ខេត្តឧត្តរមានជ័យ ៖ រឿងរ៉ាវដែលកុមារប្រុសស្រី៣នាក់កំព្រាឪពុកម្ដាយ បន្ទាប់ពីសមត្ថកិច្ចបានឃាត់ខ្លួន ឪពុកម្តាយទៅតុលាការធ្វើឱ្យក្មេងតូចៗ រស់នៅក្រោមដំបូលផ្ទះ តែគ្មានមេបាគ្រប់គ្រងចិញ្ចឹមបីបាច់ថែរក្សា ដែលសព្វថ្ងៃជីវភាពរស់នៅគឺពឹងផ្អែកទៅលើអ្នកជិតខាងជួយផ្គត់ផ្គង់ម្ហូបអាហារ។ កុមារីឈ្មោះ ភឹម លាងហេង អាយុ១៤ឆ្នាំ សព្វថ្ងៃរស់នៅភូមិជាំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ បានរៀបរាប់ថា ក្រោយពីឪពុកម្ដាយត្រូវសមត្ថកិច្ចចាប់ខ្លួន រហូតដល់ពេលនេះ មានរយៈពេលជាង១ខែមកហើយ ដែលការហូបចុកប្រចាំថ្ងៃគឺពឹងលើអង្ករ និងលុយកាក់បន្តិចបន្តួច ដែលសល់ពីឪពុកម្ដាយមុនគេចាប់ខ្លួន។
ហើយម្យ៉ាងទៀត ខ្លួនកំពុងតែរៀនថ្នាក់ទី៧ នៅអនុវិទ្យាល័យត្រពាំងប្រិយ៍ ក៏ត្រូវឈប់រៀន ដោយត្រូវមកថែទាំប្អូនៗពីរនាក់ជំនួសម្តាយ ដែលប្អូនស្រីឈ្មោះ ភឹម សុផាន់ណា អាយុ៥ឆ្នាំ និងប្អូនប្រុសឈ្មោះ ភឹម សុភត្ត្រា ដែលអាយុទើបតែបាន២ខួបប៉ុណ្ណោះ។ កុមារី ភឹម លាងហេង ក៏បានរៀបរាប់ទាំងទឹកភ្នែកពីផលលំបាកនៃការមើលថែទាំប្អូនៗជំនួសម្ថាយទាំងយប់ទាំងថ្ងៃ ហើយខ្លួនត្រូវបាត់បង់ការសិក្សា និងពុំមានកម្លាំងគ្រប់គ្រាន់ទៅស៊ីឈ្នួលគេ ឬទៅធ្វើការផ្សេងៗក្នុងការចិញ្ចឹមប្អូនបានទេ ដោយខ្លួនទទូចស្នើសុំឱ្យស្ថាប័នពាក់ព័ន្ធ មេត្តាជួយដោះលែងម្ដាយមកវិញ ព្រោះសព្វថ្ងៃជីវភាពគ្រួសារបងប្អូនក្មេង៣នាក់ មិនដឹងពឹងផ្អែកទៅខាងណានោះទេ។
បងស្រីឈ្មោះ អន សុភាព អាយុ៤៨ឆ្នាំ ជាអ្នកជិតខាងរស់នៅភូមិជាំ ឃុំត្រពាំងប្រិយ៍ ស្រុកអន្លង់វែង ខេត្តឧត្តរមានជ័យ បានឱ្យដឹងថា រាល់ថ្ងៃគាត់មានការអាណិតអាសូរក្មេងទាំង៣នាក់ណាស់ ចាប់តាំងពីម្ដាយឪពុកមិននៅ គាត់តែងតែឆ្លៀតពេលទាំងយប់ទាំងថ្ងៃទៅមើលក្មេង ព្រោះនៅក្បែរផ្ទះក្មេងៗនោះពុំមានមនុស្សនៅទេ។ ហើយនៅពេលខ្លះគាត់ជាប់រវល់នឹងការងាររកស៊ីខ្លួនឯង ក៏មិនបានយកបាយម្ហូបទៅឱ្យក្មេងក៏មានដែរ។
គួរបញ្ជាក់ថា ឪពុកម្ថាយក្មេងទាំង៣នាក់ ខាងលើឈ្មោះ ជា ភឿន ហៅទីន ជាប្តីអាយុ៣៩ឆ្នាំ និងប្រពន្ទឈ្មោះ ប៉ិច មុំ អាយុ៣៥ឆ្នាំ ត្រូវកម្លាំងអធិការនគរបាលស្រុកអន្លង់វែង ធ្វើការឃាត់ខ្លួនតាមដីកាចាប់ខ្លួនរបស់ចៅក្រមស៊ើបសួរ លោក អ៊ាក ផល្លា និងបានបញ្ជូនទៅតុលាការកាលពីថ្ងៃទី១០ ខែតុលា ឆ្នាំ២០១៦៕
ចែករំលែកព័តមាននេះ