រាជធានីភ្នំពេញ ៖ បន្ទាប់ពីពិធីបើកការប្រកួតកីឡាជាតិកាលពីថ្ងៃម្សិលមិញបានបញ្ចប់ទៅដោយភាពអឹកអធឹក នៅរសៀលថ្ងៃសៅរ៍ទី២៩ ខែតុលា ស្អែកនេះ អ្នកស្នេហាវិស័យកីឡាបានងាកមកចាប់អារម្មណ៍ការប្រកួតប្រដាល់អន្តរជាតិរបស់ព្រឹត្តិការណ៍ខារ៉ាបាវវិញម្ដង ។ កីឡាករជើងខ្លាំង២រូប គឺឯម សុធី និងសូត្រ ប៊ុនធី នឹងឡើងសង្វៀនប្រកួតជាមួយកីឡាករបរទេស តែមិនមែនជាការដណ្ដើមពានដូចមុននោះទេ គឺជាការប្រកួតមិត្តភាពកំដររេញប៉ុណ្ណោះ។
បន្ទាប់ពីរកឃើញជើងខ្លាំង២រូបឱ្យទៅប្រកួតដណ្ដើមខ្សែក្រវាត់គ្នានាថ្ងៃទី៥ វិច្ឆិកា ខាងមុខ នាថ្ងៃសៅរ៍ទី២៩ តុលា ស្អែកនេះ អ្នករៀបចំកម្មវិធីប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានដាក់ជំនួសដោយគូអន្តរជាតិកំដររេញ ដើម្បីទុកពេលឱ្យបេក្ខភាពឡើងទៅប្រកួតដណ្ដើមខ្សែក្រវាត់ទាំងពីរនាក់បានសម្រាកហ្វឹកហាត់ ។ ការប្រកួតនៅរសៀលស្អែកនេះ រំពឹងថា មានអ្នកចាប់អារម្មណ៍ច្រើន ដោយសារសមាសភាពឡើងប្រកួតកំដររេញគឺជាជើងខ្លាំង ។ កីឡាករកម្ពុជា និងថៃ សុទ្ធតែត្រូវគេមើលឃើញថានឹងធ្វើឱ្យព្រឹត្តិការណ៍ខារ៉ាបាវ មានការចាប់អារម្មណ៍ខ្លាំងពេលមានវត្តមានរបស់ពួកគេ ។ កីឡាករឯម សុធី មកពីក្លិបឬទ្ធិពោធិសែនជ័យ នឹងត្រូវប្រកួតជាមួយកីឡាករថៃដែលមានប្រវត្តិប្រកួតច្រើន និងមានសមត្ថភាពខ្ពស់ ។ មិនខុសគ្នាដែរកីឡាករ សូត្រ ប៊ុនធី មកពីក្លិបបក្សាស្លាបដែកក៏នឹងប៉ះប្រកួតជាមួយកីឡាករថៃដែលមានសមត្ថភាពមិនធម្មតាដូចគ្នា ។
លោក ញាណ សុធី អ្នករៀបចំកម្មវិធីប្រកួតប្រដាល់ប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា បើទោះជានៅថ្ងៃនេះមិនមែនជាការប្រកួតដណ្ដើមពិន្ទុឬដណ្ដើមពានជើងឯក ប៉ុន្តែលោកនៅតែរំពឹងខ្ពស់ចំពោះវត្តមានរបស់កីឡាករកម្ពុជា និងថៃ ដែលលោក និងគណៈកម្មការប្រដាល់ផ្គូផ្គងឱ្យឡើងប៉ះគ្នា ។ លោកថា ក្នុងចំណោមការប្រដាល់ជាលក្ខណៈអន្តរជាតិ ព្រឹត្តិការណ៍ខារ៉ាបាវមានភាពអំណោយផលសម្រាប់ទស្សនិកជនជាងគេ ដោយសារតែព្រឹត្តិការណ៍នេះធ្វើនៅរសៀលថ្ងៃសៅរ៍ចំម៉ោងបុគ្គលិកគ្រប់ផ្នែកសម្រាក ហើយជាព្រឹត្តិការណ៍ធ្វើមុនតន្ត្រីបន្តផ្ទាល់ដែលភាគច្រើនតម្រូវឱ្យអ្នកមានបំណងចង់ទស្សនាការប្រគំតន្ត្រីមកអង្គុយចាំមុន ។ លោកថា កីឡាករ ឯម សុធី នឹងត្រូវប៉ះប្រកួតជាមួយកីឡាករថៃឈ្មោះ ណក់ ក្រាចិប ក្នុងនាមជាគូរងឯក ។ កីឡាករថៃគូនេះធ្លាប់ប្រកួតបាន៨១លើក ឈ្នះ៦៩លើក និងចាញ់១២លើក ដែលតួលេខនេះគឺមានចំនួនខ្ពស់ជាងកីឡាករឯម សុធី ទើបលោកយល់ថា កីឡាករកម្ពុជាដាច់ខាតត្រូវតែប្រឹងបន្តិចទើបអាចឈ្នះស្រួល ។ ឯម សុធី ទើបប្រកួតបាន៧០លើក ឈ្នះ៥៩លើក ចាញ់១០លើក និងស្មើ១លើកប៉ុណ្ណោះ ប៉ុន្តែលោកនៅតែលើកទឹកចិត្តចំពោះកីឡាករកម្ពុជា ដោយរំពឹងថាគេនឹងធ្វើបានល្អ ។
ដោយឡែកសម្រាប់មួយគូទៀតលោកថា កីឡាករសូត្រ ប៊ុនធី នឹងត្រូវជួបប្រកួតជាមួយកីឡាករថៃឈ្មោះ យ៉ត ភីត ក្នុងនាមជាគូឯករបស់ព្រឹត្តិការណ៍ ។ កីឡាករថៃធ្លាប់ប្រកួត៨៤លើក ឈ្នះ៦៩លើក និងចាញ់១៥លើក ក្នុងពេលដែលសូត្រ ប៊ុនធី ធ្លាប់ប្រកួតបានប្រហាក់ប្រហែលគ្នាដែរគឺ៧៩លើក ឈ្នះ៦៦លើក ចាញ់១០លើក និងស្មើ៣លើក។ ព្រឹត្តិការណ៍ដែលពួកគេប្រកួតគ្នានឹងចាប់ផ្ដើមពីម៉ោង២រសៀលស្អែកនេះនៅក្នុងស្ទីឌីយោទូរទស្សន៍អាស៊ីអាគ្នេយ៍ ៕
ចែករំលែកព័តមាននេះ