រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានចោទជាសំនួរថា រឿងគប់ស្បែកជើងមកលើរូបសម្តេច តើសហរដ្ឋអាមេរិកយល់ថា នេះជាសិទ្ធិបញ្ចេញមតិ ឬក៏ហិង្សា ? បើអាមេរិកចាត់ទុកថា ជាសិទ្ធបញ្ចេញមតិមែននោះ នៅលើពិភពលោកនេះ លែងមានច្បាប់ទម្លាប់ត្រឹមត្រូវទៀតហើយ ។
សម្តេចតេជោ ហ៊ុន សែន មានប្រសាសន៍បែបនេះ នៅក្នុងពិធីសំណេះសំណាលជាមួយក្រុមគ្រូពេទ្យស្ម័គ្រចិត្តយុវជនសម្តេចតេជោ ហៅកាត់ (TYDA) នាព្រឹកថ្ងៃទី១៧ ខែធ្នូ ឆ្នាំ២០២២ ធ្វើឡើងនៅសាលពិព័រណ៍ជ្រោយចង្វា រាជធានីភ្នំពេញ ។
សម្តេចតេជោ ហ៊ុន សែន មានប្រសាសន៍ថា នៅពេលបុរសនោះ គប់ស្បែកជើងរួចភ្លាម បើសិនជាសម្តេចតេជោបណ្ដោយ អ្នកគប់រូបនោះអាចមានគ្រោះថ្នាក់ហើយ ព្រោះកម្លាំងផ្ទាល់ខ្លួន រួមទាំងកម្លាំងនៅអាម៉េរិក និងពីទីក្រុងភ្នំពេញ អាចធ្វើសកម្មភាពបានភ្លាម ប៉ុន្តែសម្ដេចតេជោ បានហាមពួកគេមិនឲ្យធ្វើសកម្មភាពឡើយ ។
សម្តេចតេជោ ហ៊ុន សែន សង្កត់ធ្ងន់ថា កម្លាំងគាំទ្រសម្ដេចនៅទីក្រុងភ្នំពេញ បានរៀបចំសកម្មភាពទៅតវ៉ានៅមុខស្ថានទូតអាម៉េរិកប្រចាំកម្ពុជា ប៉ុន្តែសម្ដេចបានបញ្ជាឲ្យពួកគេ កុំធ្វើអ្វីទាំងអស់ ! នៅអាមេរិកឯណោះ ក៏អត់ឲ្យធ្វើអី នៅភ្នំពេញឯនេះ ក៏អត់ឲ្យធ្វើអី ។
សម្តេចតេជោ ហ៊ុន សែន បានជូនសារឲ្យពិចារណាទៅលើទិដ្ឋាភាពច្បាប់ និងនយោបាយ យ៉ាងដូច្នេះថា ៖ កុំភ្លេចថា ភាគីអាមេរិកខ្លួនឯង ដែលជាអ្នកទទួលខុសត្រូវលើសន្តិសុខ តើទង្វើគប់បែបនេះ ដោយមានការប៉ុនប៉ងច្បាស់លាស់ (តាំងពីនៅកូរ៉េខាងត្បួង) តើអាមេរិកចាត់ទុកថា នេះជាសិទ្ធិបញ្ចេញមតិ ឬជាអំពើហិង្សា ? អាមេរិកត្រូវគិតឲ្យច្បាស់លើចំណុចនេះ ។ សង្ឃឹមថា ទូតអាមេរិកនៅភ្នំពេញនឹងបញ្ជូនសារនេះ ទៅកាន់រដ្ឋបាលអាមេរិក ។ រឿងនេះមិនមែនជារឿងតូចតាចទេ បើជាសិទ្ធបញ្ចេញមតិនោះ នៅលើពិភពលោកនេះគ្មានច្បាប់ទម្លាប់ទេ ហើយនៅកម្ពុជាក៏អញ្ចឹងដែរ នេះមិនមែនការគំរាមទេ តែជាការជម្រាបជូន ។
ក្នុងន័យនេះ សម្តេចតេជោ មិនទាមទារឲ្យអាម៉េរិកដាក់ទោសបុគ្គលគប់សម្ដេចនោះទេ ប៉ុន្តែបើច្បាប់អាមេរិក មានការចែងបែបនោះ ក៏សម្រេចតាមច្បាប់អាមេរិក ។ បើសិនច្បាប់អាមេរិកដាក់ទោសបុគ្គលនោះ ហើយបុគ្គលនោះ អាចនឹងត្រូវបណ្តេញចេញពីអាមេរិក មកកម្ពុជា នោះយើងមិនអាចធានាបានទេ អំពីសុវត្ថិភាពរបស់គាត់ ។
តែយ៉ាងណា តាមការស្មានរបស់សម្តេចតេជោ មិនមែនអាមេរិកគេអត់យកចិត្តទុកដាក់ទេ គេកំពុងធ្វើការហើយលើរឿងពលរដ្ឋខ្មែរម្នាក់រស់នៅអាម៉េរិក ដែលបានយកស្បែកជើងគប់សម្ដេច នាអំឡុងពេលសម្ដេច ជួបពលរដ្ឋខ្មែរ នៅទីក្រុងវ៉ាស៊ីនតោន ៕
ចែករំលែកព័តមាននេះ