រាជធានីភ្នំពេញ ៖ នារីវ័យក្មេងម្នាក់ ដោយសារតែក្តៅចិត្តតាមទាន់លោកប្តីគាត់មានស្រីថ្មី បានទៅផឹកស្រារហូតស្រវឹង ហើយបើក រថយន្តទៅបុកប៉ុស្តិ៍យាម២៤ម៉ោងរបស់នគរបាលខណ្ឌសែនសុខ និងជ្រុលទៅបុកបង្គោលភ្លើងបំភ្លឺនៅក្បែរនោះបន្ត បណ្តាលឱ្យទ្រេតបង្គោលភ្លើង នៅតែមិនអស់ចិត្តទៀត នាងបានបញ្ចេញកំហឹងដាក់លើសមត្ថកិច្ច និងអ្នកយកព័ត៌មាន ដោយជេរប្រមាថនិងស្ទុះទៅវាយប្រតាយប្រតប់គ្នា បង្កឱ្យភ្ញាក់ផ្អើលកាលពីវេលាម៉ោង០៣ទៀបភ្លឺថ្ងៃទី២៧ តុលា ២០១៦ ស្ថិតត្រង់ចំណុចផ្លូវហាយ
ណូយ កែងផ្លូវឧកញ៉ាម៉ុង រិទ្ធី ក្នុងសង្កាត់ភ្នំពេញថ្មី ខណ្ឌសែនសុខ ។
នារីជាអ្នកបើករថយន្តខាងលើឈ្មោះម៉ាន់ ចាន់នី អាយុ២៤ឆ្នាំ ជាអ្នកលក់ដូរ ស្នាក់នៅម្ដុំផ្សារដីហុយ សង្កាត់ភ្នំពេញថ្មី ខណ្ឌសែនសុខ បើករថយន្តម៉ាកហាយឡែនឌ័រ ពណ៌ទឹកមាស ពាក់ស្លាកលេខភ្នំពេញ ២AA-5676 ។
តាមប្រភពពីកន្លែងកើតហេតុថា គេឃើញនារីនោះបើករថយន្តហាយឡែនឌ័រ តាមផ្លូវឧកញ៉ាម៉ុង ឫទ្ធី ក្នុងទិសដៅពីកើតទៅលិចក្នុងល្បឿនលឿន ។ លុះមកដល់ចំណុចកើតហេតុ ដោយសារតែរូបគាត់ស្រវឹងខ្លាំងពេក ទើបបានជាជ្រុលចង្កូតទៅខាងស្ដាំបណ្ដាលឱ្យបុកប៉ុស្តិ៍យាម២៤ម៉ោង របស់នគរបាលខណ្ឌសែនសុខ បណ្តាលឱ្យវៀចដំបូលបន្តិច ដែលធ្វើឱ្យនគរបាលដែលប្រចាំការនៅក្នុងប៉ុស្តិ៍នោះ ភ័យលោះព្រលឹងរត់ចេញគ្រប់គ្នា ។
រថយន្តបង្កមិនទាន់អស់ល្បឿន បានជ្រុលទៅបុកបង្គោលភ្លើងបំភ្លឺផ្លូវ បណ្ដាលអោយបាក់ទ្រេត ចំណែកឯរថយន្តវិញខូចខាតផ្នែកខាងមុខខាងស្ដាំ តែមិនបង្កគ្រោះថ្នាក់ដល់អ្នកបើកបររថយន្តនោះទេ ។
បើតាមការនិយាយប្រាប់ពីនារីខាងលើឱ្យដឹងថា ដោយសារតែប្ដីគាត់មានស្រីលួចលាក់ ហើយគាត់តាមទាន់ជាន់កែង ទើបធ្វើរូបគាត់តូចចិត្តបានទៅផឹកស្រារហូតស្រវឹង បានបើករថយន្តទៅបុកបង្គោលភ្លើងបំភ្លឺផ្លូវ ដែលដាក់ជាប់ប៉ុស្ដិ៍សមត្ថកិច្ច២៤ម៉ោងបែប
នេះ ។
ក្រោយពេលកើតហេតុ នារីជាអ្នកបើករថយន្តបង្ក បានព្យាយាមបើករ៉ឺយែរថយន្តបម្រុងរត់គេច តែត្រូវសមត្ថកិច្ចនៅក្បែរនោះធ្វើការឃាត់បាន បែរជាស្ត្រីជាអ្នកបើករថយន្តបញ្ចេញចរិកឫកមិនសមរម្យ បានជេរប្រមាថសមត្ថកិច្ច ។ លុះពេលអ្នកយកព័ត៌មានទូរ ទស្សន៍ហង្សមាសទៅថតយករូបភាពរថយន្តបុកបង្គោលភ្លើង បែរជាស្ត្រីរូបនោះស្ទុះមកចាប់ប្រទាញប្រទង់អ្នកយកព័ត៌មាន និងវាយអ្នកយកព័ត៌មានដណ្តើមយកម៉ាស៊ីនថតបោកចោល ដោយស្ត្រីរូបនោះនិយាយថា ម៉ាស៊ីនថតនេះថ្លៃប៉ុន្មានបោកចោលមួយសង៤វិញ ។
ហេតុការណ៍គ្រោះថ្នាក់ចរាចរណ៍ខាងលើនេះ ធ្វើឱ្យផ្អើលមនុស្សម្នាចោមរោម ដោយសារតែស្ត្រីជាអ្នកបើករថយន្តបុកបង្គោលភ្លើងហើយបញ្ចេញកំហឹងដាក់សមត្ថកិច្ច និងអ្នកយកព័ត៌មានទៀត ទាល់តែសមត្ថកិច្ចចុះទៅឃាត់ខ្លួនស្ត្រីខាងលើ និងស្ទួចរថយន្តបង្កយកទៅដោះស្រាយនៅអធិការដ្ឋានខណ្ឌសែនសុខ ចំណែកអ្នកយកព័ត៌មានក៏បានដាក់ពាក្យបណ្តឹងពីបទហិង្សាដោយចេតនា។
ចែករំលែកព័តមាននេះ