ខេត្តសៀមរាប ៖ ករណីក្មេង០២នាក់បានចេញពីផ្ទះនៅខេត្តសៀមរាប បើតាមលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនបទល្មើសព្រហ្មទណ្ឌនៃស្នងការដ្ឋាននគរបាលខេត្តសៀមរាបបានឱ្យដឹងថា បន្ទាប់ពីបានរកឃើញពួកគាត់ទាំង២នាក់វិញ ក៏ធ្វើការសាកសួរលើឈ្មោះហ៊ុន គីមហេង…
ខេត្តសៀមរាប ៖ ករណីក្មេង០២នាក់បានចេញពីផ្ទះនៅខេត្តសៀមរាប បើតាមលោកឧត្តមសេនីយ៍ត្រី ភឹង ចិន្តារ៉េត ស្នងការរងទទួលផែនបទល្មើសព្រហ្មទណ្ឌនៃស្នងការដ្ឋាននគរបាលខេត្តសៀមរាបបានឱ្យដឹងថា បន្ទាប់ពីបានរកឃើញពួកគាត់ទាំង២នាក់វិញ ក៏ធ្វើការសាកសួរលើឈ្មោះហ៊ុន គីមហេង ភេទប្រុស អាយុ១៤ឆ្នាំ (ជាបងប្រុស) របស់ឈ្មោះហ៑ុន វិសាល ភេទប្រុស អាយុ៩ ឆ្នាំឆ្លើយប្រាប់ថា មិនមែនជាករណីចាប់ជំរិតឬក៏ចាប់ចូលក្នុងឡាននោះទេ គឺពួកគេចង់គេចចេញពី
ផ្ទះ ។
លោកឧត្តមសេនីយ៍បន្តថា កាលពីថ្ងៃទី១២ ឧសភា ឆ្នាំ២០២២ ពេលព្រឹក ឈ្មោះ ហ៊ុន គីមហេង បោកកូនជ្រូកសន្សំបានប្រាក់ចំនួនប្រាំបីម៉ឺនប្រាំពាន់រៀល (85000រៀល) និងបានលក់កង់បាន1ម៉ឺនរៀលទៀត ក៏នាំគ្នាទៅទិញសំបុត្ររថយន្តក្រុងដឹកអ្នកដំណើរក្រុមហ៊ុនឈ្មោះ សុគាន់ នៅមុខបុរីសៀងណាំ តម្លៃ២.៥០០០រៀល ហើយជិះទៅក្រុងភ្នំពេញ ហើយចំពោះទូរស័ព្ទវិញ ពួកគេបានដោះស៊ីមក្រវាត់ចោល មិនបានលក់ ឬបាត់ទៅណាទេ ។
លោកបានបន្ថែមទៀតថា ទាំង២នាក់បងប្អូនបានរត់ចេញពីផ្ទះមកដល់រាជធានីភ្នំពេញ នៅយប់ទីមួយ ក្នុងថ្ងៃទី១២ ខែឧសភា នោះ ពួកគេដេកនៅក្នុងវត្តមិនស្គាល់ឈ្មោះ ។ យប់ថ្ងៃទី២ ក្នុងថ្ងៃទី ១៣ ឧសភា បានដេកនៅជិតរូបសំណាក់សម្ដេចតានៅវិមានឯករាជ្យ ក្នុងសង្កាត់ទន្លេបាសាក់ ខណ្ឌដូនពេញ រាជធានីភ្នំពេញ។ នៅយប់ទី៣ និងទី៤ ត្រូវនឹងថ្ងៃទី១៤ និង១៥ ខែឧសភា ឆ្នាំ២០២២ ពួកគេដេកនៅក្រោមស្ពានមួយមិនស្គាល់ឈ្មោះ ។ ចំពោះពេលថ្ងៃឈ្មោះហ៊ុន គីមហេង បានដើររកសុំការងារគេធ្វើ ។
លោកបន្តថា បើតាមលោកបញ្ជាក់ពីមូលហេតុដែលពួកគេគេចចេញពីផ្ទះនោះ គឺដោយសារឈ្មោះហ៊ុន គីមហេង រៀនអត់ចេះហើយប្រលងធ្លាក់ខ្លាចឪពុកម្ដាយស្ដីបន្ទោស ក៏នាំប្អូនគេចចេញពីផ្ទះតែម្តង ។ ចំពោះការបំភ្លឺរបស់ឪពុកម្តាយ ក្មេងប្រុសទាំង២នាក់ ក៏មានការចូលរួម ពីលោកមេភូមិផងដែរ ៕ សូមរំលឹកថា៖ ករណីបាត់ក្មេងប្រុស២នាក់ ពីខេត្តសៀមរាប រកឃើញនៅកោះពេជ្រ រាជធានីភ្នំពេញ
ចែករំលែកព័តមាននេះ