រាជធានីភ្នំពេញ ៖ នៅវេលារសៀលថ្ងៃទី២៨ តុលា ស្អែកនេះ ព្រឹត្តិការណ៍កីឡាជាតិដ៏ធំលើកដំបូងរបស់ប្រទេសកម្ពុជានឹងចាប់ផ្ដើមដំណើរការជាផ្លូវការ បន្ទាប់ពីអត្តពលិកមួយចំនួនបានចាប់ផ្ដើមប្រកួតគ្នាជាបណ្ដើរៗតាំងពីថ្ងៃ
រាជធានីភ្នំពេញ ៖ នៅវេលារសៀលថ្ងៃទី២៨ តុលា ស្អែកនេះ ព្រឹត្តិការណ៍កីឡាជាតិដ៏ធំលើកដំបូងរបស់ប្រទេសកម្ពុជានឹងចាប់ផ្ដើមដំណើរការជាផ្លូវការ បន្ទាប់ពីអត្តពលិកមួយចំនួនបានចាប់ផ្ដើមប្រកួតគ្នាជាបណ្ដើរៗតាំងពីថ្ងៃទី២៥ ខែតុលា ។ ពិធីបើកការប្រកួតជាផ្លូវការនេះ ស្ថិតក្រោមអធិបតីភាពសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានអត្តពលិក និងក្រុមសិល្បៈចម្រុះរហូតដល់ខ្ទង់ពាន់នាក់បង្ហាញខ្លួន ។ ក្នុងនោះអ្នកទស្សនាក៏មានចំនួនមិនក្រោម៦ម៉ឺននាក់ផងដែរ ទើបអ្នកណាៗក៏មើលឃើញថា នេះជាព្រឹត្តិការណ៍ប្រវត្តិសាស្ត្រដ៏ធំនៅកម្ពុជា។
កាន់តែមានការអន្ទះសារទាំងអត្តពលិក និងមហាជនទូទៅបន្ទាប់ពីពិធីបើកសម្ពោធព្រឹត្តិការណ៍កីឡាជាតិលើកដំបូងនៅក្នុងប្រទេសកម្ពុជា ត្រូវបានកំណត់ធ្វើនៅវេលាម៉ោង៣រសៀលថ្ងៃទី២៨ តុលា ស្អែកនេះ នៅពហុកីឡដ្ឋានជាតិអូឡាំពិក ។ សិស្ស-និស្សិត និងមន្ត្រីរាជការជាច្រើនម៉ឺននាក់ត្រូវបានគេអញ្ជើញឱ្យចូលរួមនៅក្នុងព្រឹត្តិការណ៍នេះ ដោយក្រុមអត្តពលិក និងក្រុមអ្នកសម្ដែងក៏បានត្រៀមខ្លួនប្រកបដោយមោទនភាពក្នុងការបង្ហាញ និងបញ្ចេញស្ទីលសម្ដែងដើម្បីរំលេចព្រឹត្តិការណ៍បើកសម្ពោធកម្មវិធីផងដែរ។ ព្រឹត្តិការណ៍នេះត្រូវបានប្រកាសថា នឹងមានទម្រង់ដូចគ្នានឹងការបើកសម្ពោធព្រឹត្តិការណ៍កីឡាស៊ីហ្គេមដែលកម្ពុជា គ្រោងធ្វើជាម្ចាស់ផ្ទះនៅឆ្នាំ២០២៣ ខាងមុខ ទើបមហាជនភាគច្រើនសុទ្ធតែផ្ដោតការចាប់អារម្មណ៍ចំពោះពិធីបើកសម្ពោធនារសៀលស្អែកនេះ ដោយចង់ដឹងថា នឹងមានសភាពអស្ចារ្យ និងរស់រវើកកម្រិតណា ?
