Daily Mail របស់អង់គ្លេសកាលពីពេល ថ្មីៗកន្លងមកផ្សាយថា យុវជនចិនម្នាក់បានលួចរថយន្តទំនើបជិះដើរកម្សាន្តជាមួយគូស្នេហ៍៣លើក រួចយកចតសងវិញនៅកន្លែងដើម ដោយចាក់សាំងពេញ និងលាងយ៉ាងស្អាត ប៉ុន្តែចុងក្រោយគេចមិនផុតព្រោះមានភស្តុតាងពីម៉ាស៊ីនថតបង្កប់ ។
ហេតុការណ៍នោះកើតឡើងនៅក្រុងហាងចូវ ខេត្តជឺជាំង ប្រទេសចិន ខណៈពេលលោកវាំងជាម្ចាស់រថយន្តប្តឹងប៉ូលិសក្រោយពីរថយន្តរបស់ខ្លួនបាត់ចំនួន៣លើកនាពេលយប់ តែចោរបានយកមកសងវិញនៅពេលព្រឹក ។ ប៉ូលិសស៊ើបការណ៍ និងចាប់ចោរបានពេលរូបគេយករថយន្តទៅទុកកន្លែងដើមវិញ ។
ចោរនោះឈ្មោះចាង អាយុ១៩ឆ្នាំ បានសារភាពថា គេលួចរថយន្តនៅពេលល្ងាច និងចាក់សាំងពេញ ដើម្បីកុំឱ្យមានកំហុស ។ គេប្រទះឃើញកូនសោរថយន្តមួយគ្រឿងនោះដោយចៃដន្យ តែគេមិនចង់លួចទេ គ្រាន់តែខ្ចីយកទៅប្រើប៉ុណ្ណោះ ។
ប៉ូលិសនិយាយថា ជនល្មើសនៅមានកូនសោរថយន្តទំនើបជាច្រើនគ្រឿងទៀត ។ នេះមិនមែនជាលើកដំបូងទេ គឺកន្លងមកធ្លាប់មានបណ្តឹងឱ្យចាប់ខ្លួនគេពីបទលួចដែរ ។ បទល្មើសចុងក្រោយរបស់ចាងត្រូវជាប់គុករយៈពេល១៥ថ្ងៃ និងពិន័យជាប្រាក់៧០ដុល្លារ ៕
ចែករំលែកព័តមាននេះ