នគរបាលក្រុងតាខ្មៅ តាមប្រមាញ់ក្រុមចោរឆក់២នាក់តាមផ្លូវបេតុង
- កណ្តាល
នគរបាលក្រុងតាខ្មៅ ដឹកនាំបញ្ជាដោយវរសេនីយ៌ឯក យី វណ្ណដា អធិការ បានបង្ក្រាប និងឃាត់ខ្លួនជនសង្ស័យ២នាក់ ដែលជាមុខសញ្ញា
នគរបាលក្រុងតាខ្មៅ ដឹកនាំបញ្ជាដោយវរសេនីយ៌ឯក យី វណ្ណដា អធិការ បានបង្ក្រាប និងឃាត់ខ្លួនជនសង្ស័យ២នាក់ ដែលជាមុខសញ្ញា
ខេត្តកណ្តាល ៖ នគរបាលក្រុងតាខ្មៅ ដឹកនាំបញ្ជាដោយវរសេនីយ៌ឯក យី វណ្ណដា អធិការ បានបង្ក្រាប និងឃាត់ខ្លួនជនសង្ស័យ២នាក់ ដែលជាមុខសញ្ញាចោរឆក់ កាលពីថ្ងៃទី១៥ ខែឧសភា ឆ្នាំ២០២២ វេលាម៉ោងប្រមាណ១១ព្រឹក នៅតាមផ្លូវបេតុង ភូមិព្រែកហូរកើត១ សង្កាត់ព្រែកហូរ ក្រុងតាខ្មៅ ។
នរគបាលក្រុងតាខ្មៅបានឱ្យដឹងថា ជនរងគ្រោះក្នុងអំពើឆក់នេះឈ្មោះ ទឹម ឃុនណៃ ភេទស្រី អាយុ២៦ឆ្នាំ ទីលំនៅភូមិព្រែកហូរកើត១ សង្កាត់ព្រែកហូរ ជាកម្មការិនីរោងចក្រ ។ រីឯជនសង្ស័យទាំង២នាក់ ម្នាក់ឈ្មោះ សុខ សារ៉ាត់ ភេទប្រុស អាយុ៣១ឆ្នាំ មានទីលំនៅក្នុងភូមិព្រែកឫស្សី សង្កាត់ព្រែកឫស្សី ក្រុងតាខ្មៅ មុខរបរមិនពិតប្រាកដ ជាអ្នកឆក់ និងម្នាក់ទៀតឈ្មោះ កែវ ណាំឈីវ ហៅដារ៉ូ ភេទប្រុស អាយុ២៤ឆ្នាំ ទីលំនៅភូមិក្បាលទំនប់ សង្កាត់បឹងទំពុន២ ខណ្ឌមានជ័យ រាជាធានីភ្នំពេញ មុខរបរមិនពិតប្រាកដ ជាអ្នកបើកម៉ូតូ ។
ប្រភពព័ត៌មានឲ្យដឹងថា ខណៈជនរងគ្រោះកំពុងជិះម៉ូតូទៅផ្ទះដល់់ចំណុចកែងផ្លូវបេតុងទំនប់ឆ្កែឆ្គួត ស្រាប់តែក្រុមជនសង្ស័យខាងលើ ជិះម៉ូតូពីក្រោយមកដល់ទន្ទឹម ហើយធ្វើសកម្មភាពឆក់យកទូរស័ព្ទដែលទុកនៅក្នុងហោប៉ៅខោខាងក្រោយ រួចហើយគេចខ្លួន ។ ភ្លាមនោះ ជនរងគ្រោះបានស្រែកថា «ចោរៗ» ហើយបើកម៉ូតូដេញតាមរហូតដល់ស្ថានីយប្រេងសាំងក្បែហាង B-gold ផ្លូវលេខ១១៥ ស្ថិតក្នុងភូមិព្រែករាំង សង្កាត់កំពង់សំណាញ់ ម៉ូតូរបស់ចោរក៏បុករ៉ឺម៉កម៉ូតូ បណ្តាលឱ្យជនម្នាក់ឈ្មោះ សុខ សារ៉ាត់ ធ្លាក់ពីលើម៉ូតូ និងត្រូវអ្នករស់នៅម្តុំនោះចាប់បាន និងព្រួតវាយរហូតប៉ោងភ្នែកម្ខាង ។
នៅពេលនោះដែរ នគរបាលប៉ុស្តិ៍កំពង់សំណាញ់ និងនគរបាលក្រុងតាខ្មៅ ដែលកំពុងល្បាតតាមផ្លូវឃើញ ក៏ចុះទៅឃាត់ខ្លួន ប៉ុន្តែជនសង្ស័យម្នាក់ទៀតបានលើកម៉ូតូជិះរត់គេចខ្លួនបាត់ទៅ ។ បន្ទាប់មក សមត្ថកិច្ចបានធ្វើការស្រាវជ្រាវ និងសហការជាមួយនគរបាលខណ្ឌមានជ័យ និងនគរបាលប៉ុស្តិ៍បឹងទំពុន២ ធ្វើការឃាត់ខ្លួនជនសង្ស័យម្នាក់ទៀតឈ្មោះ កែវ ណាំឈីវ ហៅដារ៉ូ នៅសង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។
ជនសង្ស័យនិងវត្ថុតាង ត្រូវបានបញ្ជូនទៅកាន់អធិការដ្ឋាននគរបាលក្រុងតាខ្មៅ ដើម្បីសាកសួរនិងកសាងសំណុំរឿងតាមនីតិវិធីច្បាប់៕
ចែករំលែកព័តមាននេះ