រាជធានីភ្នំពេញ ៖ កាលពីវេលាម៉ោង ០៨ និង៣០នាទីព្រឹក ថ្ងៃទី២៦ ខែតុលា ឆ្នាំ២០១៦ នៅខាងមុខរដ្ឋសភាជាតិ មានក្រុមសកម្មជនដីធ្លីដែលមកពីសហគមន៍បុរីកីឡា បឹងកក់
រាជធានីភ្នំពេញ ៖ កាលពីវេលាម៉ោង ០៨ និង៣០នាទីព្រឹក ថ្ងៃទី២៦ ខែតុលា ឆ្នាំ២០១៦ នៅខាងមុខរដ្ឋសភាជាតិ មានក្រុមសកម្មជនដីធ្លីដែលមកពីសហគមន៍បុរីកីឡា បឹងកក់ និងសហគមន៍បឹងកក់ចាកចេញ ចំនួនជាង៣០នាក់ ក្នុងគោលបំណងចង់ជួបអ្នកតំណាងរាស្ត្រចំនួនពីរូបគឺលោកជំទាវ ឡោក ខេង និងឯកឧត្តម ហ៊ុន ម៉ានី ដើម្បីជួយអន្តរាគមន៍ពន្លឿននូវការដោះស្រាយបញ្ហាទំនាស់ដីធ្លីដែលនៅសេសសល់ចំពោះពួកគាត់។ មិនតែប៉ុណ្ណោះពួកគាត់ក៏បាននាំគ្នាកាន់បដា និងយករូបថតរបស់លោក កែប ជុតិមា អតីតអភិបាលរាជធានីភ្នំពេញ យកទៅធ្វើពិធីដាក់បណ្តាសាទៅតាមជំនឿសាសនា និងការដុតរូបថតរបស់លោកទៀតផងនៅចំណុចរង្វង់មូលរូបសំណាកសម្តេចព្រះសង្ឃរាជ ជួន ណាត។
តំណាងសហគមន៍ម្នាក់បានថ្លែងថា ក្នុងពេលនេះដែរពួកគាត់បានលើកគ្នាមកកាន់រដ្ឋសភាជាតិនេះ មិនមានលិខិតស្នាមអ្វីឡើយគឺមកគ្រាន់តែមកសួរនាំ និងតាមដានថា តើរដ្ឋសភាជាតិទាំងពីរគណបក្សនឹងមានបានបញ្ជូនញត្តិរបស់ពួកគាត់ទៅកាន់ប្រឆាំងអំពើរពុករលួយ និងសាលារាជធានីភ្នំពេញដើម្បីធ្វើការដោះស្រាយបញ្ហាដីធ្លីដែលនៅសេសសល់ជូនដល់ពួកគាត់ដែរឬអត់ និងមានបំណងចង់ជួបលោកជំទាវ ឡោក ខេង និងឯកឧត្តម ហ៊ុន ម៉ានី អ្នកតំណាងរាស្ត្រមកពីគណៈបក្សប្រជាជនជួយធ្វើអន្តរាគមន៍ផងដែរ។
អ្វីដែលពួកគាត់ចង់បានគឺសម្រាប់គ្រួសារដែលទទួលបានលុយចំនួន៨ពាន់ដុល្លារ និង២លានរៀលនោះ ទាមទារសុំផ្ទះដែលមានទំហំ៤ម៉ែត្រ គុណនឹង១៨ម៉ែត្រ នៅក្នុងតំបន់បឹងកក់ ហើយចំណែកឯអ្នកដែលទទួលបានផ្ទះនៅដំណាក់ត្រយឹង ខេត្តកំពង់ស្ពឺដែលជាសំណង់គ្មានគុណភាពនិងធ្លាក់ខ្លួនក្រលំបាកជំពាក់បំណុលគេយ៉ាងច្រើននោះគឺ ទាមទារប្រាក់សំណងបន្ថែមចំនួន២ម៉ឺនដុល្លារដែលមានចំនួនតែពីរចំណុចនេះទេ។ កន្លងមកនេះសាលារាជធានីភ្នំពេញបានធ្វើសលាកបត្រព័ត៌មានជូនដល់ពួកគាត់ថា តើមានមនុស្សប៉ុន្មាននាក់ដែលត្រូវការដំណោះស្រាយជាប្រាក់ ហើយប៉ុន្មាននាក់ត្រូវការដំណោះស្រាយជាផ្ទះ រហូតមលដល់នឹងពេលនេះពួកគាត់មួយចំនួនទៀតនៅមិនទាន់មានការដោះស្រាយនៅឡើយ។
