រាជធានីភ្នំពេញ ៖ បុរសស្រវឹងស្រាបើករថយន្តដឹកស្រីស្នេហ៍ពីរនាក់ក្នុងល្បឿនយ៉ាងលឿន លុះមកដល់ផ្លូវបំបែកក៏ជ្រុលទៅបុកម៉ូតូដែលជិះគ្នា៣នាក់ ដោយអូសម៉ូតូក្រោមរថយន្តជិត១០០ម៉ែត្រ បណ្តាលឱ្យមនុស្សរងរបួសធ្ងន់២នាក់ និងស្រាលម្នាក់ ហេតុការណ៍នេះ កើតឡើងកាលពីវេលាម៉ោង១២ និង៣០នាទីរំលងអធ្រាត្រ ឈានចូលថ្ងៃទី២៨ តុលា ស្ថិតនៅចំណុចផ្លូវ៣៦០ កែងផ្លូវ១០៥ ក្នុងសង្កាត់បឹងកេងកង៣ ខណ្ឌចំការមន ។
ប្រភពព័ត៌មានពីកន្លែងកើតហេតុឱ្យដឹងថា គេឃើញបុរស៣នាក់ (មានអាយុប្រហែល២០ឆ្នាំ) ជិះម៉ូតូម៉ាកវ៉េវ ពណ៌ខ្មៅ អត់មានស្លាកលេខ ធ្វើដំណើរតាមផ្លួវលេខ១០៥ ក្នុងទិសដៅពីជើងទៅត្បូង ខណៈមកដល់ចំណុចកើតហេតុ ដែលជាផ្លូវបំបែកជាបួនស្រាប់តែជួបរថយន្តម៉ាកឡិចស៊ីស៤៧០ ពណ៌ទឹកមាស ពាក់ស្លាកលេខភ្នំពេញ2S-1727 បើកបរដោយបុរសម្នាក់ឈ្មោះផាន
សុផាត អាយុ៣៩ឆ្នាំ ជាបុគ្គលិកក្រុមហ៊ុនឯកជន ស្នាក់នៅផ្ទះលេខ១៦៨ ផ្លូវជាតិលេខ២ ភូមិព្រែកកាត់ សង្កាត់តក្តុល ក្រុងតាខ្មៅ ខេត្តកណ្តាល ។
នៅក្នុងរថយន្តឃើញបានដឹកមនុស្សស្រី២នាក់ ដែលត្រូវគេដឹងថា ទើបចេញពីច្រៀងខារ៉ាអូខេកូរ៉ូស្សូ បានធ្វើដំនើរតាមផ្លូវ៣៦០ ក្នុងទិសដៅពីកើតទៅលិច ក្នុងល្បឿនលឿននិងស្រវឹងផង ក៏ជ្រុលទៅបុកម៉ូតូដែលជិះគ្នា៣នាក់យ៉ាងពេញទំហឹង ហើយអូសម៉ូតូនិងមនុស្សក្រោមរថយន្តជិត១០០ម៉ែត្រ ទាល់តែរថយន្តទៅមុខរួចទើបឈប់ ធ្វើឱ្យអ្នកជិះម៉ូតូអ្នកបើកម៉ូតូរងបួសបែកក្បាលហូរឈាម និងអ្នកអង្គុយខាងក្រោយរងរបួសបាក់ជើងស្តាំទាំងពីនាក់ ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិក សុខលាភមេត្រី និងអ្នកអង្គុយកណ្ដាលរងរបួសបាក់ដៃខាងស្ដាំ ត្រូវបានរថយន្តសង្គ្រោះដឹកយកទៅសង្គ្រោះនៅគ្លីនិកហុង ហាក់ ចំណែកម៉ូតូរងកាខូចខាតខ្ទេចខ្ទីស្ទើរតែទាំងស្រុង ។
ដោយឡែក រថយន្តបង្កបានរងកាខូចខាតក្រពិតផ្នែកខាងមុខនិងបែកកង់ខាងស្ដាំ ចំណែកអ្នកបើកបរអត់មានរងរបួសនោះទេ ហើយ ភ្លាមៗនោះ អ្នកបើកថយន្តបង្ក ត្រូវបានសមត្ថកិច្ចឃាត់ខ្លួនទៅប៉ុស្តិ៍នគរបាលបឹងកេងកង៣ ។
ក្រោយពេលកើតហេតុ រថយន្តបង្កនិងម៉ូតូព្រមទាំងអ្នកបើក ត្រូវបានខាងសមត្ថកិច្ចជំនាញមកវាស់វែងរួចស្ទួចយកទៅរក្សាទុកនៅការិយាល័យចរាចរណ៍រាជធានីភ្នំពេញ ដើម្បីធ្វើការដោះស្រាយ ៕
ចែករំលែកព័តមាននេះ