រាជធានីភ្នំពេញ ៖ កម្លាំងនគរបាលព្រហ្មទណ្ឌខណ្ឌពោធិ៍សែនជ័យ បានសហការណ៍ជាមួយកម្លាំងនគរបាលប៉ុស្តិ៍កន្ទោក ចុះទៅធ្វើការបង្ក្រាបក្រុមជួញដូរ និងប្រើប្រាស់ញ្រឿងញៀនមួយក្រុម ក្នុងខណៈដែលជនទាំងនោះកំពុងធ្វើសកម្មភាពជួញដូរ និងប្រើប្រាស់ជុំគ្នានៅក្នុងបន្ទប់ផ្ទះជួលមួយកន្លែង ហើយត្រូវបានប្រជាពលរដ្ឋ ប្រទះឃើញក៏បានរាយការណ៍ជូន នគរបាលឲ្យចុះទៅធ្វើការចាប់ខ្លួន បានទាំងសម្បុកតែម្ដង ដោយនៅក្នុងខណៈនោះ បានធ្វើការឃាត់ខ្លួនជនសង្ស័យបានចំនួន៤នាក់ និងដកហូតបានគ្រឿងញៀនចំនួន៨កញ្ចប់ ជញ្ជីងថ្លឹងគ្រឿងញៀន១គ្រឿង រួមជាមួយនឹងសម្ភារមួយចំនួនទៀតផងដែរ។
ការចុះបង្ក្រាបគ្រឿងញៀននោះ បានធ្វើឡើងកាលពីវេលារសៀលថ្ងៃទី២៨ ខែតុលា ឆ្នាំ២០១៦ នៅក្នុងបន្ទប់ជួលមួយកន្លែង ស្ថិតនៅក្នុងបុរីពិភពថ្មី ភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ។ នគរបាលបានឲ្យដឹងថា ជនសង្ស័យដែលត្រូវចាប់ខ្លួននោះទី១,ឈ្មោះ ផន កុសល អាយុ២៧ឆ្នាំ មុខរបរកម្មកររោងចក្រ ស្នាក់នៅក្នុងសង្កាត់កំបូល ខណ្ឌពោធិ៍សែនជ័យ និងមានស្រុកកំណើតនៅក្នុងភូមិឈើត្រាច ឃុំគោកកន្ទាយ ស្រុករលៀប្អៀរ ខេត្តកំពង់ឆ្នាំង។ ទី២,ឈ្មោះ លីម ប្រុសទីង អាយុ២០ឆ្នាំ ស្នាក់ភូមិត្រពាំងជួន ឃុំឆក់ឈើនាង ស្រុកអង្គស្នួល ខេត្តកណ្តាល។ ទី៣,ឈ្មោះ ណុប រ៉ាយ អាយុ២៣ឆ្នាំ មានស្រុកកំណើតនៅភូមិព្រៃផ្ចឹក ស្រុកអង្គស្នួល ខេត្តកណ្តាល និងទី៤,ឈ្មោះ កែវ ពន្លឺ អាយុ២១ឆ្នាំ ស្នាក់នៅបុរីពិភពថ្មី សង្កាត់កន្ទោក ខណ្ឌពោធិ៍សែនជ័យ និងមាន ស្រុកកំណើតភូមិព្រៃសំរោង ឃុំបែកចាន ស្រុកអង្គស្នួល ខេត្តកណ្តាល។
តាមប្រភពព័ត៌មានបានឲ្យដឹងថា នៅមុនពេលកើតហេតុ ក្រុមជនសង្ស័យខាងលើនោះ បានណាត់គ្នាចូល ទៅធ្វើសកម្មភាពជួញដូរ និងប្រើប្រាស់គ្រឿងញៀននៅក្នុងបន្ទប់ផ្ទះជួលមួយនោះ ហើយត្រូវបានប្រជាពលរដ្ឋប្រទះឃើញ ក៏បានរាយការណ៍ជូននគរបាលឲ្យជួយអន្តរាគមន៍ចុះទៅបង្ក្រាប។ ក្រោយពេលទទួលបានដំណឹងនោះភ្លាម កម្លាំងបានចុះទៅធ្វើការបង្ក្រាប និងចាប់ខ្លួនបានចំនួន៤នាក់ ព្រមទាំងដកហូតបានគ្រឿងញៀននិងសម្ភារខាងលើបន្ទាប់មកបាន នាំទៅសួរនាំ និងកសាងសុំណុំរឿងបញ្ជូនទៅតុលាកា៕
ចែករំលែកព័តមាននេះ