រាជធានីភ្នំពេញ ៖ ក្រុមហ៊ុនធានារ៉ាបរងអាយុជីវិត មេនូឡាយហ្វ៍ ខេមបូឌា និងធនាគារ CIMB បានចុះកិច្ចព្រមព្រៀងលើកិច្ចសហប្រតិបត្តិការជាដៃគូចែកចាយផលិតផលធានារ៉ាប់រងអាយុជីវិត ដើម្បីបំពេញតម្រូវ
រាជធានីភ្នំពេញ ៖ ក្រុមហ៊ុនធានារ៉ាបរងអាយុជីវិត មេនូឡាយហ្វ៍ ខេមបូឌា និងធនាគារ CIMB បានចុះកិច្ចព្រមព្រៀងលើកិច្ចសហប្រតិបត្តិការជាដៃគូចែកចាយផលិតផលធានារ៉ាប់រងអាយុជីវិត ដើម្បីបំពេញតម្រូវការផ្នែកហិរញ្ញវត្ថុជូនដល់អតិថិជនរបស់ធនាគារ CIMB នៅទូទាំងប្រទេសកម្ពុជា ។
នៅក្នុងពិធីចុះហត្ថលេខាកាលពីថ្ងៃទី២៦ ខែតុលា ២០១៦ នាសណ្ឋាគារលឺរ៉ូយ៉ាល់ លោក Robert Elliott អគ្គនាយកប្រតិបត្តិ និងជានាយកចែកចាយទូទៅនៃក្រុមហ៊ុន មេនូឡាយហ្វ៍ បានលើកឡើងថា ការចាប់ដៃគូជាមួយធនាគារ ដែលមានសក្ដានុពលខ្លាំងដូចជាធនាគារ CIMB ដែលជាក្រុមហ៊ុនបុត្រសម្ព័ន្ធរបស់ ស៊ីអាយអិមប៊ី គ្រុប ដែលជាធនាគារសកលនាំមុខគេមួយរបស់អាស៊ាន និងជាធនាគារវិនិយោគធំបំផុតមួយនៅអាស៊ី នឹងជួយពង្រឹងបន្ថែមកិច្ចសហប្រតិបត្តិការ ដែលមានជាមួយធនាគារជាដៃគូទាំងអស់នៅកម្ពុជា ។
លោកបានបន្តថា ការចាប់ដៃគូជាមួយធនាគារនេះ នឹងជួយឱ្យក្រុមហ៊ុនមេនូឡាយហ្វ៍ ខិតទៅជិតអតិថិជនកាន់តែច្រើនថែមទៀត តាមរយៈការផ្ដល់ជូនដំណោះស្រាយលំដាប់ពិភពលោក ដែលពោរពេញទៅដោយភាពច្នៃប្រឌិតរួមមានដូចជា ការការពារប្រាក់ចំណូល ការអប់រំរបស់បុត្រធីតា គម្រោងសន្សំ និងការចូលនិវត្តន៍ជាដើម ។
លោក ប៊ុន យីន នាយកប្រតិបត្តិរបស់ធនាគារ CIMB បានអោយដឹងថា តាមរយៈការចាប់ផ្ដើមនៃកិច្ចសហការថ្មីនេះ យើងរំពឹងយ៉ាងមុតមាំថា ការប្តេជ្ញាចិត្តរួមគ្នា ការគោរពគ្នា និងការយោគយល់គ្នាទៅវិញទៅមករវាងភាគីទាំងសងខាង នឹងបង្កើតបានជាមូលដ្ឋានគ្រឹះដ៏រឹងមាំ ដើម្បីសម្រេចបានផលប្រយោជន៍យូរអង្វែងជាមួយគ្នា នាពេលអនាគត ។
លោកស្រី ហោ សុវឌ្ឍនា អនុប្រធាននាយកដ្ឋានធានារ៉ាប់រង និងសោធន នៃក្រសួងសេដ្ឋកិច្ច និងហិរញ្ញវត្ថុ ដែលបានអញ្ជើញចូលរួមធ្វើជាសាក្សីក្នុងពិធីចុះហត្ថលេខានោះបានមានប្រសាសន៍ថា វិស័យធានារ៉ាប់រងបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ តាមរយៈការកៀងគរមូលធនពីក្រៅប្រទេស និងក្នុងប្រទេស ដែលក្រុមហ៊ុនធានារ៉ាប់រងអាយុជីវិត បានជួយបង្កើតនូវសមត្ថភាព ផលិតកម្ម នៃផលិតផលធានារ៉ាប់រង ទាំងការលើកកម្ពស់ផលិតផលធានារ៉ាប់រង ដែលបានរួមចំណែកនូវអភិវឌ្ឍ និងប្រសិទ្ធភាពសេដ្ឋកិច្ចជាតិ ។
លោកស្រី បានបន្ថែមថា ក្នុងរយៈពេលប៉ុន្មានឆ្នាំចុងក្រោយនេះ ឃើញថា វិស័យធានារ៉ាប់រងមានការរីកចម្រើនដែលគួរឲ្យកត់សម្គាល់ ស្របតាមយុទ្ធសាស្ត្រការអភិវឌ្ឍវិស័យហិរញ្ញវត្ថុឆ្នាំ២០១១-២០២០ របស់រាជរដ្ឋាភិបាលកម្ពុជា ។
គួរបញ្ជាក់ថា ក្នុងរយៈពេល៨ខែ ដើមឆ្នាំ២០១៦នេះ វិស័យធានារ៉ាប់រងនៅកម្ពុជា បានទទួលចំណូលផ្ទាល់ចំនួនប្រមាណ ៧៩លានដុល្លារ មានការកើនឡើងចំនួន ៤០ភាគរយ បើធៀបនឹងរយៈពេលដូចគ្នាក្នុងឆ្នាំ២០១៥កន្លងទៅ ៕
ចែករំលែកព័តមាននេះ