ខេត្តសៀមរាប ៖ រថយន្តបាឡែន បើកបរក្នុងល្បឿនលឿន មិនបានប្រុងប្រយ័ត្នក៏ជ្រុលទៅបុកម៉ូតូ ដែលបើកបញ្ច្រាសទិសគ្នា ដោយសារម៉ូតូបើកពីលិចទៅកើត ហើយបត់ឆ្វេងបម្រុងឆ្លងកាត់ផ្លូវជាតិលេខ៦
ខេត្តសៀមរាប ៖ រថយន្តបាឡែន បើកបរក្នុងល្បឿនលឿន មិនបានប្រុងប្រយ័ត្នក៏ជ្រុលទៅបុកម៉ូតូ ដែលបើកបញ្ច្រាសទិសគ្នា ដោយសារម៉ូតូបើកពីលិចទៅកើត ហើយបត់ឆ្វេងបម្រុងឆ្លងកាត់ផ្លូវជាតិលេខ៦ ទើបបណ្ដាលឱ្យ រថយន្តបុកអ្នកបើកបរម៉ូតូម្នាក់ស្លាប់ភ្លាមៗនៅនឹងកន្លែងកើតហេតុ បង្កឱ្យមានការភ្ញាក់ផ្អើល ហើយកកស្ទះចរាចរណ៍មួយសន្ទុះទើបឃើញសមត្ថកិច្ចមកដល់។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង៧និង៤០នាទីព្រឹកថ្ងៃទី២៨ ខែតុលា ឆ្នាំ២០១៦ ស្ថិតនៅលើចំណុចផ្លូវជាតិលេខ៦ ក្នុងភូមិត្រពាំងថ្នល់ ឃុំកន្ទ្រាំង ស្រុកប្រាសាទបាគង ខេត្តសៀមរាប។
តាមប្រភពពីកម្លាំងនគរបាលចរាចរណ៍ស្រុកប្រាសាទបាគងបានឱ្យដឹងនៅរសៀលថ្ងៃទី២៨ ខែតុលា ឆ្នាំ២០១៦នេះថា ជនរងគ្រោះឈ្មោះ ខ្លិន ប៉ុក ភេទប្រុស អាយុ៧៨ឆ្នាំ រស់នៅក្នុងភូមិកើតហេតុខាងលើ ដែលបានបើកបរម៉ូតូមកពីលិចទៅកើត ម៉ាកហុងដា សេ១២៥ ពណ៌ខ្មៅ ពាក់ស្លាកលេខ សៀមរាប 1K-7837។ រីឯអ្នកបើកបររថយន្តមានឈ្មោះ ឡុង បូរ៉ា ភេទប្រុស អាយុ២៦ រស់នៅភូមិព្រៃរន្ទះ ឃុំព្រៃរន្ទះ ស្រុកពោធិ៍រៀង ខេត្តព្រៃវែង បើករថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2T-1983 មកពីកើតទៅលិច។
ប្រភពបានបន្តថា បន្ទាប់ពីបុកជនរងគ្រោះស្លាប់ ជនបង្កបានប្រឹងបើករត់បានបន្តិច ក៏ត្រូវប្រជាពលរដ្ឋដេញចាប់ប្រគល់ឱ្យសមត្ថកិច្ច ខណៈនោះម្ចាស់រថយន្តចុះរត់គេចខ្លួនបាត់ បន្សល់ទុករថយន្តនៅកន្លែងកើតហេតុ។ បច្ចុប្បន្នសាកសព ក្រោយពីកម្លាំងសមត្ថកិច្ចនគរបាលស្រុកចុះត្រួតពិនិត្យវាស់វែង និងធ្វើកំណត់ហេតុរួច ត្រូវបានប្រគល់ឱ្យក្រុមគ្រួសារដឹកយកទៅធ្វើបុណ្យតាមទំនៀមទម្លាប់ខ្មែរ។ ចំណែករថយន្តជនបង្ក និងម៉ូតូជនរងគ្រោះត្រូវបានកម្លាំងជំនាញអូសយកមករក្សាទុកនៅអធិការដ្ឋាននគរបាលស្រុក និងកសាងសំណុំរឿងទៅតាមផ្លូវច្បាប់៕
ចែករំលែកព័តមាននេះ