ភ្នំពេញ៖ គ.ជ.ប បានចេញសេចក្ដីណែនាំ ស្ដីពី ការពង្រឹងសន្តិសុខ សណ្ដាប់ធ្នាប់ និងរបៀបរៀបរយ ក្នុងការិយាល័យបោះឆ្នោត និងការិយាល័យរាប់សន្លឹកឆ្នោត ក្នុងដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ នៅថ្ងៃអាទិត្យ ទី៥ ខែមិថុនា ឆ្នាំ២០២២។ ក្នុងនោះ អ្នកដែលមិនមានសិទ្ធិ ចូលក្នុងការិយាល័យបោះឆ្នោត និងរាប់សន្លឹកឆ្នោត រួមទាំងបរិវេណខាងក្នុងការិយាល័យបោះឆ្នោត ត្រូវទទួលពិន័យ តាមមាត្រា ១៧១ នៃច្បាប់រៀបចំការបោះឆ្នោតឃុំសង្កាត់ ដោយការផាកពិន័យជាប្រាក់ពី ៥លានរៀល ទៅ ២០លានរៀល ដោយពុំទាន់គិតដល់ទោសព្រហ្មទណ្ឌផ្សេងទៀត។
តាមសេចក្តីណែនាំ អ្នកដែលមានសិទ្ធិចូលក្នុងការិយាល័យបោះឆ្នោត រួមមាន៖ មន្ត្រីបោះឆ្នោត ដែលបានទទួលការតែងតាំងពីគ.ជ.ប ភ្នាក់ងារគណបក្សនយោបាយ ដែលមានបេក្ខជនឈរឈ្មោះ និងដែលបានអនុញ្ញាត និងអ្នកសង្កេតការណ៍ ដែលមានប័ណ្ណសម្គាល់ផ្តល់ឱ្យដោយគ.ជ.ប អ្នកសារព័ត៌មាន ដែលមានប័ណ្ណសម្គាល់ផ្តល់ដោយគ.ជ.ប។ ក្នុងករណី គ្មានប័ណ្ណសម្គាល់អនុញ្ញាត អ្នកសារព័ត៌មានអាចចូលក្នុងការិយាល័យបោះឆ្នោត ដើម្បីគោលបំណងបោះឆ្នោតតែប៉ុណ្ណោះ ប្រសិនបើគាត់មានឈ្មោះបោះឆ្នោត នៅការិយាល័យបោះឆ្នោតនោះ។ អ្នកដែលមានសិទ្ធិបោះឆ្នោត ហើយត្រូវបោះឆ្នោតនៅការិយាល័យបោះឆ្នោតនោះ។ ជនដែលអមដំណើរអ្នកបោះឆ្នោតជាជនមានពិការភាព តាមលក្ខខណ្ឌដូចមានចែងក្នុងមាត្រា ១១៦ នៃច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំសង្កាត់។ ភ្នាក់ងារសន្តិសុខបោះឆ្នោត និងភ្នាក់ងារសង្គ្រោះ នៅពេលដែលប្រធានគ.ក.ប ធ្វើសំណូមពរ ក្នុងករណីចាំបាច់។
ចំណែកអ្នកដែលមានសិទ្ធិចូលក្នុងការិយាល័យរាប់សន្លឹកឆ្នោត ត្រូវបានគ.ជ.ប ប្រកាសថា មន្ត្រីរាប់សន្លឹកឆ្នោត ដែលបានទទួលការតែងតាំងពីគ.ជ.ប ភ្នាក់ងារគណបក្សនយោបាយ ដែលមានបញ្ជីបេក្ខជនឈរឈ្មោះ និងដែលបានអនុញ្ញាត អ្នកសង្កេតការណ៍ និងអ្នកសារព័ត៌មាន ដែលមានប័ណ្ណសម្គាល់ផ្តល់ឱ្យដោយ គ.ជ.ប និងភ្នាក់ងារសន្តិសុខបោះឆ្នោត និងភ្នាក់ងារសង្គ្រោះ នៅពេល ដែលប្រធាន គ.ក.រ ធ្វើសំណូមពរក្នុងករណីចាំបាច់៕
ចែករំលែកព័តមាននេះ