រាជធានីភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី២៧ ខែតុលា ឆ្នាំ២០១៦ បានបង្គាប់ឲ្យអនុរក្សពន្ធនាគារព្រៃស និងប៉េហ្ស៊ី នាំខ្លួនមន្ត្រីអាដហុក៥នាក់មកផ្ដិតមេដៃដើម្បីបន្តការឃុំខ្លួន ពាក់ព័ន្ធនឹងបទល្មើសសូកប៉ាន់សាក្សី ដែលបានឆ្លងរាលដាលមកពីរឿងរ៉ាវស្នេហាក្រៅតម្រារបស់លោក កឹម សុខា ជាមួយស្រីមុំ ។
អ្នកនាំពាក្យសាលាដំបូងរាជធានីភ្នំពេញ លោក លី សុផាណា ឲ្យដឹងថា តំណាងអយ្យការបានចោទប្រកាន់មន្ត្រីសិទ្ធិមនុស្ស អាដហុក (ADHOC) ៤រូប រួមមានលោក នី សុខា, លោក ណៃ វ៉ង់ដា, លោក យី សុខសាន និង អ្នក ស្រី លឹម មុន្នី ពីបទសូកប៉ាន់សាក្សី តាមមាត្រា៥៤៨ នៃក្រមព្រហ្មទណ្ឌ ចំណែកអគ្គលេខាធិការរង គ.ជ.ប លោក នី ចរិយា និងមន្ត្រីអង្គការសិទ្ធិមនុស្សលោកសឺន សាលី (គេចខ្លួន) ត្រូវបានចោទប្រកាន់ពីបទ សមគំនិតសូកប៉ាន់ សាក្សី តាមមាត្រា២៩ និងមាត្រា៥៤៨ នៃក្រមព្រហ្មទណ្ឌ ។
យោងតាមមាត្រា៥៤៨ នៃក្រមព្រហ្មទណ្ឌបញ្ជាក់ថា បុគ្គលណា ដែលប្រគល់ឲ្យសាក្សីដោយផ្ទាល់ ឬប្រយោល នូវអំណោយ ជំនូន ការសន្យា ឬអត្ថប្រយោជន៍អ្វីមួយដើម្បីមិនធ្វើជាសាក្សី ឬផ្ដល់សក្ខីកម្មភូតកុហក នឹងត្រូវផ្ដន្ទាទោសដាក់ពន្ធនាគារពី៥ឆ្នាំ ដល់១០ឆ្នាំ ។ មាត្រា២៩ នៃក្រមព្រហ្មទណ្ឌស្ដីពីនិយមន័យ នៃអ្នកសមគំនិត ត្រូវចាត់ទុកក្នុងបទឧក្រិដ្ឋ ឬបទមជ្ឈិម ចំពោះបុគ្គលណាដែលជួយសម្រួលដោយចេតនា ដល់ការប៉ុនប៉ង ឬសម្រេចបទឧក្រិដ្ឋ ឬបទមជ្ឈិមនោះ ដោយផ្ដល់ជំនួយ ឬការឧបត្ថម្ភរបស់ខ្លួន ។ អ្នកសមគំនិតនឹងអាចត្រូវផ្ដន្ទាទោសបានលុះត្រាតែបទឧក្រិដ្ឋ ឬបទមជ្ឈិមត្រូវបានសម្រេច ឬបានប៉ុនប៉ង ហើយអ្នកសមគំនិត នៃបទឧក្រិដ្ឋ ឬបទមជ្ឈិមត្រូវផ្ដន្ទាទោសដូចគ្នានឹងចារីដែរ ។
មន្ត្រីសិទ្ធិមនុស្ស៤រូប និងមន្ត្រី គ.ជ.ប ១រូប ត្រូវបានអង្គភាពប្រឆាំងអំពើពុករលួយកោះហៅមកសាកសួរតាំងពីថ្ងៃទី២៧-២៨ ខែមេសា ឆ្នាំ២០១៦កន្លងមក និងឈានដល់ឃាត់ខ្លួនកាលពីយប់ថ្ងៃទី២៨ ខែមេសា រួចបញ្ជូនទៅសាលាដំបូងកាលពីល្ងាចថ្ងៃទី៣០ ខែមេសា ពាក់ព័ន្ធនឹងអំពើសូកប៉ាន់សាក្សី ជុំវិញសំណុំរឿងលោក កឹម សុខា និងនាង ខុម ចាន់តារាទី ហៅស្រីមុំ ហើយមេឃុំម្នាក់ឈ្មោះ ស៊ាង ចែត ក៏ត្រូវបានចាប់ឃុំខ្លួនផងដែរ នៅក្នុងបទសូកប៉ាន់សាក្សីនេះ ៕
ចែករំលែកព័តមាននេះ