រាជធានីភ្នំពេញ ៖ កម្លាំងអន្តរាគមន៍រាជធានីភ្នំពេញ បានធ្វើការល្បាតក្នុងមូលដ្ឋានក៏ដេញតាមឃាត់ក្មេងទំនើង ដែលជិះម៉ូតូកែច្នៃបំពង់ស៊ីម៉ាំងបំពងសំឡេងរំខានអ្នកដទៃបានចំនួន៨នាក់ និងដកហូតម៉ូតូចំនួន៥គ្រឿង កាលពីវេលាម៉ោង១០ និង១០នាទីយប់ថ្ងៃទី២៦ តុលា ស្ថិតនៅតាមបណ្តោយផ្លូវ២១៧ ត្រង់ចំណុចជិតផ្សារស្ទឹងមានជ័យ ក្នុងសង្កាត់ស្ទឹងមានជ័យ ខណ្ឌមានជ័យ ។
ប្រភពពីកម្លាំងអន្តរាគមន៍រាជធានីភ្នំពេញឱ្យដឹងថា មុនពេលកើតហេតុ កម្លាំងអន្តរាគមន៍ពិសេស បានចេញល្បាតនៅក្នុងមូលដ្ឋានការពារសុវត្ថិភាពជូនប្រជាពលរដ្ឋ និងទប់ស្កាត់បទល្មើសដូចជាឆក់ និងប្លន់កើតឡើងនៅក្នុងមូលដ្ឋាន ខណៈមកដល់ជិតផ្សារស្ទឹងមានជ័យ ក៏ប្រទះឃើញក្មេងទំនើបជិះម៉ូតូដាក់បំពង់ស៊ីម៉ាំងកែច្នៃបំពងសំឡេងលាន់ដូចរន្ទះ ធ្វើឱ្យរំខានដល់ដំណេកប្រជាពលរដ្ឋដែលកំពុងតែដេកលង់លក់ ជាពិសេសស្ត្រីមានផ្ទៃពោះមានការភិតភ័យសំរាកមិនលក់ ក៏ត្រូវបានកម្លាំងសមត្ថកិច្ចដេញតាមឃាត់បានម៉ូតូកែច្នៃបំពង់ស៊ីម៉ាំងនោះបានបន្តបន្ទាប់ចំនួន៥គ្រឿង និងមនុស្សចំនួន៨នាក់ ក្នុងចំណោមម៉ូតូទាំង៥គ្រឿង មានម៉ូតូម៉ាកMSXចំនួន៤គ្រឿង និងម៉ូតូZoomer-X ពណ៌ស អត់មានស្លាកលេខមួយគ្រឿងផងដែរ ។
ក្មេងទំនើងទាំង៨នាក់ និងម៉ូតូកែច្នៃទាំង៥គ្រឿង ត្រូវសមត្ថកិច្ចយកទៅធ្វើការ អប់រំនៅប៉ុស្តិ៍នគរបាលស្ទឹងមានជ័យ និងឱ្យដោះបំពង់ស៊ីម៉ាំងចេញ រួចហើយត្រឡប់ទៅផ្ទះវិញ ។
ចែករំលែកព័តមាននេះ