រាជធានីភ្នំពេញ ៖ តារាសម្តែងលោក សាវីន ហ្វីលីព បានប្រកាសថា ខ្លួនមានជំងឺស្ត្រេស្ដធ្ងន់ បន្ទាប់ពីរូបលោកត្រូវក្រុមគ្រួសារបញ្ជូនទៅកាន់មន្ទីរពេទ្យ ដើម្បីសង្គ្រោះបន្ទាន់ជាលើកទីពីរក្រោយអាការជំងឺធ្វើទុក្ខខ្លាំង ។
ក្រោយពីបានទទួលការព្យាបាលពីក្រុមគ្រូពេទ្យនៅកាលម៉ែតអាការជំងឺលោកសាវីន ហ្វីលីព បានធូរស្បើយបន្តិច ជំងឺបេះដូងរបស់លោកគឺបណ្តាលមកពីឈាមឡើងខ្លាំង ក្នុងនោះមូលហេតុគឺលោកបានកើតជំងឺស្ត្រេស្ដធ្ងន់ ។
តាមរយៈវីដេអូឃ្លីបកាលពីពេល ថ្មីៗកន្លងមកលោកសាវីន ហ្វីលីព បានអះអាងថា រហូតមកដល់ពេលនេះអាការជំងឺរបស់លោកបានធូរស្បើយបន្តិច ហើយលោកបានចេញពីមន្ទីរពេទ្យទៅសម្រាកព្យាបាលនៅផ្ទះបន្តទៀត ។ ជំងឺរបស់លោកត្រូវគ្រូពេទ្យអះអាងថា កើតជំងឺស្ត្រេស្ដធ្ងន់ ហើយក្រុមគ្រូពេទ្យបានស្នើឲ្យលោកសម្រាកឲ្យបានច្រើន កុំធ្វើការច្រើនពេក និងកុំគិតច្រើន ។
បើតាមលោកសាវីន ហ្វីលីព ជំងឺរបស់លោកមិនមែនកើតឡើងដោយសារការញាំុហ្វឺនៅភោនីយដ្ឋានទសវត្សទី៦០ដូចការលើកឡើងពីមនុស្សមួយចំនួនឡើយ ព្រោះតាមការបញ្ជាក់ពីក្រុមគ្រូពេទ្យសុខភាពរបស់លោកចាប់ផ្តើមចុះខ្សោយ ដោយសារតែលោកមិនបានគេងគ្រប់គ្រាន់ ជាហេតុធ្វើឲ្យឈាមឡើងបុកដល់បេះដូង ។
លោក សាវីន ហ្វីលីព បានថ្លែងអំណរគុណដល់ក្រុមគ្រូពេទ្យនៅមន្ទីរពេទ្យកាលម៉ែត ដែលបានយកចិត្តទុកដាក់ ខិតខំព្យាបាលជំងឺរបស់លោក បើមិនដូច្នេះទេរូបលោកមិនដឹងទៅជាយ៉ាងណាទេ ហើយរូបលោកអរគុណដល់មិត្តភក្តិសិល្បៈ និងទស្សនិកជនដែលបានមកសួរសុខទុក្ខ និងផ្ញើសារជូនពរដល់រូបលោកផងដែរ ។
តារាសម្តែងលោកសាវីន ហ្វីលីព ត្រូវក្រុមគ្រួសារបញ្ជូនទៅសង្គ្រោះបន្ទាន់នៅមន្ទីរពេទ្យកាលម៉ែតជាលើកទីពីរ បន្ទាប់ពីលោកបានរើឡើងវិញនូវជំងឺបេះដូង និងផ្លូវដង្ហើមដ៏គួឲ្យព្រួយបារម្ភជាទីបំផុត កាលពីយប់ថ្ងៃទី២៤ ខែតុលា ឆ្នាំ២០១៦ ។
បន្ទាប់ពីទទួលការព្យាបាលពីក្រុមគ្រូពេទ្យជំងឺរបស់លោកសាវិន ហ្វីលីព បានធូរស្រាល។ ទោះជាយ៉ាងណាក្ដី ទាំងលោកសាវិន ហ្វីលីព និងក្រុមគ្រួសារបានសម្តែងការបារម្ភខ្លាំងពីអាការជំងឺរបស់លោកនាពេលនេះ ៕
ចែករំលែកព័តមាននេះ