រថយន្តបែន២គ្រឿងបុកគ្នាខ្ទេចទាំងសងខាង គាបជាប់អ្នកបើកក្នុងកាប៊ីន
រាជធានីភ្នំពេញ ៖ រថយន្តបែន១គ្រឿងម៉ាក MITSUBISHI បានបោះពួយយ៉ាងលឿនវ៉ារថយន្តដែលកំពុងបើកស្របគ្នានៅខាងមុខជាបន្តបន្ទាប់ជ្រុលចង្កូតទៅបុករថយន្តបែន …
រាជធានីភ្នំពេញ ៖ រថយន្តបែន១គ្រឿងម៉ាក MITSUBISHI បានបោះពួយយ៉ាងលឿនវ៉ារថយន្តដែលកំពុងបើកស្របគ្នានៅខាងមុខជាបន្តបន្ទាប់ជ្រុលចង្កូតទៅបុករថយន្តបែន១គ្រឿងទៀតម៉ាក HYUNDAI ដែលកំពុងបើកបរបញ្ច្រាសគ្នាយ៉ាងពេញទំហឹងបណ្តាលឲ្យអ្នកបើកបររថយន្ត HYUNDAI គាបជាប់នៅក្នុងកាប៊ីនរងរបួសជើងយ៉ាងធ្ងន់ធ្ងរ ។ ឧប្បត្តិហេតុគ្រោះថ្នាក់ចរាចរណ៍នោះបានកើតឡើងកាលពីវេលាម៉ោង៥ និង៣៥នាទីព្រឹក ថ្ងៃទី២៧ ខែតុលា ឆ្នាំ២០១៦ លើកំណាត់ផ្លូវជាតិលេខ៣ ស្ថិតក្នុងភូមិពងទឹក សង្កាត់ពងទឹក ខណ្ឌដង្កោ ។
តាមប្រភពព័ត៌មានបានឲ្យដឹងថា បុរសរងគ្រោះគាបជាប់នៅក្នុងកាប៊ីនរថយន្តនោះឈ្មោះ ប៊ី ឃុន អាយុ៥៥ឆ្នាំ ជាអ្នកបើកបររថយន្តបែនដឹកថ្មកង់៦ម៉ាក HYUNDAI ពណ៌ស ពាក់ស្លាកលេខ ព្រះសីហនុ 3A-3553 មានទីលំនៅក្នុងភូមិស្លែង ឃុំរំពេរ ស្រុកបសេដ្ឋ ខេត្តកំពង់ស្ពឺ ដោយមានយុវជនអ្នករួមដំណើរម្នាក់ទៀតជាព្រូរថយន្តមានឈ្មោះ ជិន សីហា អាយុ១៧ឆ្នាំ ត្រូវជាក្មួយ រស់នៅភូមិ-ឃុំជាមួយគ្នា មិនមានរបួសនោះឡើយ ។ ដោយឡែករថយន្ត១គ្រឿងទៀតដែលជាភាគីបង្កប្រភេទបែនកង់៦ដូចគ្នា ពណ៌ស ម៉ាក MITSUBISHI ពាក់ស្លាកលេខ ចង្កូតស្តាំ PP-0176 អ្នកបើកបរមិនស្គាល់អត្តសញ្ញាណទេ ក្រោយកើតហេតុបានគេចខ្លួនបាត់ស្រមោល ។
ប្រភពដដែលបានបន្តឲ្យដឹងទៀតថា មុនកើតហេតុរថយន្តបង្កម៉ាក MITSUBISHI បើកបោះពួយពីជើងទៅត្បូងយ៉ាងលឿនវ៉ារថយន្តដែលកំពុងបើកបរស្របគ្នានៅខាងមុខរួចរេចង្កូតទៅបំណែកផ្លូវម្ខាងទៀតក៏ជ្រុលទៅបុករថយន្តបែនដឹកថ្មម៉ាក HYUNDAI ដែលកំពុងបើកបរធ្វើដំណើរបញ្ច្រាសទិសគ្នាបណ្តាលឲ្យក្បាលរថយន្តទាំង២គ្រឿងគាបជាប់គ្នា និងគាបអ្នកបើកបររថយន្ត HYUNDAI ជាប់ក្នុងកាប៊ីនរងរបួសជើងធ្ងន់ធ្ងរ រីឯអ្នកបើកបររថយន្តបង្កបានគេចខ្លួនបាត់ ចំណែករថយន្តរងការខូចខាតខ្ទេចទាំងសងខាង ។
ក្រោយពេលកើតហេតុជនរងគ្រោះត្រូវបានក្រុមសង្គ្រោះរបស់អង្គភាព៧១១ កងពលតូចលេខ៧០ ប្រើឧបករណ៍ទៅវះកាត់កាប៊ីនរថយន្តទាញយកចេញ រួចដឹកបញ្ជូនទៅកាន់មន្ទីរពេទ្យព្រះកុសុមៈដើម្បីសង្គ្រោះបន្ទាន់ ដោយឡែករថយន្តទាំងពីរគ្រឿងត្រូវបាននគរបាលខណ្ឌដង្កោចុះទៅធ្វើការវាស់វែង និងនាំយកទៅរក្សាទុកនៅអធិការដ្ឋាននគរបាលខណ្ឌរង់ចាំការដោះស្រាយគ្នានៅពេលក្រោយ ៕
ចែករំលែកព័តមាននេះ