ប្រទេសមីយ៉ាន់ម៉ា ៖ ទីប្រឹក្សារដ្ឋាភិបាលមីយ៉ាន់ម៉ា អ្នកស្រី Aung San Suu Kyi បាននិយាយថាvvv សេដ្ឋកិច្ចរបស់ប្រទេសកំពុងតែលូតលាស់មិនទាន់គ្រប់គ្រាន់ដូចដែលបានព្យាករណ៍ទុកនៅឡើយទេ តាំងពីរដ្ឋាភិបាលថ្មីបាន
ប្រទេសមីយ៉ាន់ម៉ា ៖ ទីប្រឹក្សារដ្ឋាភិបាលមីយ៉ាន់ម៉ា អ្នកស្រី Aung San Suu Kyi បាននិយាយថាvvv សេដ្ឋកិច្ចរបស់ប្រទេសកំពុងតែលូតលាស់មិនទាន់គ្រប់គ្រាន់ដូចដែលបានព្យាករណ៍ទុកនៅឡើយទេ តាំងពីរដ្ឋាភិបាលថ្មីបានឡើងកាន់តំណែងក្នុងខែមីនា ហើយអ្នកស្រីបានជំរុញឲ្យមានការសហការគ្នាក្នុងសហគមន៍អាជីវកម្ម ។
អ្នកស្រីបាននិយាយក្នុងកិច្ចប្រជុំជាមួយអាជីវកម្មធំៗក្នុងរដ្ឋធានីណៃពិដោថា ៖ « ខ្ញុំសារភាពថា សេដ្ឋកិច្ចមិនបានលូតលាស់ច្រើនដូចដែលយើងបានគិតទុកទេ ក្នុងអំឡុងពេល៦ខែដំបូងនៃអាណត្តិរបស់រដ្ឋាភិបាលនេះ » ។
អ្នកស្រី Suu Kyi បាននិយាយដោយមិនបានផ្តល់ការបកស្រាយបន្ថែមថា នៅមានមូលហេតុដែលធ្វើឲ្យសេដ្ឋកិច្ចមានការអន់ថយ ។ អ្នកស្រីនិយាយថា ៖ « មានឧបសគ្គជាច្រើនក្នុងប្រទេសដែលត្រូវដោះស្រាយ ប៉ុន្តែខ្ញុំជឿជាក់ថា ពួកយើងត្រូវតែឆ្លងកាត់ឧបសគ្គទាំងនេះម្តងមួយៗ » ។
ដើម្បីឆ្លើយតបនឹងការរិះគន់ថា រដ្ឋាភិបាលមិនបានយកចិត្តទុកដាក់គ្រប់គ្រាន់លើសេដ្ឋកិច្ចនិងផ្តោតសំខាន់តែលើនយោបាយ និងការសម្រុះសម្រួលជាមួយជនភាគតិចនោះ អ្នកស្រី Suu Kyi និយាយថា រដ្ឋាភិបាលកំពុងផ្តោតសំខាន់ទាំងលើនយោបាយ និងសេដ្ឋកិច្ច ព្រោះវិស័យទាំងពីរពឹងផ្អែកគ្នាទៅវិញទៅមក ។ អ្នកស្រីបន្តថា ៖ « តាមពិតទៅ រដ្ឋាភិបាល គឺជាអ្នកដែលចង់មើលឃើញសេដ្ឋកិច្ចរបស់ប្រទេសលូតលាស់ខ្លាំងបំផុត » ។
អ្នកស្រីបានជំរុញឲ្យអាជីវកម្មធំៗក្នុងប្រទេសសម្រេចចិត្តថា នឹងកាត់បន្ថយគំនិតផ្តោតតែលើផលប្រយោជន៍ផ្ទាល់ខ្លួន ហើយងាកមករកផលប្រយោជន៍សាធារណៈដើម្បីចូលរួមក្នុងការអភិវឌ្ឍសេដ្ឋកិច្ចជាតិ ។ អ្នកស្រីនិយាយថា ៖ «រដ្ឋាភិបាលចង់ពឹងផ្អែកលើអាជីវកម្មធំៗក្នុងស្រុកដើម្បីផលប្រយោជន៍ជាតិ ។ ពួកយើងនឹងមិនប្រកាន់នូវអតីតកាលទេ ។ ផ្ទុយទៅវិញ ពួកយើងនឹងរៀនពីអតីតកាល និងបន្តដំណើរទៅមុខទៀត ដោយបង្កើតឱកាសដល់ពួកគេដើម្បីផ្លាស់ប្តូរ » ។
គួរបញ្ជាក់ថា ធនាគារពិភពលោក (World Bank) បាននិយាយក្នុងសេចក្តីរាយការណ៍កាលពីដើមខែនេះថា ការលូតលាស់នៃសេដ្ឋកិច្ចរបស់មីយ៉ាន់ម៉ាក្នុងឆ្នាំនេះបន្តមានភាពរឹងមាំ ប៉ុន្តែអតិផរណានៅតែខ្ពស់ដដែល ។
ធនាគារខាងលើព្យាករណ៍ថា GDP របស់ប្រទេសនេះនឹងកើនឡើង៧,៨%ក្នុងអំឡុងពេលនេះ ជាមួយអត្រាអតិផរណានឹងធ្លាក់ចុះ៨,៥% ។
ធនាគារនេះបន្តថា មីយ៉ាន់ម៉ាកំពុងជួបប្រទះនឹងឧបសគ្គ ប៉ុន្តែប្រសិនបើមានការបន្ត ប្រុងប្រយ័ត្នផ្នែកហិរញ្ញវត្ថុ បង្កើនគុណភាពនៃដំណើរការរូបិយប័ណ្ណ បត់បែននៃអត្រាប្តូរប្រាក់ និងពង្រឹងសមត្ថភាពត្រួតពិនិត្យលើធនាគារកិច្ច គឺប្រាកដជាអាចធ្វើឲ្យប្រទេសនេះគ្រប់គ្រងសម្ពាធទាំងនោះបាន ៕
ចែករំលែកព័តមាននេះ