បន្ទាប់ចុះបង្ក្រាប២ថ្ងៃជាប់គ្នា បទល្មើសនេសាទកក្រើកឡើងលើសដើម
ខេត្តកណ្តាល ៖ បន្ទាប់ពីគណៈកម្មាការចម្រុះ ចេញប្រតិបត្តិការបង្ក្រាបបទល្មើសនេសាទរយៈពេល២ថ្ងៃជាប់គ្នានៅលើផ្ទៃបឹងក្នុងស្រុកពញាឮ ស្រុកខ្សាច់កណ្តាល
ខេត្តកណ្តាល ៖ បន្ទាប់ពីគណៈកម្មាការចម្រុះ ចេញប្រតិបត្តិការបង្ក្រាបបទល្មើសនេសាទរយៈពេល២ថ្ងៃជាប់គ្នានៅលើផ្ទៃបឹងក្នុងស្រុកពញាឮ ស្រុកខ្សាច់កណ្តាល ស្រុកមុខកំពូល ស្រុកល្វាឯម ស្រុកកៀនស្វាយ ស្រុកកោះធំ និងស្រុកស្អាង ខេត្តកណ្តាលនាពេលកន្លងមកនេះ គេសង្កេតឃើញបទល្មើសនេសាទឡុកស្បៃមុងដែលប្រព្រឹត្តដោយពួកឈ្មួញធំៗ មានទាំងខ្មែរ និងវៀតណាម បានកក្រើកឡើងវិញយ៉ាងស្អេកស្កះពាសពេញលើផ្ទៃបឹងលើសដើម។
ការផុសឡើងនៃបទល្មើសនេសាទបន្ទាប់ពីគណៈកម្មាការចម្រុះខេត្តចុះបង្ក្រាបនាពេលកន្លងមកនេះ ដោយសារតែមានមន្ត្រីជំនាញ អាជ្ញាធរសមត្ថកិច្ចថ្នាក់ក្រោម គ្រប់ស្ថាប័នបានឃុបឃិតគ្នាជាប្រពន្ធ័នៅពីខាងក្រោយខ្នងនៃបទល្មើស។ បើតាមប្រភពព័ត៌មានពីក្រុមឈ្មួញដែលប្រព្រឹត្តបទល្មើសនេសាទត្រីខុសច្បាប់ទ្រង់ទ្រាយធំៗ នៅលើផ្ទៃបឹងត្រង់ចំណុចបឹងអន្លងគុជ បឹងអន្លង់ក្រពើ បឹងត្រឹបខ្លា ស្រុកកៀនស្វាយ បឹងអតីតឡូត៍នេសាទលេខ ៣.៤.៥.៦.៧ ស្រុកស្អាង ស្រុកកោះធំ និងស្រុកលើកដែក មួយចំនួនបានប្រើពាក្យសម្តីទាំងអំនួតដាក់អ្នកកាសែតថា ពួកគេដាក់នេះគឺបានបង់លុយឲ្យមន្ត្រីជំនាញ សមត្ថកិច្ចគ្រប់ស្ថាប័នក្នុងម្នាក់ចាប់ពី១៥ម៉ឺនទៅ៤០ម៉ឺនរៀល។
ដោយខ្លះយកទៅប្រគល់ឲ្យផ្ទាល់ដៃ ខ្លះទៀតក៏វេតាមវីងឲ្យហើយត្រឹមអ្នកកាសែតកំប៉ិកកំប៉ុក អត់មានកាំភ្លើងផង មកថតពួកគេមានអីត្រូវខ្លាច គឺខ្លាចតែមន្ត្រីជំនាញជលផល និងសមត្ថកិច្ចមានអាវុធតែប៉ុណ្ណោះ ចុះបើជំនាញសមត្ថកិច្ចថ្នាក់ក្រោមគ្រប់ស្ថាប័នពួកគេបង់លុយឲ្យអស់ហើយមានអីត្រូវខ្លាច ទោះបីថ្នាក់លើដែលមិនស្គាល់ភូមិសាស្ត្រចុះមកបង្ក្រាបក៏ថ្នាក់ក្រោមប្រាប់ឲ្យសារឡើង ឬពន្លិចទៅបាតដីរួចពួកគេ(មន្ត្រីថ្នាក់ក្រោម)អ្នកបើកទូកយីខេនាំផ្លូវបើកពង្វាងសំដៅទៅសារបស់អ្នកប្រព្រឹត្តបទល្មើសក្បែរៗខាង ឬអ្នកដែលមិនបានបង់លុយឲ្យពួកមន្ត្រីជំនាញសមត្ថកិច្ចទាំងនោះយកមកដុតកម្ទេចដើម្បីបំភ័ន្តភ្នែកថ្នាក់លើ។
