ភ្នំពេញ [26 តុលា 2016] ៖ សម្រាប់ឆ្នាំនេះ អ្នកស្ម័គ្រចិត្តមកពីបណ្តាក្រុមហ៊ុនសាមសុងក្នុងអាស៊ីអាគ្នេយ៍ និងអូសេអានី បាននាំគ្នាមកចូលរួមក្នុងកម្មវិធី «Samsung Love and Care» ដែលជាកម្មវិធីស្ម័គ្រចិត្តប្រចាំឆ្នាំរបស់បុគ្គលិកសាមសុង ។ ស្របជាមួយនឹងការប្តេជ្ញាចិត្តរបស់សាមសុង ដើម្បីបង្កើតការផ្លាស់ប្តូរវិជ្ជមានក្នុងសហគមន៍ កម្មវិធីនេះបានភ្ជាប់មកជាមួយបច្ចេកវិទ្យា និងធនធានផ្សេងៗទៀតដើម្បីដោះស្រាយគម្លាតនៃការអប់រំ និងបញ្ហាសង្គមក្នុងទីក្រុងភ្នំពេញ នៃប្រទេសកម្ពុជាក្នុងឆ្នាំនេះ។
ដោយជាផ្នែកមួយនៃកម្មវិធីស្ម័គ្រចិត្តប្រចាំឆ្នាំជាសាកលរបស់ក្រុមហ៊ុនសាមសុង កម្មវិធី Samsung Love and Careបានប្រមូលបុគ្គលិកស្ម័គ្រចិត្តជាច្រើននៅទូទាំងតំបន់ ។ ចាប់ផ្តើមពីថ្ងៃទី២៤ ខែតុលា ឆ្នាំ២០១៦ មានបុគ្គលិកស្ម័គ្រចិត្តសរុបចំនួន៥៦នាក់ បានចុះសួរសុខទុក្ខកុមាររស់នៅក្នុងសហគមន៍កម្ពុជាលើសពី២.៨០០នាក់ក្នុងរយៈពេលបីថ្ងៃ។
លោកស្រី Irene Ng អនុប្រធានទទួលបន្ទុកផ្នែកសាជីវកម្មទីផ្សារប្រចាំតំបន់អាស៊ីអាគ្នេយ៍ និងអូសេអានី បានមានប្រសាសន៍ថា៖ «នៅក្រុមហ៊ុនសាមសុង យើងតែងតែប្តេជ្ញាចិត្តថា យើងនឹងខិតខំប្រឹងប្រែងឲ្យអស់ពីសមត្ថភាពក្នុងការបង្កើតសមិទ្ធផលអាជីវកម្ម និងរួមចំណែកជាមួយនឹងសហគមន៍ ។ បន្ទាប់ពីទទួលបានភាពជោគជ័យ និងការឆ្លើយតបវិជ្ជមានពីបុគ្គលិកស្ម័គ្រចិត្តកាលពីឆ្នាំមុន យើងពិតជារំភើបដែលបានបង្ហាញខ្លួនក្នុងប្រទេសកម្ពុជា ជាមួយនឹងការផ្តួចផ្តើមដ៏មានន័យខ្លឹមសារនេះ ។ យើងជឿជាក់ថា បច្ចេកវិទ្យាអាចជួយពង្រឹងដល់សមត្ថភាព និងចំណេះដឹងរបស់យុវជន ហើយយើងចង់បង្កើតការផ្លាស់ប្តូរវិជ្ជមានសម្រាប់បំពេញសេចក្តីត្រូវការរបស់អ្នកប្រើប្រាស់ក្នុងស្រុក និងយកចិត្តទុកដាក់លើការរស់នៅរបស់កុមារ ។ សម្រាប់បុគ្គលិករបស់យើង នេះជាឱកាសដ៏ល្អមួយក្នុងការចូលរួមចំណែកជាមួយនឹងសហគមន៍ក្នុងប្រទេសកម្ពុជា ។»
