ខេត្ដកំពង់ចាម ៖ ដើម្បីបំបែកសំណុំរឿងអាថ៌កំបាំង ស្ដីពីការបាត់ខ្លួននាងក្រមុំជនបទ២នាក់នោះ កំលាំងប៉ូលិសព្រហ្មទណ្ឌកំរិតធ្ងន់ខេត្ដ បានសហការជាមួយប៉ូលិសស្រុកមេមត់ និងប៉ូលិសស្រុកតំបែរធ្វើការស្រាវជ្រាវ យ៉ាងយកចិត្ដទុកដាក់រហូតឈានទៅដល់ការឃាត់ខ្លួនជនសង្ស័យម្នាក់ឈ្មោះឌឿក តុង ភេទប្រុស អាយុ៣៥ឆ្នាំ រស់នៅភូមិស្ទឹងតាថុក ឃុំចុងជាច ស្រុកតំបែរ នាវេលាម៉ោង៣ រសៀលថ្ងៃទី១ មិថុនា ឆ្នាំ២០១០ ពីបទជាប់ពាក់ព័ន្ធទៅនឹងករណីមនុស្សឃាតនៅភូមិបេង ឃុំដារ ស្រុកមេមត់ ។តាមសេចក្ដីរាយការណ៍ពីលោកអនុសេនីយ៍ឯកឡាញ់ សត្យា មន្ដ្រីប៉ូលិសព្រហ្មទណ្ឌកំរិតធ្ងន់ខេត្ដបានឱ្យដឹងថា ជុំវិញការបាត់នាងក្រមុំជនបទ២នាក់ គឺម្នាក់ឈ្មោះពៅ ណន អាយុ១៥ឆ្នាំ និងម្នាក់ទៀតឈ្មោះមួង រត្ន័ អាយុ១៨ឆ្នាំ រស់នៅភូមិគោកចារ ឃុំគោកស្រុក ស្រុកតំបែរជាមួយគ្នា បានបាត់ចេញពីផ្ទះដោយគ្មានមូលហេតុ បង្កឱ្យមានការភ្ញាក់ផ្អើលដល់កំលាំងប៉ូលិសចេញធ្វើអន្ដរាគមន៍ តាមស្រាវជ្រាវយ៉ាងច្រវាត់ ។
លោកអនុសេនីយ៍ឯកឡាញ់ សត្យា បានបន្ដថា ទោះបីជាសមត្ថកិច្ចបានព្យាយាមតាមរកយ៉ាងណាក៏មិនមានលេចឮដំណឹងណាមួយគួរឱ្យកត់សំគាល់សោះឡើយ ។ លុះមកដល់វេលា ម៉ោង៧ និង៥នាទីព្រឹកថ្ងៃទី៣១ ឧសភា ឆ្នាំ ២០១០ ស្រាប់តែគេប្រទះឃើញសាកសពយុវជនម្នាក់ត្រូវបានគេវាយសម្លាប់ដោយចងដៃទាំងសងខាងទំលាក់ចូលទៅក្នុងអណ្ដូងទឹកមួយកន្លែងជំរៅ១៦ម៉ែត្រ ស្ថិតនៅក្នុងដីចំការម្រេច ភូមិបេង ឃុំដារ ស្រុកមេមត់ ។ អំពើឃាតកម្មដ៏សាហាវព្រៃផ្សៃនេះកំលាំងប៉ូលិសស្រុកមេមត់បានសហការជាមួយប៉ូលិសព្រហ្មទណ្ឌកំរិតធ្ងន់ខេត្ដចុះធ្វើការស្រាវជ្រាវ និងពិនិត្យសាកសពក៏ឃើញមានប័ណ្ណ ថែទាំសុខភាពរបស់អង្គការរ៉ាក់ឈ្មោះ CHY MENG LY រស់នៅភូមិស្ទឹងតាថុក ។ ភ្លាមៗនោះ សមត្ថកិច្ចប៉ូលិសព្រហ្មទណ្ឌខេត្ដក៏ទំនាក់ទំនងទៅប៉ូលិសស្រុកតំបែរ ទើបលោក ង៉ា ប៊ុនធី ឪពុកនៃសពមកទទួលយកសពកូនប្រុសទៅធ្វើបុណ្យតាមប្រពៃណី ហើយជាមួយគ្នានោះដែរ នៅក្បែរមាត់អណ្ដូង ក៏ឃើញមានបង្វេចខោអាវមនុស្សស្រីទៀតផង ។
បន្ទាប់មកនៅព្រឹកថ្ងៃទី១ មិថុនា ប្រជាពលរដ្ឋបានប្រទះឃើញសាកសពមនុស្សស្រីម្នាក់ចង.កទៅនឹងមែកស្វាយចន្ទី នៅក្នុងភូមិបេង ឃុំដារនោះដែរ ដែលសពទាំង២ស្ថិតនៅឆ្ងាយពីគ្នាប្រហែលជាង២.