«Daily Mail» របស់អង់គ្លេស កាលពីពេល ថ្មីៗកន្លងមកផ្សាយថា បុរសជនជាតិអារ៉ាប៊ីសាអ៊ូឌីត ម្នាក់ខណៈរៀបការបាន២ម៉ោងក៏សម្រេចចិត្តបញ្ឈប់ពិធីនោះវិញ ព្រោះខឹងកូនក្រមុំបង្ហោះរូបថតអាពាហ៍ពិពាហ៍ឱ្យមិត្តភក្តិឃើញតាមហ្វេសប៊ុក ខុសពីការព្រមព្រៀងគ្នាថា មិនធ្វើបែបនោះកាលពីមុនពេលរៀបការ ។
កូនកំលោះ-ក្រមុំមួយគូនោះបានព្រមព្រៀងគ្នាមុនពេលរៀបអាពាហ៍ពិពាហ៍ថា នឹងមិនបង្ហោះរូបថតអាពាហ៍ពិពាហ៍តាមហ្វេសប៊ុក ឬប្រព័ន្ធ «Snapchat» ទេ ព្រោះខាងប្រុសមិនពេញចិត្តបែបនោះ ប៉ុន្តែនៅថ្ងៃអាពាហ៍ពិពាហ៍កូនក្រមុំស្រាប់តែបង្ហោះរូបថតរៀបការរបស់ខ្លួនឱ្យមិត្តភក្តិបានឃើញ ។
កូនកំលោះឃើញបែបនោះក៏សម្រេចចិត្តឈប់រៀបការ ខណៈពិធីដំណើរការបាន២ម៉ោងទៅហើយនោះ ព្រោះនាងមិនប្រតិបត្តិតាមកិច្ចព្រមព្រៀង ។ កូនក្រមុំពេលស្វាមីសម្រេចបែបនោះ នាងគិតតែអោនមុខព្រមទទួលយកការលុបអាពាហ៍ពិពាហ៍របស់ខ្លួន ខណៈពេលក្រុមគ្រួសាររបស់នាងសម្តែងការមិនពេញចិត្ត ព្រោះចាត់ទុកជារឿងអយុត្តិធម៌មួយ ។
បងប្រុសរបស់កូនក្រមុំនិយាយថា «ប្អូនស្រីរបស់ខ្ញុំមិនព្រមធ្វើតាមកិច្ចសន្យា និងបង្ហោះរូបភាពឱ្យមិត្តភក្តិបានឃើញ ទើបឈានដល់ការលែងលះនោះ» ។
រឿងរ៉ាវដែលកើតឡើងបង្កើតការមិនចុះសម្រុងគ្នារវាងក្រុមគ្រួសារទាំង២ និងជាចុងគ្មាននរណាម្នាក់ផ្លាស់ប្តូរការសម្រេចចិត្តរបស់កូនកំលោះបានទេ ។ បងប្អូនខាងប្រុសបញ្ជាក់ថា នេះជាសិទ្ធិស្របច្បាប់របស់កូនកំលោះ ដូច្នេះអ្វីដែលកើតឡើងគឺជារឿងអកុសលមួយនៅក្នុងជីវិត ៕
ចែករំលែកព័តមាននេះ