ខេត្តកំពង់ធំ ៖ លោកងួន ញ៉ិល សមាជិកគណៈអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា ប្រធានក្រុមការងាររបស់គណៈកម្មាធិការកណ្តាលគណបក្សប្រជាជនកម្ពុជាចុះជួយខេត្តកំពង់ធំ និងជាអនុប្រធានទី១រដ្ឋសភានៃព្រះរាជាណាចក្រកម្ពុជា នាព្រឹកថ្ងៃទី៥ មីនា ឆ្នាំ២០១១កន្លងមកនេះ បានអញ្ជើញជាអធិបតីក្នុងកិច្ចប្រជុំជាមួយគណៈកម្មាធិការគណបក្សប្រជាជនកម្ពុជាខេត្តកំពង់ធំ ក៏ដូចជាថ្នាក់ដឹកនាំខេត្ត ។
លោកងួន ញ៉ិល បានមានប្រសាសន៍ថា កិច្ចប្រជុំនាពេលនេះកើតឡើងដោយសារមានរបាយការណ៍ជូនលោករបស់ស្នងការដ្ឋាននគរបាលខេត្តកំពង់ធំ ការិយាល័យកណ្តាលសន្តិសុខថា មានប្រជាជនប្រមាណជាង៣០០នាក់ នៃខេត្តកំពង់ធំ ក្នុងស្រុកសណ្តាន់ ខេត្តព្រះវិហារ និងខេត្តស្ទឹងត្រែង បំរុងធ្វើការតវ៉ាចំពោះក្រុមហ៊ុនដាំកៅស៊ូវៀតណាម ឈ្មោះ CRCK និងឈ្មោះ PNT ដោយចោទប្រកាន់ថា ក្រុមហ៊ុនបានកាប់រានដីព្រៃនៅតំបន់នោះដើម្បីដាំកៅស៊ូ។ លោកបានមានប្រសាសន៍ទៀតថា កន្លងមក វិទ្យុអាស៊ីសេរីបានធ្វើការផ្សាយដោយគ្មានការពិតទាល់តែសោះ ចំពោះបញ្ហានេះ ដោយអះអាងថា ឈ្មោះប៉ុល ប៊ុនថន ជាទីប្រឹក្សាលោកងួន ញ៉ិល ថា លោកនិងខុទ្ទកាល័យលោកគ្រោងនឹងចាត់វិធានការក្នុងពេលខាងមុខចំពោះការបំផ្លាញព្រៃឡង់ ។
លោកងួន ញ៉ិល បានមានប្រសាសន៍បញ្ជាក់ក្នុងកិច្ចប្រជុំនោះថា លោកបានឱ្យខុទ្ទកាល័យលោកធ្វើលិខិតបដិសេធចុះផ្យាយក្នុងទំព័រសារព័ត៌មានកោះសន្តិភាពរួចហើយថា ឈ្មោះប៉ុល ប៊ុនថន នេះ ពុំមែនជាទីប្រឹក្សាអនុប្រធានទី១ រដ្ឋសភាទេ ។ មន្ត្រីក្នុងខុទ្ទកាល័យលោកអនុប្រធានទី១ រដ្ឋសភាពុំដែលមានផ្តល់យោបល់ថា «អនុប្រធានទី១ រដ្ឋសភា គ្រោងនឹងចាត់វិធានការក្នុងពេលដ៏ខ្លីខាងមុខនេះ ដើម្បីបង្ក្រាបការបំផ្លាញព្រៃឡង់» ទេ ។
ក្នុងនាមជាតំណាងរាស្ត្រ និងក្នុងឋានៈជាអនុប្រធានទី១រដ្ឋសភា លោកងួន ញ៉ិល បានមានប្រសាសន៍ថា លោកតែងតែប្រកាន់ខ្ជាប់នូវតួនាទីតំណាងរាស្ត្រ គឺជាអ្នកធ្វើច្បាប់និងជាអ្នកត្រួតពិនិត្យការអនុវត្តច្បាប់ ។ រាល់បណ្តឹងពីប្រជារាស្ត្រដែលជាម្ចាស់ឆ្នោត លោកតែងធ្វើការពិនិត្យស្រាវជ្រាវស្វែងយល់ពីការពិតគ្រប់ជ្រុងជ្រោយ វាយតម្លៃត្រង់ណាស្របច្បាប់ ត្រង់ណាខុសច្បាប់ ហើយធ្វើការណែនាំឱ្យគ្រប់ភាគីទំាំងអស់ ទាំងអាជ្ញាធរ ទាំងប្រជាពលរដ្ឋ ទាំងក្រុមហ៊ុនឱ្យវិលមករកវិធីដោះស្រាយតាមគន្លងគតិច្បាប់ ហើយស្រុះស្រួលអាចទទួលយកបានទាំងអស់គ្នា ។
ផ្អែកលើតួនាទីខាងលើ លោកងួន ញ៉ិល បានធ្វើការផ្តាំផ្ញើដល់អាជ្ញាធរខេត្តទៀតថា ត្រូវខិតខំធ្វើយ៉ាងណាពន្យល់ប្រជាជនឱ្យយល់ពីចក្ខុវិស័យរបស់រាជរដ្ឋាភិបាលក្នុងការវិនិយោគ គឺបានផ្តល់ផលប្រយោជន៍ចំពោះរាជរដ្ឋាភិបាលខ្លួនឯង ផ្តល់ផលប្រយោជន៍ចំពោះក្រុមហ៊ុន និងផ្តល់ផលប្រយោជន៍ចំពោះប្រជាជនដែលរស់នៅតំបន់នោះ ។ រាល់ការអនុញ្ញាតឱ្យមានការវិនិយោគរាជរដ្ឋាភិបាលតែងចែងលំអិតក្នុងកិច្ចសន្យាអំពីផលប៉ះពាល់ទាំងឡាយ ហើយក្រសួងស្ថាប័ន និងអាជ្ញាធរពាក់ព័ន្ធ ត្រូវតាមដានកិច្ចការនេះ ។
ចំពោះការវិនិយោគដាំដំណាំកៅស៊ូរបស់ក្រុមហ៊ុន CRCK និងក្រុមហ៊ុន PNT នៅស្រុកសណ្តាន់ គឺពិតជានាំមកនូវផលប្រយោជន៍ដល់ប្រជាជននៅតំបន់នោះ ពីព្រោះក្រុមហ៊ុននេះមានទុនគ្រប់គ្រាន់សម្រាប់ធ្វើសកម្មភាពរបស់ខ្លួន។ លោកងួន ញ៉ិល ក៏បានមានប្រសាសន៍ផងដែរថា យើងត្រូវប្រយ័ត្នប្រយែងអំពីក្រុមហ៊ុនខ្លះ ដែលវិនិយោគក្នុងរូបភាពធ្វើនំអត់ម្សៅ ពេលគេបានអាជ្ញាប័ណ្ណពីរដ្ឋាភិបាល គឺគេទុកអាជ្ញាប័ណ្ណនោះលក់បន្ត និងពេលខ្លះគេបានបង្កភាពស្មុគស្មាញថែមទៀត ៕
ចែករំលែកព័តមាននេះ