យោងតាមស៊ីនហួថា ប្រទេសចិនគូសបញ្ជាក់នាថ្ងៃទី២៧ តុលាថាចំណុចទាំងឡាយដែលប្រធានាធិបតីហ្វ៊ីលីពីនលោក RODRIGO DUTERTE លើកឡើងពេលលោកទៅបំពេញទស្សនកិច្ចក្នុងប្រទេសជប៉ុនគឺសមស្របទៅនឹងបណ្តាកុងសង់ស៊ុលដែលលោកសម្រេចបានជាមួយបណ្តាមេដឹកនាំចិន ពេលលោកមកបំពេញទស្សនកិច្ចនៅទីនោះកាលពីសប្តាហ៍មុន ។
អ្នកនាំពាក្យក្រសួងការបរទេសចិនលោកលូកាង ថ្លែងបែបនេះជាការឆ្លើយតបចំពោះសំណួរមួយដែលទាក់ទិននឹងព័ត៌មានរបស់បណ្តាសារព័ត៌មានដែលថាជប៉ុននិងហ្វ៊ីលីពីនសម្រេចបានកិច្ចព្រមព្រៀងអំឡុងពេលទស្សនកិច្ចរបស់លោក DUTERTE ពីការគោរពសេចក្តីសម្រេចចិត្តរបស់តុលាការមជ្ឈត្តការអន្តរជាតិពីរឿងសមុទ្រចិនខាងត្បូង ។
លោកលូកាង គូសបញ្ជាក់ថាចិននិងហ្វ៊ីលីពីនសម្រេចបានកុងសង់ស៊ុលមួយពេលលោក DUTERTE មកកាន់ចិននិងថាភាគីទាំង២សង្កត់ធ្ងន់លើកិច្ចសហប្រតិបត្តិការហើយចាត់ទុកមួយឡែកបណ្តាទំនាស់ ហើយធ្វើឱ្យបញ្ហាសមុទ្រចិនខាងត្បូងដើរលើផ្លូវត្រឹមត្រូវគឺការចរចានិងការពិគ្រោះពិភាក្សាគ្នាទ្វេភាគី ។ លោកបន្តថា កុងសង់ស៊ុលនោះបញ្ជាក់យ៉ាងច្បាស់ក្នុងសេចក្តីប្រកាសជាសាធារណៈ ក្រោយការជួបគ្នារវាងមេដឹកនាំនៃប្រទេសទាំង២ ។ ប្រសិនបើប្រទេសមួយចំនួននៅរក្សាការស្រមៃពុំសូវប្រាកដនិយម គួរបោះបង់ចោលការស្រមៃទាំងនោះឱ្យបានឆាប់ទៅ ។
ពេលជួបពិភាក្សាជាមួយលោកDUTERTE កាលពីថ្ងៃទី២៦ តុលា នៅក្រុងតូក្យូ នាយករដ្ឋមន្ត្រីជប៉ុនលោកស៊ីនហ្សូអាបេ អះអាងថា ជប៉ុនចង់ជំរុញកិច្ចសហប្រតិបត្តិការជាមួយហ្វ៊ីលីពីនហើយត្រៀមជួយទ្រទ្រង់ប្រទេសនោះក្នុងផ្នែកសន្តិសុខនិងសេដ្ឋកិច្ច ។ លោកអាបេប្រកាសពីការផ្តល់ឱ្យហ្វ៊ីលីពីននូវនាវាល្បាតធំ២គ្រឿង ដើម្បីកែលម្អសមត្ថភាពការពារសមុទ្រក្រៅពីជំនួយហិរញ្ញវត្ថុសម្រាប់ជំរុញសកម្មភាពសេដ្ឋកិច្ចក្នុងបណ្តាមូលដ្ឋានហ្វ៊ីលីពីនដែលពុំសូវមានការអភិវឌ្ឍន៍ ៕
ចែករំលែកព័តមាននេះ