រាជធានីភ្នំពេញ ៖ រថយន្តដឹកកម្មករកម្មការិនីរោងចក្រកាត់ដេរ ម៉ាកហ៊ីយ៉ាន់ដាយមួយគ្រឿង បានបើកជែងតាមដងផ្លូវក៏រេចង្កូតក្រឡាប់កណ្តាលទ្រូងផ្លូវ
រាជធានីភ្នំពេញ ៖ រថយន្តដឹកកម្មករកម្មការិនីរោងចក្រកាត់ដេរ ម៉ាកហ៊ីយ៉ាន់ដាយមួយគ្រឿង បានបើកជែងតាមដងផ្លូវក៏រេចង្កូតក្រឡាប់កណ្តាលទ្រូងផ្លូវ និងអូសប្រមាណជិត៤០ម៉ែត្រ បណ្តាលឱ្យកម្មការិនីរងរបួសធ្ងន់ និងស្រាលចំនួន៧២នាក់ រដូករណែលពេញផ្លូវ ។
ហេតុការណ៍ក្រឡាប់រថយន្តដឹកកម្មករនេះ បានកើតឡើងកាលពីវេលាម៉ោង៦និង២០នាទីព្រឹកថ្ងៃទី២៧ តុលា នៅតាមបណ្ដោយផ្លូវជាតិលេខ៦ ចន្លោះស្ពានលេខ៨ និងលេខ៩ មុខអតីតស្នាក់ការគណបក្សហ្វ៊ីនស៊ិនប៉ិចស្ថិតនៅក្នុង ភូមិក្ដីចាស់ សង្កាត់បាក់ខែង ខណ្ឌជ្រោយចង្វា។ រថយន្តដែលជួបគ្រោះថ្នាក់នោះម៉ាកហ៊ីយ៉ាន់ដាយ ចំណុះ២តោនកន្លះ ពណ៌ស ពាក់ស្លាកលេខ ភ្នំពេញ 3C-5727 បើកបរដោយបុរសម្នាក់ដែលគេអះអាងថា ទើបតែរៀនបើកបរបានប្រមាណ២ខែបានរត់គេចខ្លួន ។
តាមកម្មការិនីកាត់ដេរបានឱ្យដឹងថា នៅព្រឹកថ្ងៃកើតហេតុ រថយន្តខាងលើបានដឹកកម្មករ-កម្មការិនីទាំងអស់ចំនួន៨៣នាក់ ឈរណែនដូចឈើគូស ដែលរស់នៅភូមិថ្មី ភូមិស្វាយអំពារ និងភូមិអន្លង់ស្លែង ឃុំសំបួរមាស ស្រុកមុខកំពូល ខេត្តកណ្ដាល ធ្វើដំណើរមកធ្វើការនៅរោងចក្រកាត់ដេរ យូឌីអេស ដែលមានទីតាំងស្ថិតនៅតាមផ្លូវជាតិលេខ៦ ត្រង់ស្ពានទី៦ ក្នុងសង្កាត់ព្រែកលៀប ។
នៅពេលធ្វើដំណើរមកដល់ចំណុចកើតហេតុ រថយន្តក៏បានបើកជែងខាងឆ្វេងម៉ូតូកង់បីមួយគ្រឿង ក៏បានជ្រុលចង្កូតប្រុងទៅបុកខឿនសួនច្បារខណ្ឌចែកទ្រូងផ្លូវ ហើយអ្នកបើកបរ ក៏បានទាញចង្កូតមកស្តាំវិញ បណ្ដាលឲ្យរេចង្កូតបោកខ្លួនក្រឡាប់រថយន្តអូសប្រមាណជិត៤០ម៉ែត្រ បណ្ដាលឲ្យកម្មករ-កម្មការិនីរងរបួសធ្ងន់ និងស្រាលរដូករណែលពេញទ្រូងផ្លូវតែម្តង ។ បន្ទាប់ពីកើតមានគ្រោះថ្នាក់អ្នកបើកបរបានរត់គេចខ្លួនបាត់ ចំណែកកម្មករ-កម្មការិនីដែលរងរបួសត្រូវបានរថយន្តសាមុយបញ្ជូនទៅសង្គ្រោះនៅមន្ទីរពេទ្យកាល់ម៉ែត និងមន្ទីរពេទ្យឯកជន ។