រួមជាមួយនឹងអង្គការក្រៅរដ្ឋាភិបាលដូចជា អង្គការដើម្បីភាពញញឹមនៃកុមារ (PSE) និងអង្គការលើកស្ទួយប្រជាពលរដ្ឋ (PIO) បុគ្គលិកស្ម័គ្រចិត្តរបស់សាមសុង បានរៀបចំសកម្មភាពអប់រំ និងការកម្សាន្តផ្សេងៗ សម្រាប់កុមារកម្ពុជា និងនាំមកនូវភាពសប្បាយរីករាយជូនសហគមន៍ ។ ជាមួយនឹងការប្រើប្រាស់សាមសុងថេបប្លេត និងកម្មវិធីសិក្សា អ្នកស្ម័គ្រចិត្តបានបង្កើតភាពស្និទ្ធស្នាលជាមួយនឹងកុមារតាមរយៈការលេងល្បែងអប់រំ បង្រៀនពួកគាត់នូវជំនាញគិតលេខនិងអក្ខរកម្ម ។ អ្នកស្ម័គ្រចិត្តថែមទាំងបានជួយកែលំអសាលារៀនដូចជាការលាបជញ្ជាំងថ្នាក់រៀន តុឲ្យមានពណ៌ស្រស់ស្អាត ព្រមទាំងជួយបង្រៀនកុមារឲ្យចេះដាំដើមឈើ ថែរក្សាបរិស្ថាន និងការផ្លាស់ប្តូរវប្បធម៌ដ៏គួរឲ្យកត់សម្គាល់ ។
លោកស្រី Madam Elisabeth Bardon-Debats ដែលជាសមាជិកក្រុមប្រឹក្សាភិបាលបណ្តោះអាសន្ន នៃអង្គការដើម្បីភាពញញឹមនៃកុមារ (PSE) បានបង្ហាញចំណាប់អារម្មណ៍ថា៖ «ពួកយើងសូមថ្លែងអំណរគុណយ៉ាងជ្រាលជ្រៅ ចំពោះការគាំទ្ររបស់ក្រុមហ៊ុនសាមសុង ក្នុងការខិតខំប្រែងប្រែងជួយដល់ក្មេងអនាថាក្នុងប្រទេសកម្ពុជា ។ ខ្ញុំពិតជាមានអារម្មណ៍រំភើប នៅពេលដែលឃើញការប្តេជ្ញាចិត្ត និងភាពសប្បាយរីករាយចេញពីអ្នកស្ម័គ្រចិត្តដែលបាននាំមកឲ្យមានការផ្លាស់ប្តូរវិជ្ជមានមួយ ។ ការប្រើប្រាស់បច្ចេកវិទ្យាពិតជាមានសារសំខាន់ណាស់សម្រាប់ដោះស្រាយបញ្ហាដែលយើងប្រឈមមុខជារឿយៗ ក្នុងការអប់រំកុមារ ហើយយើងឃើញថា វាក៏បានផ្តល់លទ្ធផលវិជ្ជមានផងដែរ។»
អ្នកស្រី Phymean Noun នាយកប្រតិបត្តិនៃអង្គការលើកស្ទួយប្រជាពលរដ្ឋ (PIO) បានបង្ហាញចំណាប់អារម្មណ៍ថា៖«កូនៗរបស់យើង ពិតជាមានភាពសប្បាយរីករាយយ៉ាងខ្លាំង ដែលបានបង្កើតភាពជិតស្និទ្ធជាមួយបុគ្គលិកស្ម័គ្រចិត្តរបស់សាមសុង ។ នេះជាឱកាសដ៏ល្អមួយដែលកម្រនឹងមាន ព្រោះពួកគាត់មិនសូវមានឱកាសក្នុងការជួបនឹងមនុស្សមកពីប្រទេសផ្សេងៗ និងរៀនសូត្រពីវប្បធម៌របស់ពួកគេ ហើយយើងសង្ឃឹមថា យើងនឹងបានធ្វើការជាមួយសាមសុង ដើម្បីបន្តជួយឧបត្ថម្ភដល់កុមារកម្ពុជានាពេលអនាគត ៕»
ចែករំលែកព័តមាននេះ