ប្រភពដដែលបន្តទៀតថា ថ្នាក់លើធ្លាប់តែនៅក្នុងម៉ាស៊ីនត្រជាក់ស្រួលខ្លួនមិនដែលចុះមកនៅហាលថ្ងៃ ហាលខ្យល់ ក្នុងបឹងបានយូរទេ យ៉ាងច្រើនបានត្រឹមតែ២ទៅ៣ថ្ងៃឡើងទៅវិញបាត់អស់ហើយ ហើយពួកគេចាំតែស្តាប់សំឡេងទូរសព្ទ័ពីមន្ត្រីថ្នាក់ក្រោម អ្នកនាំផ្លូវប្រាប់ឲ្យដាក់ឬលើកឡើងវិញរួចជាស្រេច។ ដោយសារតែមានក្រុមមន្ត្រីពុករលួយខិលខូចថ្នាក់ក្រោមមួយចំនួនលួចឃុបឃិតគ្នាជាប្រពន្ធ័បង្កើតបទល្មើសបែបនេះហើយ ទើបធ្វើឲ្យថ្នាក់លើចុះមកបង្ក្រាប់ម្តងៗមិនដែលចាប់បានរបស់ពួកឈ្មួញធំៗមានទាំងខ្មែរ និងវៀតណាម ដាក់ទឹកជម្រៅ៤ទៅ៥ម៉ែត្រ សុទ្ធតែឧបករណ៍ទំនើបៗដាក់រាប់គីឡូដីបំផ្លិញបំផ្លាញកូនមច្ឆជាតិឲ្យវិនាសហិនហោចក្នុងមួយថ្ងៃៗរាប់តោន បង្ក្រាបមិនដែលបាន បែរជាបង្ក្រាបបានតែរបស់ពលរដ្ឋដាក់តូចតាចទឹករាក់ៗ។
ទង្វើបង្ក្រាបបទល្មើសនេសាទមិនស្មើភាពគ្នាបែបនេះ ធ្វើឲ្យពលរដ្ឋអស់ជំនឿលើមន្ត្រីថ្នាក់លើ ជាពិសេសប៉ះពាល់យ៉ាងធ្ងន់ធ្ងរដល់សតិអារម្មណ៍របស់ពលរដ្ឋដែលជាម្ចាស់ឆ្នោត។ ក្រុមមន្ត្រីថ្នាក់ក្រោមដែលឃុបឃិតគ្នាជាប្រពន្ធ័នេះ ក្រៅពីការពាក់ព័ន្ធនឹងអំពើពុករលួយយកលុយពីដៃសៃយ៉ឺនស្បៃមុង និងនាំជនជាតិវៀតណាមមកនេសាទខុសច្បាប់ហើយនោះ ក៏នៅមានការឃុបឃិតគ្នាដើរប្រមូលយកលុយពីក្រុមឈ្មួញដឹកជញ្ជូនផលនេសាទផ្សេងៗដូចជាកូនត្រីល្អិតតូចៗយកទៅធ្វើជាចំណីត្រីឆ្តោនិងពួកឈ្មួញដឹកសត្វព្រៃពស់ អណ្តើក ជាដើម។ នៅក្នុងឃុំប្រាសាទ ស្រុកស្អាងគឺសុទ្ធតែបានបង់លុយដាក់ខែ ឬឆ្នាំឲ្យក្រុមមន្ត្រីថ្នាក់ក្រោមនោះទាំងអស់។
ទាក់ទិនការរិះគន់ខាងលើលោក វ៉ិត ធារិទ្ធ នាយខណ្ឌរដ្ឋបាលជលផលខេត្តកណ្តាលបានឲ្យអ្នកយកព័ត៌មានយើងដឹងតាមទូរសព្ទ័នារសៀលថ្ងៃទី២៦ ខែតុលានេះថា ពាក់ពន្ធ័បទល្មើសអ្វីក៏ដោយ ការបង្ក្រាបមិនចេះអស់ទេ ហើយទទួលស្គាល់បទល្មើសនេសាទនៅតែកើតមានការបង្ក្រាបដូចជាវែកចក។ ប៉ុន្តែលោកសូមច្រានចោលចំពោះការចោទមន្ត្រីជលផលពាក់ពន្ធ័យកលុយពីបទល្មើសនិងករណីរើសអើងក្នុងការបង្ក្រាបបទល្មើសថា បង្ក្រាបតែអាតូច អាធំមិនបង្ក្រាបមិនមានទេ ហើយរូបលោកនិងបន្តសហការណ៍ជាមួយអាជ្ញាធរស្រុកចុះបង្ក្រាបជាប្រចាំ។ ចំពោះការដឹកជញ្ជូនបទល្មើសជលផលផ្សេងៗចាំរូបលោកចុះអង្កេតមើលច្បាប់អនុញ្ញាត ហើយលោកសូមឲ្យអ្នកសារព័ត៌មានជួយសហការណ៍បន្តទៀត។លោកនាយខណ្ឌប្រាប់ថា ការចុះបង្ក្រាបប៉ុន្មានថ្ងៃជាប់គ្នានេះគឺលោកចំណាយថវិកាផ្ទាល់ខ្លួនអស់ ២ទៅ៣ពាន់ដុល្លារហើយ៕
ចែករំលែកព័តមាននេះ