កីឡាការិនី ស៊ន សៀវម៉ី នឹងក្លាយជាអ្នកកាន់ភ្លើងគុបជាប្រវត្តិសាស្ត្រក្នុងពេលបើកពិធី ខណៈដែលក្បួនដង្ហែផ្សេងៗក៏ត្រូវបានគេរៀបចំឡើងឱ្យមានលក្ខណៈរស់រវើកដូចគ្នានឹងពិធីបើកសម្ពោធកីឡារបស់បណ្ដាប្រទេសធំៗ។ អ្នកចូលរួមទស្សនាពិធីយ៉ាងហោចច្រើនម៉ឺននាក់នារសៀលនេះ ដោយខាងសមត្ថកិច្ចបានបង្ហាញពីការត្រៀមខ្លួនយ៉ាងខ្លាំងក្នុងការរៀបចំសណ្ដាប់ធ្លាប់កុំឱ្យស្ទះចរាចរណ៍នៅបរិវេណជុំវិញប្រារព្ធពិធី ។ ទស្សនីយភាពប្លែកៗក៏ត្រូវគេត្រៀមបង្ហាញជូននៅក្នុងពិធីនោះដើម្បីស្វាគមន៍ដល់ភ្ញៀវជាតិ និងអន្តរជាតិផងដែរ ។ កីឡាករល្បុក្កតោប្រមាណជាង៤០០នាក់ ត្រូវបានគេបង្វឹកឱ្យបង្ហាញក្បាច់គុននៅពេលធ្វើពិធី ដោយការសម្ដែងរបស់ក្បាច់គុននេះ នឹងមានសភាពលេចធ្លោជាងគេជាងឯងនៅក្នុងកម្មវិធីនោះផង។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានអះអាងថា ពិធីបើកសម្ពោធព្រឹត្តិការណ៍កីឡាជាតិនៅថ្ងៃទី២៨ តុលា ស្អែកនេះ នឹងមានអត្តពលិកមកពីគ្រប់ប្រភេទកីឡាទាំងអស់ចូលរួម ជាពិសេសក៏មានបណ្ដាភ្ញៀវជាតិ និងអន្តរជាតិ ដែលត្រូវបានអញ្ជើញជាពិសេសនឹងមកកុះករផងដែរ។ លោកថា គ្រាន់តែការសម្ដែងល្បុក្កតោមួយ គឺមានកងកម្លាំងនៃកងយោធពលខេមរភូមិន្ទ សិស្សានុសិស្ស និងកីឡាករ កីឡាការិនីប្រមាណជា៤២០នាក់ចូលរួមទៅហើយ ដោយមិនទាន់រាប់បញ្ចូលការសម្ដែងរបស់ប្រភេទសិល្បៈផ្សេងៗដែលបានត្រៀមខ្លួននោះផង ។ លោកថា នឹងមានពិធីដង្ហែភ្លើងគុបដោយកញ្ញា ស៊ន សៀវម៉ី និងក្បួនដង្ហែគ្រប់ប្រភេទកីឡាដែលត្រូវបានជ្រើសរើសឱ្យប្រកួតនៅក្នុងព្រឹត្តិការណ៍កីឡាជាតិ ។ ក្នុងនោះក្រុមតារាសិល្បៈយ៉ាងច្រើនកុះករក៏នឹងបង្ហាញខ្លួន ដើម្បីអបអរនៅក្នុងពិធីទាំងមូលផងដែរ ។
លោកមានការរំពឹងយ៉ាងខ្លាំងថា ការប្រកួតកីឡាជាតិដែលចាប់ផ្ដើមនៅប៉ុន្មានម៉ោងខាងមុខនេះ នឹងក្លាយជាព្រឹត្តិការណ៍ប្រវត្តិសាស្ត្រធំមួយដែលរុញឱ្យវិស័យកីឡាទទួលបានការលើកទឹកចិត្ត និងធ្វើឱ្យបណ្ដាភ្ញៀវទេសចរជាតិ ក៏ដូចជាអន្តរជាតិឱ្យតម្លៃប្រទេសកម្ពុជាទ្វេដងតាមរយៈភាពជោគជ័យក្នុងការរៀបចំព្រឹត្តិការណ៍កីឡាមួយនេះ ។ លោកថា ព្រឹត្តិការណ៍កីឡាជាតិនឹងត្រូវធ្វើឡើងរៀងរាល់២ឆ្នាំម្ដងដូចគ្នានឹងស៊ីហ្គេមដែរដើម្បីឱ្យមានបទពិសោធន៍ក្នុងការរៀបចំមុនពេលប្រារព្ធកីឡាស៊ីហ្គេមជាផ្លូវការផង និងដើម្បីបណ្ដុះកីឡាករ-កីឡាការិនីនៅទូទាំងកម្ពុជាឱ្យមានសមត្ថភាព ដើម្បីចូលឆាកអន្តរជាតិទន្ទឹមគ្នានោះផង ។ អ៊ីចឹងហើយទើបព្រឹត្តិការណ៍កីឡាជាតិដែលនឹងបើកឆាកនៅពេលបន្តិចទៀតនេះ ត្រូវលោកប្រកាសថា មានការលើកទឹកចិត្តអត្តពលិកក្មេងៗច្រើនជាងកីឡាករល្បីឈ្មោះ ហើយមានវ័យជ្រេនាពេលបច្ចុប្បន្ន ។ លោកថា គោលបំណងរបស់ព្រឹត្តិការណ៍នេះ គឺដើម្បីជ្រើសយកជើងខ្លាំងទៅកាន់ស៊ីហ្គេមឆ្នាំ២០២៣ ដូច្នេះចំពោះកីឡាករ-កីឡាការិនីដែលត្រូវបានជ្រើសរើសឱ្យចូលប្រកួតក៏ត្រូវគិតដល់អំឡុងឆ្នាំនោះផងដែរ ដោយមិនមែនអាងថា ឱ្យតែមានសមត្ថភាពនាពេលបច្ចុប្បន្ន ហើយក៏ផ្ដល់ឱកាសឱ្យចូលប្រកួតដោយមិនគិតពីចំណុចមួយនោះបានឡើយ ។ យ៉ាងណាក៏ដោយ លោកថា ការរៀបចំជាលើកទី១ នៅរសៀលថ្ងៃស្អែកនេះ នឹងមានខ្វះចន្លោះដោយសារការត្រៀមខ្លួនគឺមានរយៈពេលខ្លី បើធៀបនឹងការរៀបចំព្រឹត្តិការណ៍បែបនេះដូចគ្នារបស់ប្រទេសជិតខាង ។ ប៉ុន្តែលោកថា វានឹងក្លាយជាបទពិសោធន៍បន្តិចម្ដងៗ ដើម្បីឈានទៅរកចំណុចល្អឥតខ្ចោះនៅឆ្នាំ២០២៣ ក្នុងពេលប្រទេសកម្ពុជារៀបចំព្រឹត្តិការណ៍ស៊ីហ្គេមក្នុងនាមជាម្ចាស់ផ្ទះជាប្រវត្តិសាស្ត្រ ។
ពិធីសាកល្បងបើកការប្រកួតកីឡាជាតិលើកចុងក្រោយទទួលបានជោគជ័យច្រើន
ពិធីសាកល្បងបើកការប្រកួតកីឡាជាតិនៅពហុកីឡដ្ឋានជាតិអូឡាំពិកកាលពីល្ងាចថ្ងៃទី២៦ តុលា កន្លងមកនេះ ធ្វើបានល្អប្រសើរជាងលើកទី១ ដោយមានរៀបចំធ្វើពិធីក្រុងពាលីផងដែរ ដើម្បីសុំសេចក្ដីសុខពីអ្នកតាម្ចាស់ទឹកម្ចាស់ដីឱ្យបានសុខសប្បាយទាំងអស់គ្នា។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានមានប្រសាសន៍ថា នេះគឺជាលើកចុងក្រោយហើយនៃពិធីសាកល្បងបើកការប្រកួតកីឡាជាតិ ព្រោះនៅថ្ងៃទី២៨ តុលា ស្អែក គឺជាពិធីបើកការប្រកួតកីឡាជាតិជាផ្លូវការ ដោយបានការអញ្ជើញចូលរួមជាអធិបតីដ៏ខ្ពង់ខ្ពស់ពីសំណាក់សម្ដេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ។ ដូច្នេះពិធីបើកការប្រកួតសាកល្បងលើកទី២នេះ យើងទាមទារឱ្យមានការស៊ីសង្វាក់គ្នាគ្រប់ផ្នែកគ្រប់ផែនទាំងអស់ ធ្វើយ៉ាងណាឱ្យមានភាពល្អប្រសើរជាងមុន។
គួររំលឹកថា ពិធីសាកល្បងបើកការប្រកួតកីឡាជាតិលើកទី២នេះ គឺមានលក្ខណៈដូចកាលពីលើកទី១ដែរ ដោយមានបង្ហាញក្បាច់គុនរបស់កងយោធពលខេមរៈភូមិន្ទ ការសម្ដែងក្បាច់ល្បុក្កតោ ការបង្ហាញកាយសមស្របរបស់គរុសិស្សមកពីវិទ្យាស្ថានជាតិអប់រំកាយ និងកីឡា ការសម្ដែងសិល្បៈរបស់ក្រុមសិល្បៈមកពីក្រសួងវប្បធម៌ និងវិចិត្រសិល្បៈ ការលោតឆត្រយោងដោយកងទ័ពពិសេសឆត្រយោង៩១១ នាំទង់កីឡាជាតិ ទង់គណៈកម្មាធិការជាតិអូឡាំពិកកម្ពុជា ទង់ក្រសួងអប់រំ យុវជន និងកីឡា ព្រមទាំងទង់ជាតិខ្មែរ និងមានក្រុមត្រែទ័ពផ្លុំដង្ហែក្បួនកីឡាមកពី២៥រាជធានី-ខេត្ត និងក្រសួងចំនួន២ទៀត គឺក្រសួងការពារជាតិ និងក្រសួងមហាផ្ទៃ ។
ពិធីសាកល្បងបើកការប្រកួតកីឡាជាតិលើកទី២នេះ ពិតជាគួរឱ្យកោតសរសើរយ៉ាងខ្លាំងព្រោះថា គ្រប់ផ្នែកទាំងអស់សុទ្ធតែធ្វើបានល្អ ទោះបីនៅមិនទាន់បាន១០០%ក្ដី ។ ដូច្នេះនៅថ្ងៃបើកការប្រកួតជាផ្លូវការ គេសង្ឃឹមថា នឹងកាន់តែធ្វើបានល្អក្រោមក្រសែភ្នែកអ្នកចូលរួមទស្សនាមិនតិចជាង៦០.០០០នាក់ឡើយ ។ ការប្រកួតកីឡាជាតិនេះ នឹងត្រូវធ្វើឡើង២ឆ្នាំម្ដង ដើម្បីត្រៀមធ្វើម្ចាស់ផ្ទះប្រកួតកីឡាស៊ីហ្គេមលើកទី៣២ ឆ្នាំ២០២៣ ។ ដូច្នេះទម្រាំដល់ពេលនោះ យើងនៅសល់ពេលរៀបចំធ្វើ៣ដងទៀត ៕
ចែករំលែកព័តមាននេះ