គ្រូសារកូនភ្លោះ៣នាក់ទី៣០១ ទទួលអំណោយមនុស្សធម៌របស់សម្ដេចតេជោ
ខេត្តព្រះសីហនុ ៖ គ្រួសារមានកូនភ្លោះចាប់ពី៣នាក់ឡើងទៅ ត្រូវបានសម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចាត់ទុកថាជាកូន
ខេត្តព្រះសីហនុ ៖ គ្រួសារមានកូនភ្លោះចាប់ពី៣នាក់ឡើងទៅ ត្រូវបានសម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ចាត់ទុកថាជាកូន ឬជាចៅសម្ដេច។ ឯកឧត្ដម សេង ទៀង ជំនួយការសម្ដេចតេជោ និងជានាយករងខុទ្ទកាល័យសម្ដេចតេជោនាយករដ្ឋមន្ត្រី បានចុះសួរសុខទុក្ខ និងយកអំណោយមនុស្សធម៌របស់សម្តេចអគ្គសេនាបតីតេជោ ហ៊ុន សែន និងសម្ដេចកិតិ្ដព្រឹទ្ធបណ្ឌិត ប៊ុន រ៉ានី ផ្ដល់ជូនគ្រួសារសម្រាលកូនដំបូង បានកូនភ្លោះ៣នាក់ ដែលមានឪពុកឈ្មោះ សេក សាអ៊ីម ជនជាតិខ្មែរ អាយុ៣៤ឆ្នាំ និងម្ដាយ ប្រាក់ កញ្ញា ជនជាតិខ្មែរ អាយុ២៩ឆ្នាំ មុខរបរជាអ្នកបម្រើនៅអាហារដ្ឋាននៅក្រុងព្រះសីហនុ មានទីលំនៅបន្ទប់ជួលស្ថិតក្នុងភូមិ១ សង្កាត់លេខ៤ ក្រុង-ខេត្ដព្រះសីហនុ។
នាថ្ងៃទី២៦ ខែតុលា ឆ្នាំ២០១៦។ ឯកឧត្ដម បានមានប្រសាសន៍ថា នេះជាអំណោយមនុស្សធម៌របស់សម្ដេចតេជោ និងសម្ដេចកិត្ដព្រឹទ្ធបណ្ឌិតផ្ទាល់ មិនមែនជាអំណោយរាជរដ្ឋាភិបាល ឬគណៈបក្សនយោបាយទេ គឺជាអំណោយមនុស្សធម៌របស់សម្ដេចទាំងពីរផ្ដល់ជូនដល់ប្រជាពលរដ្ឋទាំងអស់ ដែលមានកូនភ្លោះ៣នាក់ ដោយមិនប្រកាន់ជាតិសាសន៍ សាសនា ឬនិន្នាការនយោបាយឡើយ។ ឯកឧត្ដមបន្ដថា អំណោយមនុស្សធម៌នេះ មានថវិកាចំនួន៤លានរៀល ទឹកដោះគោ២កេះ សារ៉ុង២ ក្រមា២ ក្នុងនោះអភិបាលក្រុងព្រះសីហនុចូលរួមបន្ថែម ១០០ដុល្លារ និងអភិបាលខេត្ដព្រះសីហនុ អង្ករ២០០គីឡូក្រាមទៀតផង។
គួររំឭកផងដែរថា នៅខេត្ដព្រះសីហនុ តែងតែមានសប្បុរសជនស្រឡាញ់ការងារមនុស្សធម៌ បានបន្ដចូលរួមក្នុងការធ្វើទានចែករំលែកដល់ប្រជាពលរដ្ឋដែលមានជីវភាពក្រីក្រ ជួបឧប្បទ្ទវហេតុផ្សេងៗ ជាពិសេសប្រជាពលរដ្ឋ ដែលមកទទួលសេវាសុខភាពនៅមន្ទីរពេទ្យបង្អែកខេត្ដព្រះសីហនុនេះតែម្ដង។ គ្រួសារកូនភ្លោះ៣នាក់នេះ ក៏បានទទួលអំណោយមនុស្សធម៌ពីសប្បុរសជន នៅពេលដែលកំពុងសម្រាលនៅមន្ទីរពេទ្យបង្អែកខេត្តព្រះសីហនុ។ គួរបញ្ជាក់ថា កូនភ្លោះទាំងបីខាងលើបានសម្រាលដោយការវះកាត់ នៅវេលាម៉ោង៧និង២០នាទី ព្រឹកថ្ងៃទី១៥ ខែតុលា ឆ្នាំ២០១៦ នៅមន្ទីរពេទ្យបង្អែក ខេត្តព្រះសីហនុហើយរហូតមកទល់ពេលនេះទាំងម្តាយ និងទារកមានសុខភាពជាប្រក្រតី៕
ចែករំលែកព័តមាននេះ