ខេត្តមណ្ឌលគិរី ៖ បងប្អូនជនជាតិដើមភាគតិចដែលរស់នៅភូមិពូតាំង សង្កាត់រម្យនា ក្រុងសែនមនោរម្យ កំពុងមានការភ្ញាក់ផ្អើលយ៉ាងខ្លាំង ព្រោះតែមានពាក្យល្បីតពីមាត់មួយទៅមួយថា «មានអង្ករប្លាស្ទិក» កំពុងចរាចរក្នុងមូលដ្ឋានពួកគាត់ ដែលហេតុការណ៍នេះកើតឡើង កាលពីថ្ងៃទី២៥ តុលា រហូតដល់ល្ងាចថ្ងៃទី២៦ តុលា ប្រជាពលរដ្ឋរួមនិងអាជ្ញាធរភូមិបានជួបជុំគ្នា ធ្វើការពិសោធន៍ដើម្បីចង់ដឹងការពិតថា មានអង្ករជ័រ មែនឬអត់? ។
ប្រភពឱ្យដឹងថា ការភ្ញាក់ផ្អើលនេះ ក្រោយពីមានគ្រួសារបងប្អូនជនជាតិដើមភាគតិចមួយគ្រួសារ បានទិញអង្ករចំនួន៣បាវ ស្មើនឹង១៥០គីឡូក្រាម ក្រោយមកគាត់បានយកអង្ករនោះទៅលីង ដើម្បីធ្វើសម្លកកូរ ស្រាប់តែអង្ករនោះផ្ទុះ ។ ហើយគាត់បានយកអង្ករលីងនោះ ចាក់ទៅលើភ្លើងចង្ក្រាន ស្រាប់អង្ករបានរលាយចូលគ្នា។
ប្រភពបន្តថា បន្ទាប់មក ពួកគាត់បានទៅរាយការណ៍ជូនដល់អាជ្ញាធរមូលដ្ឋានពាក់ព័ន្ធទៅនឹងអង្ករ ដែលគាត់បានទិញខាងលើថាជាអង្ករប្លាស្ទិក ដែលធ្វើឱ្យប៉ះពាល់ដល់សុខភាពពួកគាត់។ ដោយសារតែមានបាតុភាពផ្អើលកាន់តែខ្លាំង នៅល្ងាចថ្ងៃទី២៦ តុលា សមត្ថកិច្ចមូលដ្ឋានបានឲ្យគ្រួសារនោះ យកអង្ករមកធ្វើតេស្តដោយលីងនៅមុខប្រជាពលរដ្ឋ ព្រមទាំងអ្នកសារព័ត៌មានផងដែរ តែអង្ករនេះ មានលក្ខណៈធម្មតាទេ មិនដូចដែលគ្រួសារនេះ បាននិយាយសង្ស័យថា ជាអង្ករប្លាស្ទិកទេ។
លោកមេភូមិពូតាំងបានប្រាប់ដល់អ្នកភូមិថា សូមកុំឲ្យមានការភ្ញាក់ផ្អើលបន្តទៅទៀត អង្ករនេះក្រោយពីធ្វើការពិសោធន៍ទៅជាអង្ករធម្មតាទេ ដូច្នេះនេះគ្រាន់ជាការភាន់ច្រឡំតែប៉ុណ្ណោះ ធម្មតាអង្ករយកទៅលីងតែងតែផ្ទុះអីចឹងហើយ។ យ៉ាងណាក៏ដោយ ករណីខាងលើនេះ លោកចាន់ វាសនា ប្រធានសាខាកាំកុងត្រូលខេត្តអ្នកយកព័ត៌មាន នៅមិនទាន់ទទួលបានការបំភ្លឺពីលោកទេ នៅព្រឹកថ្ងៃទី២៧ តុលា ២០១៦ ។
ចែករំលែកព័តមាននេះ