រាជធានីភ្នំពេញ ៖ សេចក្តីរាយការណ៍ឱ្យដឹងបន្តទៀតថា គិតត្រឹមវេលាម៉ោង១០ និង១០នាទីព្រឹកថ្ងៃទី២៧ តុលា ២០១៦ នេះ កម្មករដែលរងរបួសក្នុងហេតុការណ៍ក្រឡាប់រថយន្តនោះ បានឡើងដល់សរុប៧២នាក់ហើយ ដែលកំពុងសង្គ្រោះនៅមន្ទីរពេទ្យកាល់ម៉ែតមាន៦៣នាក់ ក្នុងនោះរបួសធ្ងន់ខ្លាំង៤៣នាក់ រីឯនៅមន្ទីរពហុសម្ភពសុខលាភមេត្រីមាន៩នាក់ នេះបើយោងតាមប្រភពបេឡាជាតិរបបសន្តិសុខសង្គម ដែលបានទទួលខុសត្រូវថ្លៃព្យាបាលក្រុមកម្មកររបួសទាំងនោះ ។
គួររំលឹកថា រថយន្តម៉ាកហ៊ីយ៉ាន់ដាយ ដឹកកម្មកររោងចក្រមួយគ្រឿង បានក្រឡាប់លើផ្លូវ ដែលមានដឹកកម្មករចំនួន៨០នាក់ ហើយបណ្តាលឱ្យ៤៥នាក់រងរបួសធ្ងន់-ស្រាល (ក្នុងនោះធ្ងន់៣០ ស្រាល១៥) ហើយត្រូវគេជួយបញ្ជូនទៅសង្គ្រោះនៅមន្ទីរពេទ្យកាល់ម៉ែតភ្លាមៗ ដែលហេតុការណ៍បង្កឱ្យភ្ញាក់ផ្អើល និងមានការកកស្ទះចរាចរណ៍ផងដែរ កើតឡើងកាលពីវេលាម៉ោង០៦ និង២០នាទីព្រឹកថ្ងៃទី២៧ តុលា ២០១៦ ស្ថិតតាមបណ្តោយផ្លូវជាតិលេខ៦ ត្រង់ចន្លោះស្ពានទី៨ និង៩ (មុខអតីតគណបក្សហ្វុនស៊ិនប៉ិច) ក្នុងភូមិក្តីចាស់ សង្កាត់បាក់ខែង ខណ្ឌជ្រោយចង្វារ ។
ប្រភពឱ្យដឹងថា គេមិនត្រូវបានស្គាល់អត្តសញ្ញាណអ្នកបើកបរនោះទេ ព្រោះរត់គេចបាត់ បើករថយន្តម៉ាកហ៊ីយ៉ាន់ដាយ ចំណុះ២តោនកន្លះ ពណ៌.ស មានពាក់ស្លាកលេខ 3C-5727 ដោយដឹកកម្មករ៨០នាក់ ។ ចំណែកឯខាងអ្នករងរបួសធ្ងន់-ស្រាល ក៏មិនស្គាល់ឈ្មោះ ដោយគេបញ្ជូនទៅសង្គ្រោះជាបន្តបន្ទាប់ ។
ប្រភពឱ្យដឹងទៀតថា មុនពេលកើតហេតុ រថយន្តខាងលើបានបើកចេញពីភូមិថ្មី ឃុំស្វាយអន្ទរ ស្រុកមុខកំពូល ខេត្តកណ្តាល ក្នុងបំណងដឹកកម្មករទៅធ្វើការនៅរោងចក្រខោខូវប៊ូយ «UDS» (ជិតស្ពានទី៦) ។ លុះមកដល់ចំណុចកើតហេតុ រថយន្តនោះ បានបើកវ៉ាម៉ូតូកង់៣មួយគ្រឿង ស្រាប់តែជ្រុលទៅបុកខឿនសួនច្បារ ហើយត្រូវតៃកុងទាញមកស្តាំវិញ ក៏បណ្តាលឱ្យក្រឡាប់ចាក់កម្មករចោលពេញផ្លូវតែម្តង រួចហើយអ្នកបើកបររូបនោះ រត់គេចខ្លួនភ្លាមៗ ។
ចែករំលែកព័តមាននេះ