រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា នារីវ័យក្មេងម្នាក់មានរឿងក្នុងចិត្តស្មុគស្មាញគំនិត គិតអ្វីមិនចេញ ក៏មកអង្គុយយំលើស្ពានជ្រោយចង្វារតាំងពីមេឃកំពុងភ្លៀង រហូតដល់រាំងភ្លៀងក៏មិនព្រមដើរចេញដែរ ធ្វើអោយប្រជាពលរដ្ឋកើតការសង្ស័យ ស្មានតែនាងមានគំនិតចង់បញ្ចប់ជីវិត ក៏ផ្អើលនាំគ្នាមកជួយឃាត់នាង និងហៅកង់បីដឹកនាងចុះមកខាងក្រោមវិញ បង្កឱ្យមានការភ្ញាក់ផ្អើលកាលពីវេលាម៉ោង៩និង៣០នាទីយប់ ថ្ងៃទី២២ ខែឧសភា ឆ្នាំ២០២១ នៅលើស្ពានជ្រោយចង្វាចាស់ ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ ។
សេចក្តីរាយការណ៍បន្តថា នារីវ័យក្មេងដែលខូចចិត្តអង្គុយយំលើស្ពានតែម្នាក់ឯងនោះ មិនត្រូវបានស្គាល់អត្តសញ្ញាណនៅឡើយទេ តែនាងបានបង្ហើបឱ្យដឹងថា នាងឈ្មោះ លីន ដា អាយុ២០ឆ្នាំ ទើបត្រឡប់មកពីធ្វើការនៅប្រទេសថៃបានចំនួន០៣ថ្ងៃតែប៉ុណ្ណោះ ។
បើតាមប្រភពពីប្រជាពលរដ្ឋដែលឃើញហេតុការណ៍ផ្ទាល់ បានប្រាប់អោយដឹងថា មុនពេលកើតហេតុ គាត់បានប្រទះឃើញនារីខាងលើ នៅលើស្ពានជ្រោយចង្វាថ្មីតែម្នាក់ឯង ដោយអង្គុយសំកុក តែដោយសារមេឃកំពុងតែភ្លៀង ទើបគ្មានអ្នកណាចាប់អារម្មណ៍ និងខ្វាយខ្វល់ពីនាងឡើយ ។
ពលរដ្ឋខាងលើបន្តថា លុះរំលងបានជាងកន្លះម៉ោងក្រោយមក ខណៈពេលមេឃរាំងភ្លៀង ក៏មានប្រជាពលរដ្ឋផ្សេងទៀត ធ្វើដំណើរឆ្លងកាត់ស្ពានជ្រោយចង្វារ ហើយប្រទះឃើញនាងអង្គុយយំ ដោយគិតស្មានថានាងមានគំនិតចង់សម្លា.ប់ខ្លួន ក៏ចូលទៅជួយឃាត់ និងហៅកង់បីដឹកនាងចុះទៅខាងលិចគល់ស្ពាន ចំណុចរង្វង់មូលគួចកាណុង ដើម្បីលួងលោម និងលើកទឹកចិត្តនាង កុំអោយពិបាកចិត្ត និងគិតអ្វីខ្លីៗបែបនេះ។
បន្ទាប់ពីឃាត់ និងដឹកនាងចុះទៅខាងក្រោមវិញ ក៏មានប្រជាពលរដ្ឋជាច្រើនបានព្យាយាមជួយលួងលោម និងផ្តល់យោបល់ល្អៗទៅកាន់នាង និងសួរនាំរឿងរ៉ាវក្នុងចិត្ត ប៉ុន្តែយុវតីខាងលើមិនឆ្លើយតបវិញឡើយ សូម្បីតែមួយម៉ាត់ កាន់តែលួង នាងកាន់តែយំ។
ក្រោយកើតហេតុ ប្រជាពលរដ្ឋធុញទ្រាន់នឹងនាង ពួកគាត់ក៏ទុកនាងចោលលែងរវល់ និងបាននាំគ្នាគេចចេញទៅផ្ទះរៀងៗខ្លួនអស់ទៅ ។ ចំណែកយុវតីខាងលើ បន្ទាប់ពីអត់មានអ្នកនៅលួងទៀត មួយសន្ទុះក្រោយក៏បានហៅកង់បីជិះចេញទៅបាត់ដូចគ្នាដែរ៕
ចែករំលែកព័តមាននេះ