ភាពខុសគ្នារវាងទឹកដោះម្តាយ និងម្សៅទឹកដោះគោដែលផ្សំតាមរូបមន្ត គឺខុសគ្នាដាច់ស្រឡះ ដោយសារតែការបំបៅកូនដោយទឹកដោះម្តាយ ក្មេងមានការលូតលាស់បានល្អ និងអាចការពារជំងឺបានមួយចំនួន ចំណែកឯការបំបៅកូន
ភាពខុសគ្នារវាងទឹកដោះម្តាយ និងម្សៅទឹកដោះគោដែលផ្សំតាមរូបមន្ត គឺខុសគ្នាដាច់ស្រឡះ ដោយសារតែការបំបៅកូនដោយទឹកដោះម្តាយ ក្មេងមានការលូតលាស់បានល្អ និងអាចការពារជំងឺបានមួយចំនួន ចំណែកឯការបំបៅកូនដោយទឹកដោះគោវិញ ក្មេងលូតលាស់មិនបានល្អ រួមទាំងប្រឈមនឹងហានិភ័យច្រើនយ៉ាង ។
ក្នុងឆ្នាំ២០១៤ តាមការអង្កេតរបស់អង្គការHKI បានរកឃើញថា ជារៀងរាល់ឆ្នាំ ក្រុមហ៊ុន ផលិតផលជំនួសទឹកដោះម្តាយ(ម្សៅទឹកដោះគោផ្សំតាមរូបមន្ត) បានចំណាយប្រាក់៦៣៥.៣២៧ដុល្លារអាមេរិក លើការឃោសនាពាណិជ្ជកម្ម ដើម្បីទាក់ទាញចំណាប់អារម្មណ៍របស់អ្នកម្តាយគ្រប់រូប ប្តូរពីការបំបៅកូនដោយទឹកដោះម្តាយ ងាកមកបំបៅដោះកូនដោយម្សៅទឹកដោះគោវិញ ។ ដោយសារអ្នកម្តាយមួយចំនួនជឿតាមការឃោសនារបស់ក្រុមហ៊ុនផលិតផលជំនួសទឹកដោះម្តាយ និងមិនបានគិតអំពីគុណវិបត្តិរបស់ម្សៅទឹកដោះគោទាំងនោះ ជាមធ្យមគ្រូសារបានចំណាយប្រាក់២៦,៧ភាគរយ នៃប្រាក់ចំណូលសរុបប្រចាំខែរបស់ពួកគេ លើការទិញម្សៅទឹកដោះគោផ្សំតាមរូបមន្ត ។
ខាងក្រោមនេះ គឺជាភាពខុសគ្នារវាងការបំបៅដោះកូនដោយទឹកដោះម្តាយ និងការបំបៅដោះកូនដោយម្សៅទឹកដោះគោ ដែលផ្សំតាមរូបមន្ត ។
ការបំបៅដោះកូនដោយទឹកដោះម្តាយ៖
-ជាអាហារធម្មជាតិនិងបរិសុទ្ធ
-អាចជួយការពារសុខភាពរបស់ម្តាយ និងអាចការពារម្តាយមិនឲ្យមានផ្ទៃពោះបានទៀតក្នុងកំឡុងពេល៦ខែដំបូង ។
-មិនចាំបាច់ចំណាយប្រាក់ ដូចជាការបំបៅកូនដោយទឹកដោះសិប្បនិមិ្មត ។
-ទារកអាចទទួលបាននូវអាហារចម្រុះពីម្តាយដែលបានបរិភោគ ។
-ការចាប់ផ្តើមបំបៅកូនដោយទឹកដោះម្តាយភ្លាម ក្នុងម៉ោងដំបូងបន្ទាប់ពីសម្រាល អាចបង្ការមរណភាពទារក ទើបនឹងកើតបាន២០ភាគរយ ។
-ទារកដែលបានបៅទឹកដោះម្តាយតែមួយគត់ រយៈពេល៦ខែជួយកាត់បន្ថយអត្រាស្លាប់ដោយសារជំងឺរាករូសបានចំនួន១១ដង និងជំងឺរលាកទងសួតបានចំនួន១៥ដង ។
ការបំបៅដោះកូនដោយម្សៅទឹកដោះគោដែលផ្សំតាមរូបមន្ត៖
-ជាផលិតផលដែលផ្សំចម្រុះរួមមាន ទឹកដោះគោ សណ្តែក និងប្រេងធម្មជាតិ ។
-មិនអាចផ្តល់សារធាតុចិញ្ចឹម និងអត្ថប្រយោជន៍ដូចទឹកដោះម្តាយបានឡើយ ដូចជាគ្មានអង្គបដិបក្ខ ប្រាណភាពសុំា និងកត្តាលូតលាស់នានា ។
-ក្រពះទារកពិបាកនឹងរំលាយអាហារទាំងនោះ ។
-ដាច់ខាតមិនអាចធ្វើការប្រដូចទៅនឹងទឹកដោះម្តាយបាននោះទេ ។ ការបំបៅកូនដោយទឹកដោះម្តាយ គឺជាជម្រើសដ៏ប្រសើរបំផុត សម្រាប់សុខភាពអ្នកម្តាយនិងទារក ពិសេសអាចជៀសផុតពីការកើតមានជំងឺមហារីសុដន់ និងដៃស្បូនថែមទៀតផង ៕
ចែករំលែកព័តមាននេះ