធានីភ្នំពេញ ៖ ក្នុងន័យបំផុសឲ្យប្រជាពលរដ្ឋចូលរួមកាត់បន្ថយភាពក្រីក្រ និងចូលរួមអនុវត្តផែនការគោលនយោបាយភូមិ-សង្កាត់មានសុវត្ថិភាពជាមួយរាជរដ្ឋាភិបាលផងនោះ អាជ្ញាធររាជធានីភ្នំពេញបានធ្វើការអំពាវនាវឱ្យប្រជាពលរដ្ឋរាជធានីភ្នំពេញទាំងអស់ នាំគ្នាបញ្ឈប់រាល់ការលេងល្បែងនានា ជាពិសេសល្បែងចាក់កន្ទុយលេខ(ឆ្នោត)ចាប់ពីពេលនេះតទៅ ។
ថ្លែងទៅកាន់ប្រជាពលរដ្ឋ និងអាជ្ញាធរខេត្តកណ្តាល ដែលមានវត្តមានលោក ម៉ៅ ភិរុន អភិបាលខេត្តកណ្តាល និងប្រជាពលរដ្ឋរាជធានីភ្នំពេញ រាប់រយនាក់ នៅក្នុងពិធីបើកការដ្ឋានស្ថាបនាផ្លូវក្រវ៉ាត់ក្រុងឬផ្លូវប្រទះឡាងតភ្ជាប់ពីផ្លូវជាតិលេខ៤ត្រង់ចំណុចផ្សារបែកចាន ទៅផ្លូវជាតិលេខ៣ត្រង់ចំណុចវត្តស្លែង កាលពីថ្ងៃទី៣១តុលា២០១៦នោះ លោកប៉ា សុជាតិវង្ស អភិបាលរាជធានីភ្នំពេញ មានប្រសាសន៏ថា អាជ្ញាធរសូមអំពាវនាវឲ្យប្រជាពលរដ្ឋមានការចូលរួម ដើម្បីអនុវត្តន៏គោលនយោបាយភូមិ សង្កាត់មានសុវត្ថិ ភាព ជាមួយរាជរដ្ឋាភិបាល ។
លោកបន្តថា បញ្ហាគ្រឿងញៀនល្បែងស៊ីសង ការជួញដូរ បញ្ហាបងធំ បងតូច ក្មេងទំនើង និងបញ្ហាអាវុធជាតិផ្ទុះជាដើម ដែលធ្វើឲ្យមានការព្រួយបារម្មណ៏ និងរំខានដល់ជីវភាពរស់នៅរបស់ប្រជាពលរដ្ឋ ហើយបញ្ហានេះ ជាភារកិច្ចស្នូលរបស់អាជ្ញាធរ ប៉ុន្តែបើគ្មានការចូលរួមពីបងប្អូនប្រជាពលរដ្ឋទេនោះ សមត្ថកិច្ចពិតជាមិនអាចសម្រេចជោគជ័យបានទេ ។
លោកប៉ា សុជាតិវង្ស អភិបាលរាជធានីភ្នំពេញ បាន បញ្ជាក់ថា គ្មានអ្នកណាដឹងច្បាស់ជាងប្រជាពលរដ្ឋនោះទេ ហើយប្រជាពលរដ្ឋខ្លួនឯងក៏ត្រូវយល់ថា អ្វីដែលខុសច្បាប់សូមកុំប្រព្រឹទ្ធ ដូចជា មេកន្ទុយលេខរស់បាន ក៏ដោយសារកូនកន្ទុយលេខចេះតែយល់សប់រួចនាំគ្នាកាត់លេខចាក់ឆ្នោតនោះដែរ ។
លោក បញ្ជាក់ថា មានអ្នកខ្លះខំរត់ម៉ូតូឌុបសន្សំលុយបានក៏នាំគ្នាប្រមូលយកទៅចាក់កន្ទុយលេខអស់ ដូច្នេះហើយសូមនាំគ្នាឈប់ចាក់ឆ្នោតទៅ មេកន្ទុយលេខនឹងដួលខ្លួនឯងតែម្តង ដែលបញ្ហាទាំងអស់នេះទាល់តែមានការចូលរួមពីប្រជាពលរដ្ឋ ដើម្បីធ្វើឲ្យភូមិសង្កាត់របស់យើងមានសុវត្ថិភាព ដោយមិនមានបទល្មើសទាំងអស់នោះ ។
សូមបញ្ជាក់ថា ដើម្បីទប់ស្កាត់រាល់បទល្មើសនានា និងជុំរុញផែនការភូមិ-សង្កាត់មានសុវត្ថិភាពឲ្យកាន់តែប្រសើរឡើងនោះ គណៈបញ្ជាការឯកភាព រាជធានីភ្នំពេញ និងគណៈបញ្ជាការខេត្ត គ្រោងបើកកិច្ចប្រជុំរួមគ្នាមួយ ដើម្បីបង្កើតផែនការសហប្រតិបត្តការនិងធ្វើផែនការសកម្មភាពរួមគ្នាជាពិសេស អាជ្ញាធរស្រុក និងខណ្ឌដែលមានព្រំប្រទល់ជាប់គ្នា ហើយកិច្ចប្រជុំនោះនឹងជុំរុញធ្វើបន្ទាប់ពីចប់ព្រះរាជពិធីបុណ្យអុំទូកឆាប់ៗនេះ ៕
ចែករំលែកព័តមាននេះ