០០០ម៉ែត្រ ។លោកអនុសេនីយ៍ឯកឡាញ់ សត្យា បានបញ្ជាក់ថា តាមរយៈការពិនិត្យសពក្នុងចំណោមនាងក្រមុំទាំង២នាក់ដែលបានបាត់ចេញពីផ្ទះនោះ ត្រូវបានគេស្គាល់នាងឈ្មោះ មួង រ័ត្ន អាយុ១៨ឆ្នាំ ។ ផ្អែកតាមការស្រាវជ្រាវជនរងគ្រោះដែលឃាតកវាយសម្លាប់ទំលាក់ចូលក្នុងអណ្ដូងនោះឈ្មោះធី ជិន ហៅ ពៅ ហៅម៉េង លី ដែលជនរងគ្រោះនេះ គឺជាសង្សាររបស់នាងពៅ ណន អាយុ១៥ឆ្នាំនោះ។ ប៉ុន្ដែក្រោយមកបែរជាមកស្រលាញ់ នាងឈ្មោះមួង រ័ត្ន ទៅវិញ ហើយបានប្រើល្បិចលួងលោមហៅនាងពៅ ណន ឱ្យចេញពីផ្ទះទៅតាមរូបគេ (ម៉េង លី) ។ នៅថ្ងៃទី ២៩ ឧសភា ឈ្មោះម៉េង លី កំពុងតែឈរនិយាយជាមួយនាងឈ្មោះណន នៅក្នុងព្រៃមួយកន្លែងនាស្រុកតំបែរ ។ រំពេចនោះស្រាប់ តែមានមនុស្សប្រុស២នាក់មិនស្គាល់ឈ្មោះបាននាំគ្នាព្រួតវាយឈ្មោះម៉េង លី រហូតដល់សន្លប់ ។
បន្ទាប់មកព្រានកំណាច២នាក់នោះ បានចាប់នាងណនរំលោភសេពសន្ថវៈម្នាក់ម្ដងៗរហូតបានសំរេចតាមបំណង ហើយនាង ឈ្មោះណន បានរត់ទៅផ្ទះវិញ ប្រាប់ដល់ឪពុកម្ដាយ ព្រមទាំងប្ដឹងប៉ូលិសប៉ុសិ៍្ដរដ្ឋបាលឃុំ គោកស្រុកឱ្យជួយធ្វើអន្ដរាគមន៍ដោយចោទ ប្រកាន់លើឈ្មោះម៉េង លី ពីព្រោះពេលក្រុមសាច់ញាតិទៅតាមរកមើលនៅកន្លែងសន្លប់មិនឃើញ ។ លោកអនុសេនីយ៍ឯកឡាញ់ សត្យា បានបន្ថែមថា នៅព្រឹកថ្ងៃទី៣០ ឧសភា ឈ្មោះម៉េង លី បានមកទទួលលុយចំនួន៣០ដុល្លារពីឈ្មោះឌឿក តុង ត្រូវជាបងថ្លៃ ឱ្យរត់គេចចេញទៅប៉ោយប៉ែត ពីព្រោះខ្លាចបែកការណ៍ប៉ូលិសតាមចាប់ ។ នៅព្រឹកថ្ងៃទី៣០ ឧសភា នោះដែរ ឈ្មោះតុង បានទូរស័ព្ទទៅបុរសឈ្មោះធី ជាឪពុករបស់អ្នករងគ្រោះដោយសួររកឈ្មោះម៉េង លី ថានៅឯណា? ។ រំពេចនោះ ឪពុកបានឆ្លើយថា កូនប្រុសរបស់គាត់បានទៅភូមិថ្មី ឃុំទួលស្នួល ស្រុកក្រូចឆ្មារ ជាផ្ទះបងប្រុសរបស់គេបាត់ហើយ ។ រហូតមកដល់ម៉ោង៤រសៀល ថ្ងៃទី៣០ ឧសភា ឈ្មោះម៉េង លី បានទូរស័ព្ទ ទៅប្រាប់ឪពុករបស់គេថា “ខ្ញុំមកដល់ស្រុកពញាក្រែកវិញហើយ” ។
ជាមួយនោះឪពុក ប្រាប់ទៅកូនប្រុសឱ្យមកផ្ទះវិញដើម្បីបំភ្លឺរឿងការចោទប្រកាន់ តែកូនប្រុសមិនព្រមមកផ្ទះតាមការណែនាំរបស់ឪពុកទេ ។ លុះម៉ោង១១ព្រឹកថ្ងៃទី៣១ ឧសភា ក៏ទទួលដំណឹងថា កូនប្រុសត្រូវគេវាយសម្លាប់ទំលាក់ក្នុងអណ្ដូងទឹកនៅក្នុងចំការម្រេច ឃុំដារ ស្រុកមេមត់ ។ ការសម្លាប់មនុស្សទំលាក់ចូលក្នុងអណ្ដូងទំនងជាខ្លាចបែកការណ៍រឿងចាប់រំលោភខាងលើ ទើបសម្លាប់បំបិទមាត់តែម្ដង ។ សពនាងមួង រ័ត្ន និងយុវជនម៉េង លីត្រូវគេសម្លាប់ក្នុងថ្ងៃតែមួយនៅកន្លែងផ្សេងគ្នា ។ ទោះបីជាជនសង្ស័យឈ្មោះឌឿក តុង មិនឆ្លើយសារភាពក្ដីក៏ជំនាញព្យាយាមរកភស្ដុតាងមកចោទប្រកាន់បញ្ជូនទៅសាលាដំបូងខេត្ដដែរ ។ ចំណែកឯនាងពៅ ណន ដែលបាត់ខ្លួននោះប៉ូលិសកំពុងតាមរកបន្ដទៀត ។
ចែករំលែកព័តមាននេះ