យប់មិញ ! ភ្លៀងលាយខ្យល់កន្ត្រាក់បំផ្លាញផ្ទះអស់១០០ខ្នង
ខេត្តត្បូងឃ្មុំ ៖ ព្រះភិរុណបានបង្អុរធ្លាក់ចុះមកយ៉ាងខ្លាំងដោយបានលាយឡំខ្យល់កន្ត្រាក់ផងនោះបានបក់បោកកាលយប់ថ្ងៃទី២៦ ខែតុលា ឆ្នាំ២០១៦ បណ្តាលឲ្យលំនៅឋាន …
ខេត្តត្បូងឃ្មុំ ៖ ព្រះភិរុណបានបង្អុរធ្លាក់ចុះមកយ៉ាងខ្លាំងដោយបានលាយឡំខ្យល់កន្ត្រាក់ផងនោះបានបក់បោកលើឃុំតំបែរ ឃុំគោកស្រុក ស្រុកតំបែរ ស្រុកមេមត់ ស្រុកត្បូងឃ្មុំ ព្រមទាំងស្រុកអូររាំងឪ កាលយប់ថ្ងៃទី២៦ ខែតុលា ឆ្នាំ២០១៦ បណ្តាលឲ្យលំនៅឋានរបស់ប្រជាពលរដ្ឋរងការខូចខាតរហូតដល់ទៅ១០០ខ្នង ព្រមទាំងរបូតខ្សែកាបជាច្រើនកន្លែង តែមិនមានពលរដ្ឋណាម្នាក់បានរងគ្រោះថ្នាក់ដល់អាយុជីវិតទេ ហើយខាងកាកបាទក្រហមខេត្តក៏នឹងត្រៀមអំណោយយកទៅចែកជូនដល់ពួកគាត់ផងដែរ ។
លោកវរសេនីយ៍ត្រី ប៉េង អេងហាក់ អធិការនគរបាលស្រុកតំបែរ ប្រាប់ឲ្យដឹងថា ភូមិដែលត្រូបានភ្លៀងធ្លាក់មកលើនោះរួមមានភូមិតំបែរ ភូមិជ័យសម្បត្តិ ភូមិសញ្ជ័យសែន ភូមិថ្នល់ ក្នុងឃុំតំបែរ ដែលបានលាយឡំទៅដោយខ្យល់កន្ត្រាក់បោកបក់យ៉ាងខ្លាំង និងមិនធ្លាប់មាននាពេលកន្លងមកនោះទេ ដោយបានធ្វើឲ្យលំនៅឋានរបស់ប្រជាពលរដ្ឋជាច្រើនខ្នងបានទទួលរងការខូចខាត ។
លោកវរសេនីយ៍ត្រី ប៉េង អេងហាក់ ប្រាប់បន្តថា ផ្ទះដែលរងការខូចខាតធ្ងន់មានចំនួន២៦ខ្នង ខូចខាតស្រាលចំនួន៣៨ខ្នង បង្គោលភ្លើង១ដើមបាក់រាបដល់ដី ដួលស្លាកគណបក្ស៤ផ្ទាំង ដួលដើមឈើ និងផលដំណាំក្នុងភូមិអស់មួយចំនួនធំ ។ ទឹកភ្លៀងនេះបង្កឲ្យលិចប៉ះពាល់ផលដំណាំស្ទើរគ្រប់ភូមិតែម្តង ។ តាមការសង្កេតចាប់តាំងពីដើមរហូតមកភ្លៀងខ្យល់កន្ត្រាក់មិនដែលមានសភាពធ្ងន់ធ្ងរដូចខាងលើនោះទេ ដែលនេះជាគ្រោះមហន្តរាយមួយតែសំណាងមិនបណ្តាលឲ្យពលរដ្ឋណាម្នាក់រងគ្រោះដល់អាយុជីវិតឡើយ ។
ចំនែកលោក លី ឡេង អភិបាលរងខេត្តត្បូងឃ្មុំ ទទួលបន្ទុកកាកបាទក្រហម មានប្រសាសន៍ឲ្យដឹងដែរថា ចំពោះលំនៅឋានរបស់ប្រជាពលរដ្ឋដែលបានទទួលរងគ្រោះដោយខ្យល់កន្ត្រាក់ក្នុងនោះស្រុកដែលមានសភាពធ្ងន់ធ្ងរជាងគេគឺស្រុកតំបែរ មានចំនួន៧០ខ្នង ស្រុកមេមត់មាន២៤ផ្ទះ រួមនិងស្រុកត្បូងឃ្មុំ ស្រុកអូររាំងឪ កើនដល់ទៅ១០០ខ្នង ។ ជាមួយនោះរូបលោកក៏បានឲ្យសហការីចុះតាមមូលដ្ឋានព្រមទាំងបានកត់ត្រា ដើម្បីត្រៀមចែកអំណោយដល់ពួកគាត់ទៅតាមទំហំដែលទទួលរងការខូចខាត យ៉ាងយូរនឹងចែកនៅថ្ងៃអាទិត្យ ឫថ្ងៃចន្ទខាងមុខដែលជាអំណោយមនុស្សធម៌របស់កាកបាទក្រហម ៕
ចែករំលែកព័តមាននេះ