ខេត្តកំពង់ចាម ៖ ផ្ទះឈើប្រក់ក្បឿង១ខ្នងទំហំ៧ម៉ែត្រគុណ១២ម៉ែត្រដែលឪពុកម្តាយខំធ្វើការនៅថៃទិញទុកស្នាក់នៅ ត្រូវបានកូនប្រុសអាយុ១២ឆ្នាំប្រហែសធ្វើឲ្យឆេះខ្ទេច ។ ហេតុការណ៍នេះកើតឡើងកាលពីវេលាម៉ោង១១ និង៣០នាទីព្រឹក ថ្ងៃទី២៧ ខែតុលា ឆ្នាំ២០១៦ នៅភូមិព្រែកព្រះអង្គ ឃុំព្រែកបាក់ ស្រុកស្ទឹងត្រង់ ។
លោកវរសេនីយ៍ទោ ប៉ាក ជាតិ អធិការនគរបាលស្រុកស្ទឹងត្រង់ បានឲ្យដឹងថា ផ្ទះដែលឆេះនោះមានម្ចាស់ឈ្មោះ វុន វឿន អាយុ៣៩ឆ្នាំ មានប្រពន្ធឈ្មោះ រ៉ា អាយុ៣៧ឆ្នាំ ទើបនឹងទិញពីគេទុកឲ្យកូនប្រុសអាយុ១២ឆ្នាំដែលមានសតិមិនល្អនៅតែម្នាក់ឯងចំណែកគាត់២នាក់ប្តីប្រពន្ធទៅធ្វើការរកស៊ីនៅប្រទេសថៃ ។ លុះពេលដាំបាយហូប កូនអាប្រុសមិនប្រយ័ត្នទើបបណ្ដាលឲ្យឆ្លងឆេះខ្ទេចអស់ទាំងស្រុងតែម្តង ។
លោកវរសេនីយ៍ទោ ប៉ាក ជាតិ អធិការនគរបាលស្រុកស្ទឹងត្រង់ ប្រាប់ឲ្យដឹងថា នៅពេលដែលអគ្គិភ័យបានចាប់ផ្តើមឆេះ ប្រជាពលរដ្ឋបានរាយការណ៍ទៅលោកនាយប៉ុស្តិ៍ព្រែកបាក់ដើម្បីហៅរថយន្តពន្លត់អគ្គិភ័យមកជួយអន្តរាគមន៍បាញ់ទឹកពន្លត់ ។ គ្រាន់តែទទួលបានព័ត៌មានពីហេតុការណ៍នេះភ្លាមក៏បានឲ្យរថយន្ត១គ្រឿងដែលប្រចាំការនៅអធិការដ្ឋានស្រុកប្រញាប់ចេញទៅជាបន្ទាន់ តែដោយសារផ្លូវឆ្ងាយទម្រាំតែទៅដល់ផ្ទះឈើបានឆេះយ៉ាងពេញបន្ទុកទៅហើយ បានត្រឹមតែបាញ់ទប់ស្កាត់មិនបានឆេះរាលឆ្លងទៅផ្ទះអ្នកផ្សេងប៉ុណ្ណោះ ។
លោក ទុន ណេត អភិបាលស្រុកស្ទឹងត្រង់ បានប្រាប់ឲ្យដឹងដែរថា ក្នុងពេលដែលមានគ្រោះអគ្គិភ័យខាងលើ រូបលោកបានចុះទៅដល់ ដោយបានឲ្យសមត្ថកិច្ចជួយបាញ់ទឹកអស់២រថយន្តដើម្បីកុំឆ្លងឆេះទៅផ្ទះអ្នកផ្សេងទៀត ។
លោក ទុន ណេត បញ្ជាក់ថា រូបលោកមានគោលការណ៍នឹងនាំយកអំណោយទៅចែកជូនដល់ម្ចាស់ផ្ទះកើតហេតុនេះផងដែរ ៕
ចែករំលែកព័តមាននេះ