ស្ត្រីដែលមានវត្តមានក្នុងរឿងនិងហ្គេមឈ្មោះ Lara Croft ពេលនេះមានអាយុ២០ឆ្នាំហើយ បើគិតពីថ្ងៃបង្កើតមក ហើយឈ្មោះនេះក៏ត្រូវបានគេរាប់បញ្ចូលជាវីរនារីដែរ ។
រឿង Tomb Raider ត្រូវបានបង្កើតឡើងដោយមនុស្សមួយក្រុមសម្រាប់ជាវីដេអូហ្គេមនៅឆ្នាំ១៩៨៨ នៅទីក្រុង Derby ចក្រភពអង់ គ្លេស ។ នៅឆ្នាំ២០១០ ទីក្រុង Derby ក៏បានដាក់ឈ្មោះផ្លូវមួយថា Lara Croft Way ។
បើតាមសម្តីរបស់សមាជិកបង្កើតហ្គេមឈ្មោះ Heather Gibson និយាយថា រឿងហ្គេមនោះមិនងាយនឹងលក់ចេញឡើយក្នុងឧស្សាហកម្មវីដេអូហ្គេមដោយសារតួជាវីរនារីព្រោះថាពេលនោះតួអង្គបុរស ឬក្មេងប្រុសជាតួក្នុងហ្គេមដែលទទួលបានការពេញចិត្តក្រៃលែង ។
ហ្គេម Lara Croft ត្រូវបានគេដាក់លក់ជាផ្លូវការនៅថ្ងៃទី២៥ តុលា ឆ្នាំ១៩៩៦ ហើយបើគិតមកដល់ពេលបច្ចុប្បន្នវាមានអាយុ២០ឆ្នាំហើយ ។
លោក Iain Simons នាយកមូលនិធិហ្គេមជាតិ និងបុណ្យហ្គេមទីក្រុងនិយាយថា ខ្ញុំគិតថា Lara Croft ជាផ្នែកមួយនៃដំណើរទៅមុខនៃការលើកកម្ពស់អំណាចស្ត្រីឲ្យខ្ពស់ឡើង ។ បើទោះជាអ្នកបង្កើតហ្គេមភាគច្រើនជ្រើសរើសតួឯកជាបុរស ឬក្មេងប្រុសក្តីក៏នៅតែមានតួអង្គស្ត្រីឬក្មេងស្រីក្នុងហ្គេមដូចគ្នាដែរ ។
តាមការពិតបើតាមទិន្នន័យរបស់ក្រុមហ៊ុនEidos បង្ហាញថា តួអង្គសំខាន់ក្នុងហ្គេមប្រមាណ៤០ភាគរយជាតួស្រី្តភេទ ។ តួ Lara ត្រូវបានទស្សនិកជនជាភេទដូចគ្នាយល់ឃើញថា វាពិតជាល្អណាស់ ដែលបានឃើញស្ត្រីដ៏ស្រស់ស្អាតមានសមត្ថភាពខ្លាំងបែបនេះ ។ លើសពីនេះទៅទៀតហ្គេមនេះបានធ្វើឲ្យក្មេងស្រីតូចៗជាច្រើនយកតួអង្គនេះជាគំរូថា ស្ត្រីមានសមត្ថភាពខ្លាំងដូចគ្នាដែរ ហើយអាចធ្វើឲ្យពួកគេមានគោលដៅច្បាស់លាស់ក្នុងការរស់នៅ និងខិតខំរៀនដើម្បីសម្រេចគោលដៅថែមទៀត ។
ហ្គេមនោះដំបូងដាក់លក់នៅ Sega Saturn តែវាបានល្បីល្បាញបន្ទាប់ពីបានបញ្ចូលឲ្យលេងក្នុងហ្គេម PlayStation ។ បន្ទាប់ពីមានភាពល្បីល្បាញមក វាបានក្លាយជារឿងនៅទំព័រមុខក្នុងទស្សនាវត្តីវីដេអូហ្គេម ទស្សនាវដ្តីស្តាយជីវិត (Lifestyle) លើសពីនេះទៅទៀតមានផលិតផលជាច្រើនផ្សេងទៀតដែលប្រើប្រាស់ រូបថតតួអង្គ ឬសម្ភារដែលមានដាក់រូបតួអង្គថែមទៀត ។
គ្មានអ្នកណាម្នាក់ស្មានដឹងថា ហ្គេមនោះទទួលបានភាពជោគជ័យរហូតដល់ ឈ្មោះLara Croft ល្បីស្មើនឹងតួឈ្មោះ Jame Bond ដែរ ។ លើសពីនេះទៅទៀត នាងAngelina Jolie ក៏បានថតតួ Lara Croft ចំនួនពីរវគ្គផងដែរគឺវគ្គមួយឈ្មោះ Lara Croft Tomb Raider នៅឆ្នាំ២០០១ និងវគ្គពីរឈ្មោះ Lara Croft Tomb Raider-Cradle Of life នៅឆ្នាំ២០០៣ ។
នាង Angelina Jolie បាននិយាយថា ការថតខ្សែភាពយន្តនៅប្រទេសកម្ពុជាជាលើកទីមួយបានធ្វើឲ្យបទពិសោធន៍នៃជិវិតរបស់នាងផ្លាស់ប្តូរ ។ នាងមានកូនខ្មែរម្នាក់បន្ទាប់ពីខ្សែភាពយន្តបានដាក់បញ្ចាំង ហើយវាក៏ជាពន្លឺនៃការចាប់ផ្តើមការងារមនុស្សធម៌ ។
នៅមុនពេលថតរឿងនាង Angelina បានចំណាយពេលជាច្រើនខែដើម្បីហ្វឹកហាត់មុនពេលសម្តែង ក្នុងនោះមានការហ្វឹកហាត់ប្រើប្រាស់អាវុធ ហាត់វ៉ៃ ហាត់ប្រាណដើម្បីឲ្យមានរូបរាងសក្តិសម រៀនជិះម៉ូតូជាដើម ។
នាពេលថ្មីនេះនាងបានត្រឡប់មកប្រទេសកម្ពុជាដើម្បីដឹកនាំខ្សែភាពយន្តដែលមានឈ្មោះថា First They kill My Father ឬដំបូងពួកគេសម្លាប់ឪពុកខ្ញុំ ដែលជាខ្សែភាពយន្តនិយាយពីការចងចាំរបស់សកម្មជនសិទ្ធិមនុស្សកម្ពុជាម្នាក់ឈ្មោះ លឿង អុឹង (Loung Ung) ៕
ចែករំលែកព័តមាននេះ