តាមការស្រង់ឈ្មោះជនរងគ្រោះរបស់មន្ត្រីបេឡាជាតិរបបសន្តិសុខសង្គម(ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា កម្មករ-កម្មការិនីដែលរងគ្រោះថ្នាក់ក្នុងការធ្វើដំណើរមានចំនួន ៧២នាក់ ។ នៅក្នុងចំណោមកម្មករ-កម្មការិនីដែលរងរបួសទាំង ៧២នាក់ មាន៤៣នាក់ បានរងរបួសធ្ងន់ ដែលក្នុងនោះមាន៣នាក់ ប្រឈមមុខនឹងការចូលវះកាត់ និង២៩នាក់ទៀតបានរងរបួសស្រាល ។
តាមមន្ត្រីរូបនោះបានឱ្យដឹងទៀតថា រាល់ការសម្រាកព្យាបាលរបស់កម្មករ-កម្មការិនី ដែលរងគ្រោះថ្នាក់ ខាងបេឡាជាតិរបបសន្តិសុខសង្គម(ប.ស.ស) ជាអ្នកធានារ៉ាប់រង ក្នុងការព្យាបាល ។ បើសិនជាកម្មករ-កម្មការិនីសម្រាកព្យាបាលចាប់ពី២ថ្ងៃឡើងទៅនឹងបានប្រាក់ឧបត្ថម្ភបន្ថែមទៀត ។
ដោយឡែករថយន្តដែលគ្រោះថ្នាក់ ត្រូវបានសមត្ថកិច្ចនគរបាលស្ទូចបញ្ជូនទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីដោះស្រាយតាមផ្លូវច្បាប់ ។
នៅរសៀលថ្ងៃដដែលក្រសួងការងារ និងបណ្តុះបណ្តាលវិជ្ជាជីវៈបានចេញសេចក្តីប្រកាសពីឧបទ្ទវហេតុគ្រោះថ្នាក់ចរាចរណ៍នេះដោយសាររថយន្តដឹកកម្មករបើកគេចម៉ូតូ រឺុម៉កម៉ូតូ និងមនុស្សដើរឆ្លងផ្លូវទើបបណ្តាលឱ្យកាច់ចង្កូតក្រឡាប់ភីងបណ្តាលឱ្យកម្មករ-កម្មការិនីរបួសចំនួន៧២នាក់ ក្នុងនោះរបួសធ្ងន់ចំនួន៤៣នាក់ និងរបួសស្រាលចំនួន ២៩នាក់ ។ ជនរងគ្រោះទាំងអស់បានទទួលការជួយសង្គ្រោះពីសំណាក់អាជ្ញាធរមានសមត្ថកិច្ច និងមន្ត្រីបេឡាជាតិរបបសន្តិសុខសង្គមនៃក្រសួងការងារ និងបណ្តុះបណ្តាលវីជ្ជាជីវៈ ដោយយកចិត្តទុកដាក់បំផុត ។ គិតត្រឹមម៉ោង១០ព្រឹកថ្ងៃទី២៧ តុលា កម្មករ-កម្មការិនីរងរបួសចំនួន៦៣នាក់(ធ្ងន់ចំនួន៤៣នាក់) បាននិងកំពុងសម្រាកព្យាបាលនៅមន្ទីរពេទ្យកាល់ម៉ែត និងចំនួន៩នាក់ សម្រាកព្យាបាលនៅប៉ូលីគ្លីនិកសុខលាភមេត្រី ៕
ចែករំលែកព័តមាននេះ