រាជធានីភ្នំពេញ ៖ កម្មការិនីម្នាក់ទើបតែរៀបការបាន២ថ្ងៃប៉ុណ្ណោះ ក៏ស្រាប់តែបាត់ខ្លួនសូន្យឈឹងដោយពុំដឹងថា តើនាងមានរឿងអ្វី កើតឡើងនោះទេ ។ ខណៈម្ដាយបង្កើតរបស់នាងនិងប្តីកំពុងតាមស្វែងរកគ្រប់ទីកន្លែង ប៉ុន្តែរយៈពេល៦ថ្ងៃទៅហើយរកពុំឃើញទាល់សោះ រីឯទូរស័ព្ទរបស់នាងខលចូលជាធម្មតាដែរ តែបែរជាចុចបិទអត់ទទួលនិយាយជាមួយទៅវិញ ។
ដោយមានការបារម្ភពីសុវត្ថិភាពរបស់នាង ទើបម្ដាយនិងប្តី បានផ្ដិតរូបថរបស់នាងជាច្រើនសន្លឹកដើរដាក់តាមប៉ុស្តិ៍នគរបាលឲ្យជួយអន្តរាគមន៍ស្វែងរកកូននិងប្រពន្ធ កាលពីវេលាម៉ោង៩ព្រឹកថ្ងៃទី២០ ខែឧសភា ឆ្នាំ២០២២ ។
ស្រ្តីជាម្ដាយបានកាន់រូបថត២សន្លឹក ធ្វើដំណើរទៅដល់ប៉ុស្តិ៍រដ្ឋបាលនគរបាលចោមចៅទី៣ ដើម្បីប្រគល់ជូននគរបាលនិងដាក់ពាក្យប្ដឹងអំពីការបាត់កូនស្រីនេះ។ អ្នកស្រីយ៉ូន សាយ អាយុ៣៥ឆ្នាំ មុខរបរកម្មការិនីរោងចក្របាននិយាយថា កូនស្រីរបស់គាត់ដែលបាត់ខ្លួននោះ ឈ្មោះ ធល ដាលីន អាយុ១៨ឆ្នាំ ជាកម្មការិនីរោងចក្រ ស្នាក់នៅបន្ទប់ជួលជាមួយគាត់ នៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។ នាងបានបាត់ខ្លួនរយៈពេល៦ថ្ងៃមកហើយ ដោយពុំដឹងថា នាងទៅទីណា មានរឿងអ្វីកើតឡើង និងមានសុខទុក្ខយ៉ាងណានោះទេ គាត់ពិតជាមានការព្រួយបារម្ភខ្លាំងណាស់។
ស្រ្តីជាម្ដាយបាននិយាយទៀតថា កូនស្រីគាត់ម្នាក់នេះមានប្ដីរួចទៅហើយ ដោយបានរៀបការជាមួយយុវជនម្នាក់ កាលពីថ្ងៃទី១៤ ខែឧសភា ឆ្នាំ២០២២ នៅឯស្រុកកំណើតក្នុងឃុំត្រពាំងស្រែ ស្រុកមេសាង ខេត្តព្រៃវែង។ លុះដល់ថ្ងៃទី១៥ ខែឧសភា បាននាំប្ដីប្រពន្ធធ្វើដំណើរស្នាក់នៅផ្ទះជួលក្នុងភូមិទួលពង្រ ហើយបានចូលធ្វើការនៅព្រឹកថ្ងៃទី១៦ ខែឧសភា។ រហូតដល់វេលាថ្ងៃត្រង់ថ្ងៃដដែល នាងបានទៅហូបបាយជុំគ្នាជាមួយប្ដីនិងក្រុមគ្រួសារនៅក្នុងបន្ទប់ជួលជាធម្មតាពុំមានបញ្ហាអ្វីកើតឡើងឡើយ។
អ្នកស្រីសាយ បានរៀបរាប់ប្រាប់ឲ្យដឹងទៀតថា ក្រោយហូបបាយរួចនាងបានចាកចេញពីបន្ទប់ជួលថា ទៅធ្វើការ ហើយក៏ស្រាប់តែបាត់រហូតមិនឃើញត្រឡប់ទៅផ្ទះវិញសោះ ដែលគិតរហូតមកទល់ពេលនេះរយៈពេល៦ថ្ងៃទៅហើយ។ ក្រោយពីកូនស្រីបាត់ខ្លួនបែបនេះ បានធ្វើឲ្យគាត់និងប្ដីនាងព្រួយបារម្ភខ្លាំងណាស់ អំពីសុខទុក្ខរបស់នាង នាងបានតាមរកគ្រប់កន្លែងតែពុំឃើញសោះ ចំណែកទូរស័ព្ទខលចូលតែអត់លើកទទួលនិងចុចបិទថែមទៀត។គាត់ក៏បានទៅសួរមិត្តភក្ដិរួមការងាររបស់នាងនៅឯរោងចក្រដែរ ប៉ុន្តែមិត្តភក្ដិកូនស្រីគាត់ប្រាប់គាត់ថា«កូនស្រីមីចូលធ្វើការតឌ១ព្រឹកប៉ុណ្ណោះ ពេលថ្ងៃអត់ឃើញមកធ្វើការទេ»។
គាត់បានបញ្ជាក់ថា ដោយសារតែបែបនេះទើបគាត់ផ្ដិតរូបថតច្រើនសន្លឹកដើរដាក់តាមប៉ុស្តិ៍នគរបាលសុំឲ្យជួយអន្តរាគមន៍ស្វែងរកកូនស្រីគាត់ ហើយបើឃើញជួយផ្ដល់ដំណឹងមកគាត់តាមរយៈទូរស័ព្ទលេខ 096 36 13 390 ផង ។
រហូតមកទល់និងពេលនេះគាត់នៅតែពុំបានដឹងថា មូលហេតុអ្វីទើបកូនស្រីបាត់ខ្លួនបែបនេះទេ ពុំដឹងនាងចុះចោលប្ដីឬមានរឿងអ្វីផ្សេងទៀតនោះទេ ។ចំណែកប្ដីនាងពេលនេះលែងនៅបន្ទប់ជួលខាងលើទៀតហើយ គឺបានរើអីវ៉ាន់ទៅស្នាក់នៅជាមួយបងប្អូនរបស់គេហើយ៕
ចែករំលែកព័តមាននេះ