ទីក្រុងតូក្យូ-ប្រទេសជប៉ុន ៖ យុវជនកម្ពុជាចំនួន២១រូប ដែលចេញដំណើរទៅទស្សនកិច្ចនៅប្រទេសជប៉ុន កាលពីថ្ងៃទី២៤ តុលា ២០១៦ កន្លងទៅនេះ ហើយនៅក្នុងដំណើរទស្សនកិច្ចកាលពីថ្ងៃទី២៦ តុលា ២០១៦ ក្រុមយុវជនកម្ពុជាទាំងនោះ បានចូលទស្សន កិច្ចនៅតំបន់ឧស្សាហកម្មក្នុងវិស័យដឹកជញ្ជូនរបស់ប្រទេសជប៉ុន និងបានធ្វើឱ្យមានការភ្ញាក់ផ្អើលជាមួយនឹងទំហំសកម្មភាព និងប្រព័ន្ធគ្រប់គ្រងរបស់ជប៉ុន ។
នៅក្នុងដំណើរទស្សនកិច្ចនោះ ក្រុមយុវជនបានទៅទស្សនាផ្ទាល់ពីការលើកដាក់ទំនិញនៅកំពង់ផែយូកូហាម៉ា ។ ក្នុងនោះដែរ ក្រុមការងាររបស់កំពង់ផែនោះ បានបង្ហាញនិងរៀបរាប់ពីដំណើរការនៅក្នុងកំពង់ផែដ៏សំខាន់មួយរបស់ប្រទេសជប៉ុន ដែលអាចចាត់ទុកថាជាកំពង់ផែចំណាត់ថ្នាក់លេខ២នៅក្នុងប្រទេសជប៉ុន ។ កំពង់ផែយូកូហាម៉ា ជាកំពង់ផែសម្រាប់ដឹកទំនិញក្នុងស្រុកផង និងទំនិញចេញចូលប្រទេសផងដែរ ដែលកំពង់ផែនេះ មាននាវាឆ្លងកាត់ចន្លោះពី៥០ ទៅ៦០នាវាក្នុងមួយសប្ដាហ៍ ។
តំណាងកំពងផែយូកូហាម៉ា បានបញ្ជាក់ថា កំពង់ផែនេះក្នុងមួយឆ្នាំ បើគិតជាចំនួនកុងតឺន័រឆ្លងកាត់មានចំនួន ២,៩លានកុងតឺន័រ ក្នុងនោះ មាននាវាមកពីកំពង់ផែ សៀងហៃ ប្រទេសចិន កំពង់ផែនៃបណ្ដាប្រទេសអាស៊ានជាដើម ព្រោះកំពង់ផែយូកូហាម៉ាជាកំពង់ផែទឹកជ្រៅ មានជម្រៅទឹករហូតដល់ ១៣ម៉ែត្រ អាចអោយនាវាធំៗចូលចតបាន ។
លោក សន ធាលីន យុវជនម្នាក់ដែលបានចូលរួមទស្សនកិច្ចនោះដែរបានអោយដឹងថា លោកមានការចាប់អារម្មណ៍ខ្លាំងលើវិស័យដឹកជញ្ជូនរបស់ប្រទេសជប៉ុន ព្រោះវាមានលក្ខណៈទំនើប និងទូលំទូលាយ បើធៀបនឹងប្រទេសកម្ពុជា ជាក់ស្ដែងការរៀបចំនិងបែងចែកទំនិញ មានភាពច្បាស់លាស់ ដែលផ្ដល់នូវសុវត្ថិភាព ជូនអតិថិជន ទាំងក្នុង និងក្រៅប្រទេស ។
លោកបន្តថា តាមការមើលឃើញ កំពង់ផែនរបស់ជប៉ុនមួយនេះ មានទំហំធំ អាចអោយនាវាធំៗចូលចតបាន និងអាចផ្ទុកកុងតឺន័របានច្រើន ខុសប្លែកពីកម្ពុជា ដែលកំពង់ផែននៅមានតូចនៅឡើយ និងមិនអាចអោយនាវាធំៗជាច្រើនចូលចត ក្នុងពេលតែមួយបាន បើសិនជាថ្ងៃអនាគតកម្ពុជា អាចពង្រីកកំពង់ផែខ្លួនបានធំនោះ វានឹងធ្វើអោយវិស័យដឹកជញ្ជូនរបស់កម្ពុជា កាន់តែរីកចម្រើន ងាយស្រួល និងមានតម្លៃថោក ។
លោក សែម សុភា យុវជនតំណាងមកពីកំពង់ផែស្វ័យក្រុងព្រះសីហនុបានអោយដឹងដែរថា តាមអ្វីដែលដែលបានមើលឃើញកំពង់ផែ យូកូហាម៉ាមានឧបករណ៍សម្រាប់លើកដាក់ទំនិញច្រើន ចំណែកកម្ពុជាមានតែពីរប៉ុណ្ណោះ ដូចនេះវាមានលក្ខណៈខុសគ្នាឆ្ងាយ ហើយទំហំផ្ទៃផែរបស់កំពង់ផែយូកូហាម៉ាធំខ្លាំងណាស់ ចឹងហើយអាចអោយវាផ្ទុកកុងតឺន័របានច្រើន ជាពិសេសមាននាវាច្រើនអាចចូលចត ក្នុងពេលតែមួយបាន។
គួរបញ្ជាក់ថា យុវជនកម្ពុជាចំនួន២១ រូបដែលមកទស្សនកិច្ចនៅក្នុងប្រទេសជប៉ុននាពេលនេះ មានមកពីស្ថាប័នផ្សេងៗដូចជា កំពង់ផែស្វយ័តក្រុងភ្នំពេញ កំពង់ផែ ស្វយ័តក្រុងព្រះសីហនុ មកពីក្រសួងសាធារណៈការនិងដឹកជញ្ជូន ពីវិទ្យាស្ថានអភិវឌ្ឍន៍ធនធានកម្ពុជា , អគ្គនាយកដ្ឋានកាំសាប នៃក្រសួងសាធារណៈការ និងដឹកជញ្ជូន , សមាគមរោងចក្រកាត់សម្លៀកបំពាក់ និងស្បែកជើងកម្ពុជា, សហភាពសហពន្ធ័ស្រូវអង្ករ និងតំណាងនិស្សិតមកពីសាកលវិទ្យាល័យផងដែរ ៕
ចែករំលែកព័តមាននេះ