ខេត្តមណ្ឌលគិរី ៖ ជនជាតិដើមភាគតិចរស់នៅភូមិពូតាំង សង្កាត់រមនា ក្រុងសែនមនោរម្យ មានការភ្ញាក់ផ្អើលយ៉ាងខ្លាំងព្រោះតែមានលេចឮពាក្យតគ្នាពីមាត់មួយទៅមាត់មួយថា មានអង្ករប្លាស្ទិកកំពុងចរាចរណ៍ក្នុងមូលដ្ឋានរបស់ពួកគាត់ ។ ករណីនេះបានកើតឡើងកាលពីថ្ងៃទី២៥ ខែតុលា ហើយមកដល់ល្ងាចថ្ងៃទី២៦ ខែតុលា ប្រជាពលរដ្ឋរួមនឹងអាជ្ញាធរភូមិ បានជួបជុំគ្នាធ្វើការពិសោធដើម្បីចង់ដឹងការពិតថាមានអង្ករប្លាស្ទិកមែនឬអត់ ។
ប្រភពដែលគេនិយាយតៗគ្នាបានឲ្យដឹងថា មានបងប្អូនជនជាតិដើមភាគតិចមួយគ្រួសារ បានទិញអង្ករចំនួន៣បាវស្មើនឹង១៥០គីឡូក្រាម ហើយពេលគាត់យកអង្ករនោះទៅលីងដើម្បីស្លកកូរស្រាប់តែអង្ករនោះផ្ទុះ ។ លុះគាត់យកអង្ករលីងនោះចាក់ទៅលើភ្លើងចង្ក្រាន ស្រាប់តែអង្កររលាយចូលគ្នា ។ ប្រភពបន្តថា បន្ទាប់មកពួកគាត់បានទៅរាយការណ៍ជូនអាជ្ញាធរមូលដ្ឋានពាក់ព័ន្ធទៅនឹងអង្ករដែលគាត់បានទិញខាងលើថាជាអង្ករប្លាស្ទិក ដែលធ្វើឲ្យប៉ះពាល់ដល់សុខភាពពួកគាត់ ។
ដោយសារតែកើតមានបាតុភាពភ្ញាក់ផ្អើលកាន់តែខ្លាំង នៅល្ងាចថ្ងៃទី២៦ ខែតុលា សមត្ថកិច្ចមូលដ្ឋានបានឲ្យគ្រួសារនោះយកអង្ករមកធ្វើតេស្តជាសាធារណៈ ដោយលីងនៅចំពោះមុខប្រជាពលរដ្ឋ ព្រមទាំងអ្នកសារព័ត៌មានផងដែរ តែអង្ករនេះមានលក្ខណៈធម្មតាទេ មិនដូចដែលគ្រួសារនេះបាននិយាយសង្ស័យថា ជាអង្ករប្លាស្ទិកនោះឡើយ ។
លោកមេភូមិពូតាំងបានប្រាប់់អ្នកភូមិកុំឲ្យមានការភ្ញាក់ផ្អើលតទៅទៀត ព្រោះអង្ករនេះក្រោយពីធ្វើការពិសោធទៅបង្ហាញថាជាអង្ករធម្មតាទេ ដូច្នេះនេះគ្រាន់ជាការភាន់ច្រឡំប៉ុណ្ណោះ ធម្មតាអង្ករយកទៅលីងតែងតែផ្ទុះអុីចឹងហើយ ។
ទោះជាយ៉ាងណាក៏ដោយ ករណីខាងលើនេះ លោក ចាន់ វាសនា ប្រធានសាខាកាំកុងត្រូលខេត្ត អ្នកយកព័ត៌មាននៅមិនទាន់ទទួលបានការបំភ្លឺនៅឡើយទេ នៅព្រឹកថ្ងៃទី២៧ ខែតុលា ៕
ចែករំលែកព័តមាននេះ