ប្រតិបត្តិការក្តៅ ! ចាប់រថយន្ត៤គ្រឿងយកទៅកាត់ទ្រុងចោល
ខេត្តកំពង់ចាម ៖ នេះគឺជាលើកទី១ហើយដែលសមត្ថកិច្ចបើកប្រតិបត្តិការក្តៅឃាត់រថយន្តធុនយក្សបាន៤គ្រឿងយកទៅកាត់ទ្រុងចោល ដែលប្រតិបត្តិការនេះធ្វើឡើង …
ខេត្តកំពង់ចាម ៖ នេះគឺជាលើកទី១ហើយដែលសមត្ថកិច្ចបើកប្រតិបត្តិការក្តៅឃាត់រថយន្តធុនយក្សបាន៤គ្រឿងយកទៅកាត់ទ្រុងចោល ដែលប្រតិបត្តិការនេះធ្វើឡើងនៅតាំងពីព្រឹកថ្ងៃទី២៧បន្តរហូតដល់ព្រឹកថ្ងៃទី២៨ ខែតុលា ឆ្នាំ២០១៦ នៅតាមបណ្ដោយផ្លូវជាតិលេខ៦ ស្ថិតក្នុងស្រុកជើងព្រៃ ខេត្តកំពង់ចាម ។
លោកវរសេនីយ៍ទោ ប្រាក់ សុខគុណ អធិការនគរបាលស្រុកជើងព្រៃ បានឲ្យដឹងថា ប្រតិបត្តិការរបស់កម្លាំងចម្រុះលឿនដូចផ្លេកបន្ទោរ ដោយបានចុះមកកាន់ស្រុកជើងព្រៃកាលពីវេលាម៉ោង១០ព្រឹក ថ្ងៃទី២៧ តុលា គឺបានឃាត់រថយន្តដឹកទំនិញ និងរថយន្តប្រភេទដឹកកុងតឺន័របានជាបន្តបន្ទាប់រហូត៤គ្រឿងដែលកំពុងធ្វើចរាចរណ៍នៅលើផ្លូវជាតិលេខ៦ ហើយនៅវេលាម៉ោងជាង៣រសៀល បានកាត់ទ្រុងរថយន្តរបស់ក្រុមហ៊ុន ហាក់ ម៉ៅ ដែលតខុសពីលក្ខណៈបច្ចេកទេសចោល ។
លោកវរសេនីយ៍ត្រី ប្រាក់ សុខគុណ បន្តថា ក្រោយពីបានកាត់ទ្រុងហើយ រថយន្តនោះត្រូវបានអនុញ្ញាតឲ្យត្រឡប់ទៅវិញ ចំណែករថយន្ត៣គ្រឿងទៀតត្រូវបាននាំទៅរក្សាទុកនៅមុខអធិការដ្ឋាននគរបាលស្រុកជើងព្រៃជាបណ្តោះអាសន្ន រហូតមកដល់ព្រឹកថ្ងៃទី២៨ ខែតុលា ក្រុមជាងបានបន្តកិច្ចការរបស់ខ្លួន គឺបានផ្សារកាត់ទ្រុងរថយន្តពណ៌ត្រេអ៊ី ប្រភេទភ្លៅ៥ ដែលនៅលើទ្វារថយន្តមានសរសេរថា យោធភូមិភាគទី៣ ។ បន្ទាប់ពីកាត់ទ្រុងខុសបច្ចេកទេសរួច ជំនាញសាធារណការខេត្តក៏បានធ្វើលិខិតប្រគល់រថយន្តជូនទៅម្ចាស់រថយន្តវិញដែរ ។
អ្នកបើកបររថយន្តឈ្មោះ ខុន អុល ភេទប្រុស អាយុ៣៥ឆ្នាំ នៅភូមិទួលវិហារ ឃុំចាន់តាសែន ស្រុកឧដុង្គ ខេត្តកំពង់ស្ពឺ បានបំភ្លឺប្រាប់ឲ្យដឹងថា គាត់បានស៊ីឈ្មួលបើកបររថយន្តភ្លៅ៥របស់យោធភូមិភាគទី៣ ដែលមានទីតាំងនៅខេត្តកំពង់ស្ពឺ គឺបានដឹកទំនិញគ្រប់ប្រភេទឲ្យតែគេឲ្យដឹក ។ គាត់ថា នៅព្រឹកថ្ងៃទី២៧ ខែតុលា ឆ្នាំ២០១៦ គាត់បានបើករថយន្តចេញពីរាជធានីភ្នំពេញមកកាន់ស្រុកព្រៃឈរ ខេត្តកំពង់ចាម ដើម្បីឲ្យជាងផ្សារកាត់ទ្រុងចេញ តែមិនទាន់នឹងដល់គោលដៅផងក៏ត្រូវបានកម្លាំងសមត្ថកិច្ចចម្រុះចាប់ជាប់នៅស្រុកជើងព្រៃ ព្រោះតែរថយន្តគាត់បានតទ្រុងមកក្រោយប្រវែង១,៥០ម៉ែត្រខុសលក្ខណៈបច្ចេកទេស ។
លោក សេង ឈួន អនុរដ្ឋលេខាធិការក្រសួងសាធារណការ និងដឹកជញ្ជូន បញ្ជាក់ថា ការកាត់ទ្រុងនេះគឺប្រយោជន៍ដើម្បីកុំឲ្យរថយន្តដឹកធ្ងន់ខូចផ្លូវថ្នល់ ជាមួយនោះគាត់ក៏សូមដាស់តឿនដល់អ្នកបើកបរថយន្តឯទៀតបើដឹងថារថយន្តរបស់ខ្លួនតទ្រុងខុសបច្ចេកទេសហើយនោះ មេត្តានាំគ្នាកាត់ទ្រុងដែលតចេញឲ្យមកដូចសភាពដើម ។
សូមបញ្ជាក់ថា ប្រតិបត្តិការចាប់ឃាត់រថយន្តយកទៅកាត់ទ្រុងខុសលក្ខណៈបច្ចេកទេសចេញដោយមិនមានការលើកលែងនេះដឹកនាំដោយលោក សេង ឈួន អនុរដ្ឋលេខាធិការក្រសួងសាធារណការ និងដឹកជញ្ជូន និងលោកឧត្តមសេនីយ៍ឯក ហ៊ឹម យ៉ាន អគ្គស្នងការរងគនរបាលជាតិ ដោយអនុវត្តតាមតាមអនុសាន៍របស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ៕
ចែករំលែកព័តមាននេះ