រាជធានីភ្នំពេញ ៖ តារាកំប្លែងនាងអីុត កាលពីពេល ថ្មីៗកន្លងទៅបានសម្រួលចិត្តសម្រាប់ការបាត់ឱកាសចេញទៅសម្តែងនៅអាមេរិកក្នុងអំឡុងខែវិច្ឆិកា ។ មុននេះនាងអីុត ខណៈត្រៀមខ្លួនចេញទៅអាមេរិក នាងសម្រេច
រាជធានីភ្នំពេញ ៖ តារាកំប្លែងនាងអីុត កាលពីពេល ថ្មីៗកន្លងទៅបានសម្រួលចិត្តសម្រាប់ការបាត់ឱកាសចេញទៅសម្តែងនៅអាមេរិកក្នុងអំឡុងខែវិច្ឆិកា ។ មុននេះនាងអីុត ខណៈត្រៀមខ្លួនចេញទៅអាមេរិក នាងសម្រេច ផ្អាកការងារ ថ្មីៗដូចជាថតកុន ច្រៀងភ្លេងការ ព្រមទាំងការងារសិល្បៈដទៃទៀត ដោយរក្សាតែការងារចាស់មានកិច្ចសន្យាប៉ុណ្ណោះ។ នាងអីុតត្រូវអាណិកជននៅអាមេរិកជ្រើសរើសឱ្យទៅសម្តែង ដូច្នេះហើយទើបនាងត្រៀមខ្លួន ។ ការចេញទៅអាមេរិករបស់នាងអីុតខកខានដោយសារតែមានបញ្ហាខ្លះ ហើយតារាកំប្លែងរូបនេះហាក់សោកស្តាយដែរ ។
ឆ្លងឆ្លើយជាមួយអ្នកយកព័ត៌មានកោះសន្តិភាពគ្រាកំពុងចូលរួមពិធីក្រុងពលីខ្សែភាពយន្តរឿង «អាតួកូនឪ» នាពេល ថ្មីៗកន្លងមកនាងអីុត រៀបរាប់ថា ការចាកចេញទៅសម្តែង នៅទឹកដីអាមេរិករបស់នាងគ្រោងនៅខែវិច្ឆិកា ២០១៦ តែត្រូវខកខានទៅវិញ ។ មូលហេតុមកពីអាកាសធាតុមិនអំណោយផលនៅទីនោះ ជាកត្តាចម្បងបង្អាក់ដំណើរ ដោយមិនមែនមកពីអ្នកធានាខ្សោយរឿងរត់ការសុំទិដ្ឋាការទេ ។ យ៉ាងណាមិញនាងអីុតថា វាមិនថ្វីទេ ព្រោះពេលនេះជិតចូលដល់រដូវរៀបអាពាហ៍ពិពាហ៍ដែលនាងមានការងារមមាញឹក ។ គ្រាន់តែខកខានទៅអាមេរិកនាងអីុតមានគេកក់ភ្លេងការច្រើនរោង ព្រមទាំងទទួលថតភាពយន្ត ថ្មីៗទៀត។ លើសពីនេះនាងអីុតសម្តែងកំប្លែងជាមួយក្រុមការងារនៅស៊ីធីអិន ។
«តាមអ្វីដែលនាងខ្ញុំយល់ ការងារក្រៅស្រុក និងក្នុងស្រុក គឺមានកម្រិតប្រាក់ចំណូលប្រហាក់ប្រហែលគ្នា គ្រាន់តែអ្វីដែលប្លែក គឺយើងអត់ស្គាល់ស្រុកគេ បើបានទៅដូចបានឈ្វេងយល់ពីសេដ្ឋកិច្ច ភាពរីកចម្រើន ភាពជឿនលឿន ឬបានស្គាល់ខ្មែរនៅបរទេសដែលនេះជាបំណងរបស់នាងខ្ញុំ ។ ឱកាសទៅអាមេរិកសម្តែងនោះនៅតែមានដដែលទេ ដោយកម្មវិធីត្រូវលើកពេលទៅសម្តែងនៅអំឡុងចុងឆ្នាំ២០១៧ឯណោះ ដែលនេះអាចសល់ពេលច្រើនសម្រាប់រ៉ាប់រងការងារជួយចិញ្ចឹមកូន ចិញ្ចឹមអ្នកផ្ទះបន្តទៀត គ្មានអាក់អន់ចិត្ត ខូចចិត្តរឿងអត់បានទៅសម្តែងមួយនេះឡើយ»។ អីុតនិយាយបែបនេះ ។
តារាកំប្លែងនាងអីុត ខណៈអាជីពសិល្បៈលូតលាស់ នាងបានរៀបចំគម្រោងធ្វើផ្ទះស្កឹមស្កៃមួយនៅស្រុកកំណើតខេត្តកំពង់ស្ពឺទុកសម្រាប់ពេលនាងចាស់ ។ ប្រការបែបនេះហើយទើបនាងអីុតខិតខំរកប្រាក់សម្រេចក្តីប្រាថ្នារបស់នាង ។
រហូតមកទល់ពេលនេះនាងអីុតនៅមិនទាន់បើកចិត្តស្រឡាញ់បុរសណាទៀតទេក្រៅពីគិតអាជីពសិល្បៈ និងគិតគូរចិញ្ចឹមកូន ។ ទោះជាយ៉ាងណាក្តី ថ្មីៗកន្លងមកលេចឮថានាងអីុតបានបង្កាត់ភ្លើងស្នេហ៍ជាមួយបុរសអ្នកសិល្បៈម្នាក់តែនាងថាវាមិនមែនជារឿងពិតទេ ៕
ចែករំលែកព័តមាននេះ