ចាប់ខ្លួនថៃ-ខ្មែរ៩នាក់ពាក់ព័ន្ធករណីបោកប្រាក់រាប់សិបម៉ឺនដុល្លារ
ខេត្តបន្ទាយមានជ័យ ៖ ជនជាតិថៃ៦នាក់ និងនារី៣នាក់ត្រូវបានសមត្ថកិច្ចចាប់ខ្លួនកាលពីវេលាម៉ោងជិត៥ល្ងាច ថ្ងៃទី៣០ ខែតុលា ឆ្នាំ២០១៦ នៅចំណុចសណ្ឋាគារផារ៉ាដាយ …
ខេត្តបន្ទាយមានជ័យ ៖ ជនជាតិថៃ៦នាក់ និងនារី៣នាក់ត្រូវបានសមត្ថកិច្ចចាប់ខ្លួនកាលពីវេលាម៉ោងជិត៥ល្ងាច ថ្ងៃទី៣០ ខែតុលា ឆ្នាំ២០១៦ នៅចំណុចសណ្ឋាគារផារ៉ាដាយ ទឹកដីកាស៊ីណូផ្កាយ៥ ស្ថិតក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត សង្ស័យថាជាប់ពាក់ព័ន្ធករណីឆបោករឿងដាក់ភាគហ៊ុនរកស៊ីជុំគ្នា ។
ជនសង្ស័យទាំង៩នាក់ត្រូវបានសមត្ថកិច្ចក្រុងប៉ោយប៉ែតសហការជាមួយនគរបាលសន្តិសុខផ្ទៃក្នុងប្រចាំនៅកាស៊ីណូឃាត់ខ្លូនតាមបណ្តឹងរបស់ជនរងគ្រោះមួយក្រុមមានគ្នាប្រហែល១០នាក់តំណាងឲ្យពលរដ្ឋខ្មែរជាច្រើននាក់នៅគ្រប់ខេត្តក្រុងដែលអះអាងថាបានលង់ខ្លួនជឿលើជនជាតិថៃមួយក្រុមបបួលគ្នាយកប្រាក់ដាក់ភាគហ៊ុនបង្កើតកាស៊ីណូជាថ្នូរនឹងបានការប្រាក់ខ្ពស់ ទីបំផុតការប្រាក់បានតែមួយរយៈដំបូងតមកបានត្រឹមតែសន្យា ម្យ៉ាងពួកគាត់អស់ជំនឿ និងដឹងថា ជនជាតិថៃមួយចំនួនចាប់ផ្តើមរើអីវ៉ាន់ចេញពីសណ្ឋាគារផងក៏ប្តឹងសុំការអន្តរាគមន៍ពីសមត្ថកិច្ចតែម្តង ។
ប្រភពពីជនរងគ្រោះម្នាក់ដែលគ្រួសារគាត់លង់ខ្លួនអស់ជាង៣ម៉ឺនដុល្លារបានប្រាប់តាមទូរស័ព្ទថា តាមគាត់ដឹងមានពលរដ្ឋខ្មែរ១៤០នាក់ហើយដែលចេញមុខថាជាប់ពាក់ព័ន្ធយកប្រាក់ដាក់ភាគហ៊ុនជាមួយជនជាតិថៃមួយក្រុមដូចជាគ្រួសាររបស់គាត់ និងមានទំហំទឹកប្រាក់៥០៦.២០០ដុល្លារអាមេរិក(ហាសិបម៉ឺនប្រាំមួយពាន់ពីររយដុល្លារ) ។
ប្រភពពីសមត្ថកិច្ចម្នាក់បានប្រាប់«កោះសន្តិភាព»នៅព្រឹកថ្ងៃទី៣១តុលាថា ចំនួនពលរដ្ឋខ្មែរដែលយកប្រាក់ដាក់ហ៊ុនជាមួយជនជាតិថៃមួយក្រុមគិតត្រឹមពេលនេះយោងការសួរនាំមានជាង៤០០នាក់ ហើយទំហំទឹកប្រាក់មានរហូតដល់ទៅជាង៥៦ម៉ឺនដុល្លាអាមេរិក ។ ប្រភពបន្តថា ពេលនេះសមត្ថកិច្ចកំពុងបន្តស្រាវជ្រាវរកមេធំជាងគេជាជនជាតិថៃដែលកំពុងស្នាក់នៅបន្ទាត់ព្រំដែនឃាត់យកមកសួរនាំដើម្បីឲ្យដឹងពីការពិត ។
ក្រោយពេលឃាត់ខ្លួន ជនសង្ស័យទាំង៩នាក់ត្រូវបានបញ្ជូនបន្តទៅទីបញ្ជាការអាវុធហត្ថខេត្តបន្ទាយមានជ័យដើម្បីចាត់ការបន្តតាមនិតិវិធីច្បាប់ ៕
ចែករំលែកព័តមាននេះ