រាជធានីភ្នំពេញ ៖ ដើម្បីបោះជំហានទៅមុខ និងធ្វើឲ្យប្រសើរឡើងដល់បរិយាកាសពាណិជ្ជកម្មនៅឆ្នាំ២០១៧ កម្ពុជាចាំបាច់ត្រូវធ្វើឲ្យការចាប់ផ្តើមធ្វើអាជីវកម្មកាន់តែមានភាពងាយស្រួល និងកាន់តែឆាប់រហ័ស តាមរយៈការ
រាជធានីភ្នំពេញ ៖ ដើម្បីបោះជំហានទៅមុខ និងធ្វើឲ្យប្រសើរឡើងដល់បរិយាកាសពាណិជ្ជកម្មនៅឆ្នាំ២០១៧ កម្ពុជាចាំបាច់ត្រូវធ្វើឲ្យការចាប់ផ្តើមធ្វើអាជីវកម្មកាន់តែមានភាពងាយស្រួល និងកាន់តែឆាប់រហ័ស តាមរយៈការកាត់បន្ថយពេលវេលាក្នុងការចុះបញ្ជី និងមិនចាំបាច់តម្រូវឲ្យមានភស្តុតាងបញ្ជាក់អំពីទុនដែលបានដាក់តម្កល់ក្រោយការចុះបញ្ជីទេ។ នេះបើតាមរបាយការណ៍ចុងក្រោយរបស់ក្រុមធនាគារពិភពលោក ស្ដីពីការធ្វើធុរកិច្ច ឆ្នាំ២០១៧ «ឱកាសស្មើភាពសម្រាប់ទាំងអស់គ្នា » ។
តាមរបាយការណ៍ប្រចាំឆ្នាំរបស់ក្រុមធនាគារពិភពលោក ស្តីពីការសម្រួលដល់ការធ្វើធុរកិច្ច ដែលបានបង្ហាញកាលពីថ្ងៃទី២៦ តុលា ម្សិលមិញថា ប្រទេសនៅក្នុងតំបន់អាស៊ីបូព៌ា និងប៉ាស៊ីហ្វិក កំពុងតែធ្វើឲ្យប្រសើរឡើងប្រកបដោយភាពរឹងមាំដល់បរិយាកាសពាណិជ្ជកម្ម ។ ប្រទេសមួយក្នុងចំណោមប្រទេសទាំងអស់ គឺកម្ពុជា ដែលឈរលើលំដាប់ថ្នាក់ទី១៣១ ក្នុងចំណោម១៩០ប្រទេស ។ ពេលដែលប្រៀបធៀបជាមួយប្រទេសនាំមុខគេជាច្រើន កម្ពុជាបានធ្វើឲ្យគម្លាតថយចុះតាមការអនុវត្តល្អបំផុត ដូចដែលបានឆ្លុះបញ្ចាំងតាមរយៈការកើនឡើងនៃពិន្ទុដែលមិនប្រសើរពី៥៤,៥៤ ដល់៥៤,៧៩ ធៀបនឹងឆ្នាំកន្លងទៅ ។
ក្នុងរបាយការណ៍ធ្វើធុរកិច្ចឆ្នាំ២០១៧ «ឱកាសស្មើភាពសម្រាប់ទាំងអស់គ្នា» បង្ហាញថា ជាងពីរភាគបីនៃប្រទេសចំនួន២៥ស្ថិតក្នុងតំបន់នេះ បានធ្វើកំណែទម្រង់ចំនួន៤៥នៅក្នុងឆ្នាំកន្លងទៅ ដើម្បីបង្កលក្ខណៈឲ្យកាន់តែងាយស្រួលដល់ការធ្វើធុរកិច្ច បើធៀបនឹងឆ្នាំមុន មានតែ២៨កំណែទម្រង់ ។
នៅប្រទេសកម្ពុជា ការិយាល័យឥណទានបានចាប់ផ្តើមផ្តល់ពិន្ទុទទួលស្គាល់ដល់ស្ថាប័នធនាគារនិងហិរញ្ញវត្ថុនានា ដែលធ្វើឲ្យមានភាពល្អប្រសើរឡើងដល់លទ្ធភាពទទួលបានព័ត៌មានអំពីឥណទាន ។ ការកែលម្អនេះ បានបង្កភាពងាយស្រួលកាន់តែច្រើនឡើងដល់អាជីវកម្មខ្នាតតូចនៅក្នុងប្រទេសកម្ពុជា ដែលមានប្រវត្តិហិរញ្ញវត្ថុល្អក្នុងការទទួលបានឥណទាន ។ ដើម្បីបោះជំហានទៅមុខ កម្ពុជាចាំបាច់ត្រូវធ្វើឲ្យការចាប់ផ្តើមធ្វើអាជីវកម្មកាន់តែមានភាពងាយស្រួល និងឆាប់រហ័ស តាមរយៈការកាត់បន្ថយពេលវេលាក្នុងការចុះបញ្ជី និងមិនចាំបាច់តម្រូវឲ្យមានភស្តុតាងបញ្ជាក់អំពីទុនដែលបានដាក់តម្កល់ក្រោយការចុះបញ្ជីទេ ។
លោក ស្រី អីុហ្គូណា ដូប្រាចា ប្រធានគ្រប់គ្រងរបស់ធនាគារពិភពលោកប្រចាំកម្ពុជា មានប្រសាសន៍ថា ៖ « កម្ពុជាបាននិងកំពុងមានការរីកចម្រើនក្នុងការជំរុញឲ្យមានបរិយាកាសពាណិជ្ជកម្មកាន់តែល្អប្រសើរជាងមុន។ កំណែទម្រង់នានាដែលកម្ពុជាបាននិងកំពុងធ្វើ គឺកំពុងតែជួយបង្កើតឲ្យមានសេដ្ឋកិច្ចរស់រវើក ដែលវានឹងជួយបង្កើននូវក្តីសង្ឃឹមសម្រាប់ប្រជាពលរដ្ឋកម្ពុជាជាច្រើន និងជួយពួកគេឲ្យចាកផុតពីភាពក្រីក្រ » ។
លោក រីតា រ៉ាម៉ាលហូ ប្រធានចងក្រងរបាយការណ៍នេះមានប្រសាសន៍ថា ៖ «កំណែទម្រង់ថ្មីលើគ្រប់វិស័យនៅក្នុងតំបន់អាស៊ីបូព៌ា និងប៉ាស៊ីហ្វិក គឺជាការបោះជំហានលើថ្ម ដើម្បីលើកកម្ពស់សកម្មភាពពាណិជ្ជកម្ម ។ ការកែលម្អដែលបានកត់សម្គាល់កាលពីឆ្នាំមុន ប្រទេសជាច្រើននៅក្នុងតំបន់នេះនៅតែត្រូវធ្វើការកែលម្អដើម្បីបង្កភាពងាយស្រួលដល់បរិយាកាសពាណិជ្ជកម្មសម្រាប់សហគ្រិនក្នុងស្រុកទាំងឡាយ» ៕
ចែករំលែកព័តមាននេះ