ដោយតាំងពីជំនាន់លោក កែប ជុតិមា ជាអភិបាលរាជធានីភ្នំពេញមកម្លេះ រហូតមកដល់នឹងជំនាន់លោក ប៉ា សុជាតិវង្ស ទៀត បញ្ហាដិធ្លីរបស់ពួកគាត់នៅតែមិនទាន់មានការដោះស្រាយនៅឡើយ ជាក់ស្តែងដូចជានៅតំបន់ជ្រោយចង្វារជាដើមគឺ មិនទាន់នឹងមានការដោះស្រាយផង ក៏មានការឈូសកម្ទេចផ្ទះរបស់ប្រជាពលរដ្ឋយ៉ាងដូច្នោះដែរ។ អ្នកតំណាងដដែលបានថ្លែងបន្តទៀតថា មិនតែប៉ុណ្ណោះនៅតំបន់ព្រែកព្នៅនាពេលកន្លងមកនេះ ក៏មានការឈូសផ្ទះប្រជាពលរដ្ឋដោយមិនទាន់នឹងមានសំណងត្រឹមត្រូវផង ដោយចាំធ្វើការដោះស្រាយសំណងឲ្យបានសមរម្យសិន ចាំធ្វើការបណ្តេញប្រជាពលរដ្ឋឲ្យចេញទាំងបង្ខំ និងទៅតាមគ្រប់រូបភាពទាំងអស់ ដោយធ្វើឲ្យប្រជាពលរដ្ឋយើងរងគ្រោះក្រោមការអភិវឌ្ឍដោយស្របច្បាប់ តែប៉ុណ្ណោះ។
ប្រសិនបើរាជរដ្ឋាភិបាលធ្វើការអភិវឌ្ឍន៍ដើម្បីប្រជាពលរដ្ឋ ដើម្បីឲ្យប្រទេសរបស់យើងមានការជឿនលឿនមែននោះ គួរតែធ្វើការផ្តល់នូវសំណងទៅដល់ប្រជាលរដ្ឋឲ្យបានសមរម្យ ហើយចាំឲ្យប្រជាពលរដ្ឋចាកចេញពីផ្ទះសម្បែងទៅ។ មិនត្រូវផ្តល់សំណងឲ្យប្រជាពលរដ្ឋមិនសមរម្យ ហើយធ្វើការឈូសបំផ្លាញ ហាក់បីដូចជាប្លន់ដី ប្លន់ផ្ទះ និងធ្វើបាបប្រជាពលរដ្ឋឲ្យរងការលំបាកបែបនេះទេ។ ជាក់ស្តែងមកទល់នឹងពេលនេះពួកគាត់នៅតែមិនទាន់មានដំណោះស្រាយដដែល ហើយពួកគាត់ក៏អស់ជំនឿក្នុងការរដោះស្រាយជាមួយនឹងសាលារាជធានីភ្នំពេញផងដែរ។
មុនពេលដែលក្រុមសកម្មជនដីធ្លីដែលមកពីតាមបណ្តាសហគមន៍ទាំងបីខាងលើនេះមកដល់ខាងមុខរដ្ឋសភាជាតិនោះ ពួកគាត់ក៏បានធ្វើការជួបជុំគ្នានៅចំណុចរង្វង់មូលរូបសំណាកសម្តេចព្រះសង្ឃរាជ ជួន ណាត ដើម្បីធ្វើការដង្ហែដាក់បណ្តាសាទៅលើរូបលោក កែប ជុតិមា អតីតអភិបាលរាជធានីភ្នំពេញទៅតាមពិធីសាសនា មានការដុតធូប ទៀន និងដុតរូបថតរបស់លោផងដែរ។ ការលើកគ្នាមកកាន់មុខរដ្ឋសភាជាតិដើម្បីសុំជួប និងការអន្តរាគមន៍ពីលោកជំទាវ ឡោក ខេង និង ឯកឧត្តម ហ៊ុន ម៉ានី អ្នកតំណាងរាស្ត្រមកពីគណបក្សប្រជាជន តែមិនមមានវត្តមានអ្នកទាំងពីរចេញមកជួបឡើយ មានតែលោក ហូ វ៉ាន់ អ្នកតំណាងរាស្ត្រមកពីគណៈបក្សសង្គ្រោះជាតិមកជួប ទើបធ្វើការរំសាយទៅវិញ៕
ចែករំលែកព័តមាននេះ