ខេត្តកំពង់ឆ្នាំង ៖ ប្រជាពលរដ្ឋ រស់នៅភូមិថ្មី ឃុំក្រាំងលាវ ស្រុករលាប្អៀរ ចំនួន៧៧គ្រួសារ បានសម្ដែងការព្រួយបារម្មណ៍ថា ដីធ្វើស្រែរបស់ពួកគាត់ចំនួនជាង៣០០ហិកតា ដែលពួកគាត់កាន់កាប់ធ្វើស្រែជាច្រើនឆ្នាំណាស់មកហើយ មានខ្លះតាំងពីឆ្នាំ១៩៩៣ មកដល់ពេលនេះ។ នៅឆ្នាំ២០១៣ ត្រូវបានក្រុមនិស្សិតរបស់សម្តេចតេជោ ហ៊ុន សែន ចុះវាស់វែងដីធ្លី ចែកជូនប្រជាពលរដ្ឋ ក៏ត្រូវបាន វាស់វែងជូនពួកគាត់ដែរ ប៉ុន្តែមកដល់ពេលនេះ ពួកគាត់បានត្រឹមតែសាលាកបត្រដែលបញ្ជាក់ពីក្រុមនិស្សិត និងមន្ត្រីសុរិយោដីដែលបានចុះវាស់វែងតែប៉ុណ្ណោះ។
ពួកគាត់មិនទាន់បានទទួលបណ្ណ័កាន់កាប់ដីធី្ល នៅឡើយទេ ដោយថ្មីៗនេះ មន្ត្រីសុរិយោដី បានប្រាប់ថា ជាដីទំនាស់មិនចេញបណ្ណ័កាន់កាប់ឲ្យឡើយ។ ដោយហេតុនេះហើយគឺ មានតែសុំសំណូមពរទៅសម្តេចតេជោ ហ៊ុនសែន តែប៉ុណ្ណោះ។ ព្រោះបើមិនដូចឆ្នោះទេមន្ត្រីជំនាញ នឹងឃុបឃិតគ្នា ធ្វើឯកសារប្រគល់ដីរបស់ពួកគាត់ដែលបានកាន់កាប់ និងអាស្រ័យផលជាយូឆ្នាំណាស់មកហើយ ទៅឲ្យអ្នក មានលុយ និងអំណាចជាពុំខានឡើយ។
ប្រជាពលរដ្ឋទាំងនោះមានខ្លះជាជនពិការ បានលើកឡើងថា ពួកគាត់បានធ្វើស្រែលើដីរបស់ខ្លួន នៅឆ្នាំ១៩៩៣ តែមិនទាន់បានបណ្ណ័កម្មសិទ្ធិ តែនៅឆ្នាំ២០១៣ ក្រុមនិស្សិត សម្តេចតេជោ ហ៊ុន សែន បានចុះវាស់វែង ចែកដីធ្លីជូនប្រជាពលរដ្ឋទូទាំងប្រទេស។ ពួកគាត់ជាអ្នករស់នៅភូមិថ្មី ឃុំក្រាំលាវ ក៏ត្រូវបានក្រុមនិស្សិត វាស់ឲ្យពួកគាត់ដែរ តែមកដល់ពេលនេះ ពួកគាត់មិនទាន់បានបណ្ណ័កាន់កាប់នៅឡើយទេ គឺបានត្រឹមតែសាលាកបត្រប៉ុណ្ណោះ។
បុរសជាជនពិការ២នាក់បានប្រាប់ថា គាត់បានធ្វើដីស្រែរបស់គាត់តាំងពីឆ្នាំ១៩៩១ មកដល់ពេលនេះមិនដែលមានអ្នកណាមកហាមឃាត់អីឡើយ ក្រោយពីសម្តេច ចេញអនុសាសន៍ ឲ្យក្រុមនិស្សិត ចុះវាស់វែងមក ស្រាប់តែមានក្រុមមកតវ៉ាថាជាដីរបស់គេទៅវិញ ហើយសុទ្ធតែថ្នាក់ឯកឧត្តមទៅទៀត។ ពួកគាត់ថា មន្ត្រីសុរិយោដីស្រុករលាប្អៀរ លោក សួង សែ ប្រាប់ពួកគាត់ជាប្រជាពលរដ្ឋថា ថ្វីបើក្រុមនិស្សិតវាស់មែន តែដីមានទំនាស់មិនអាចចេញប្លង់ឲ្យឡើយ។
បងស្រីម្នាក់ថា គាត់ធ្វើស្រែនៅទីនេះ តាំងពីឆ្នាំ១៩៨៥ តាំងពីគាត់នៅក្រមុំ មកដល់ពេលនេះមានទាំងកូន មានដល់ទៅចៅទៀត ចុះហេតុ អីគាត់ធ្វើស្រែច្រើនឆ្នាំកន្លងមកមិនដែលមានអ្នកណាមកហាមឃាត់គាត់ឡើយ ទើបតែមកមាននៅពេលនេះទៅវិញ។ ពាក់ពន្ធ័ដល់បញ្ហានេះ លោកប្រធានការិយាល័យដែនដីនគររូបនីយកម្ម និងសំណង់ និងភូមិបាលស្រុករលាប្អៀរ លោក សួង សែ បានប្រាប់តាមទូរសព្ទ័ថា រឿងពិតវាយ៉ាងនេះមែនហើយ ថ្វីបើប្រជាពលរដ្ឋទាំង៧៧គ្រួសារ មានសាលាកបត្រវាស់វែងដោយក្រុមនិស្សិតពិតមែន តែនៅពេលបិទប្រកាសបើគ្មានការតវ៉ាទេ ទើបខាងសុរិយោដីចេញបណ្ណ័កម្មសិទ្ធិឲ្យ ប៉ុន្តែពេលបិទប្រកាស មានម្ចាស់ដីគេមកតវ៉ា ទើបខាងមន្ត្រីជំនាញផ្អាកការចេញបណ្ណ័ឲ្យ។
ចំពោះការទៅបោះបង្គោលប៉ុន្មានថ្ងៃមុននេះ គឺដោយសារ ភាគីម្ខាងទៀត បានស្នើសុំបោះបង្គោលដីនៅតំបន់នោះ ព្រោះចង់ដឹងថា ប្រជាពលរដ្ឋណាខ្លះ ចេញមុខតវ៉ាថាមានដី ស្រែធ្វើនៅទីនោះ ហើយប្រជាពលរដ្ឋណាខ្លះ ដែលគ្មានដី ដើម្បីមកតទល់ដោះស្រាយគ្នាបញ្ចប់រឿង។ ព្រោះបើមិនដូច្នេះ ខាងប្រជាពលរដ្ឋក៏មិនបានប្លង់ដី ខាងភាគីម្ខាងទៀត ក៏មិនបានប្លង់ដីដែរ។ ខាងមុខនេះ ភាគីម្ខាងទៀត នឹងមកសុំជួបជុំ ប្រជាពលរដ្ឋដែលអះអាងថា ជាម្ចាស់ដីដើម្បីសម្របសម្រួលនឹងដោះស្រាយគ្នាបញ្ចប់រឿង៕
ចែករំលែកព័តមាននេះ