បាល់ទះកម្ពុជាទទួលបានមេដាយសំរឹទ្ធជាលើកដំបូងបន្ទាប់ពីឈ្នះថៃ
ស៊ីហ្គេម វៀតណាម ៖ ទោះបីកាលប្រកួតវិលជុំក្នុងពូលនៃព្រឹត្តិការណ៍កីឡាស៊ីហ្គេមលើកទី៣១នៅ
ស៊ីហ្គេម វៀតណាម ៖ ទោះបីកាលប្រកួតវិលជុំក្នុងពូលនៃព្រឹត្តិការណ៍កីឡាស៊ីហ្គេមលើកទី៣១នៅប្រទេសវៀតណាម ថៃឈ្នះកម្ពុជា៣សិតទល់២សិតក៏ពិតមែន តែនៅក្នុងការប្រកួតដណ្ដើមចំណាត់ថ្នាក់លេខ៣ កម្ពុជាបានយកឈ្នះថៃក្នុងលទ្ធផល៣សិតទល់២សិតវិញ ដែលជ័យជម្នះនេះធ្វើឱ្យកម្ពុជាទទួលបានមេដាយសំរឹទ្ធជាលើកដំបូង ។
ការប្រកួតពិតជាតឹងតែងខ្លាំងមែនទែនដោយក្រុមបាល់ទះកម្ពុជាបានឈ្នះក្នុងសិតទី១ដោយលទ្ធផល ២៥ទល់២៣ ខណៈថៃវាយបកយកឈ្នះក្នុងសិតទី២ដោយលទ្ធផល ២៥ទល់២២។ នៅសិតទី៣ កម្ពុជាបានយកឈ្នះជាថ្មីដោយលទ្ធផល ២៥-២២ ប៉ុន្តែនៅសិតទី៤ថៃបានយកឈ្នះកម្ពុជាវិញដោយលទ្ធផល២៥ទល់១៣ ។ នៅសិតទី៥ដែលជាការប្រកួតកាត់សេចក្តី កម្ពុជាបានយកឈ្នះថៃដោយលទ្ធផល ១៥-១៣។
ជ័យជម្នះនេះទី១ក្រុមបាល់ទះជម្រើសជាតិកម្ពុជាទទួលបានមេដាយសំរឹទ្ធជាលើកដំបូងក្នុងប្រវត្តិសាស្ត្ររបស់ខ្លួននៅក្នុងព្រឹត្តិការណ៍កីឡាស៊ីហ្គេម គិតចាប់តាំងពីចូលរួមប្រកួតកីឡាស៊ីហ្គេម
មក ។ ទី២ ក្រុមបាល់ទះកម្ពុជាបានលុបបំបាត់កំណត់ត្រាមិនដែលឈ្នះលើក្រុមបាល់ទះថៃ ពី
ព្រោះក្នុងការជួបគ្នាកន្លងមកជាមួយក្រុមបាល់ទះថៃក្រុមបាល់ទះកម្ពុជាចាញ់រហូត ហើយនេះជារសជាតិជ័យជម្នះលើកដំបូងលើបាល់ទះថៃ និងចារទុកក្នុងប្រវត្តិសាស្ត្ររបស់ខ្លួន។ ទី៣ពេលក្រុមបាល់ទះកម្ពុជាឡើងវគ្គពាក់កណ្តាលផ្តាច់ព្រ័ត្រក្នុងព្រឹត្តិការណ៍កីឡាស៊ីហ្គេម នេះគឺជាលើកដំបូងក្នុងប្រវត្តិសាស្ត្ររបស់ខ្លួនពីព្រោះកន្លងមកនៅកីឡាស៊ីហ្គេមនេះ មិនធ្លាប់បានឡើងវគ្គ៤ក្រុមចុងក្រោយទេសម្រាប់កម្ពុជា។
ក្រោយបរាជ័យក្រោមស្នាដៃបាល់ទះកម្ពុជាក្រុមបាល់ទះថៃទទួលបានចំណាត់ថ្នាក់លេខ៤ក្នុងព្រឹត្តិការណ៍កីឡាស៊ីហ្គេមឆ្នាំ២០២២នេះដោយមិនទទួលបានមេដាយទេពីព្រោះគ្មានមេដាយស្ទួនខណៈក្រុមកម្ពុជាជាប់លេខ៣ជាមួយនឹងមេដាយសំរឹទ្ធជាលើកដំបូងក្នុងប្រវត្តិសាស្ត្រ។
សម្រាប់មេដាយមាស និងប្រាក់ គឺរង់ចាំការប្រកួតវគ្គផ្តាច់ព្រ័ត្ររវាងក្រុមម្ចាស់ផ្ទះវៀតណាម ជាមួយនឹងឥណ្ឌូណេស៊ី ៕
ចែករំលែកព័តមាននេះ