បុរសម្នាក់បានរងរបួសធ្ងន់ ហើយត្រូវបានសាច់ញាតិបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ខណៈពេលស៊ីឈ្នួលរាស់ (វា.យ) ដី ឱ្យប្រជាពលរដ្ឋម្នាក់ លុះបើកបរចុះឡើងៗ ក៏ស្រាប់តែជាន់ពីលើមីនតោន
ខេត្តប៉ៃលិន ៖ បើតាមសេចក្តីរាយការណ៍បានឱ្យដឹងថា បុរសម្នាក់បានរងរបួសធ្ងន់ ហើយត្រូវបានសាច់ញាតិបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ខណៈពេលស៊ីឈ្នួលរាស់ (វា.យ) ដី ឱ្យប្រជាពលរដ្ឋម្នាក់ លុះបើកបរចុះឡើងៗ ក៏ស្រាប់តែជាន់ពីលើមីនតោនដែលនៅសេសសល់កាលពីសម័យសង្គ្រាម ធ្វើឱ្យផ្ទុះឡើងកក្រើករងរបួសធ្ងន់ និងខូចត្រាក់ទ័រខ្ទេចទាំងស្រុងតែម្តង។
សេចក្តីរាយការណ៍បន្តថា ហេតុការណ៍ប្រជាពលរដ្ឋស៊ីឈ្នួលរាស់ដី (វា.យ) ដី ជាន់លើគ្រាប់មីនតោនផ្ទុះរងរបួសធ្ងន់នេះ បានកើតឡើងនៅវេលាម៉ោង១១និង០០នាទីព្រឹក ថ្ងៃទី១៥ ខែឧសភា ឆ្នាំ២០២២ នៅចំណុចទល់មុខបន្ទាយយោធា ស្រែម្អម ស្ថិតក្នុងភូមិភ្នំស្ពង់ ឃុំសាលាក្រៅ ស្រុកសាលាក្រៅ ខេត្តប៉ៃលិន ។
បើតាមប្រភពព័ត៌មានបានឱ្យដឹងថា ៖ ជនរងគ្រោះខាងលើមានឈ្មោះ មឿន សិលា ភេទប្រុសអាយុ២៥ឆ្នាំ មុខរបរបើកត្រាក់ទ័រ រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ដោយរងរបួសដាច់ជើងខាងឆ្វេង របួសពេញដងខ្លួន និងបែកក្បាល ស្ថិតក្នុងស្ថានភាពធ្ងន់ធ្ងរ។
ប្រភពដដែលបន្តថា មុនពេលកើតហេតុ គេបានឃើញជនរងគ្រោះខាងលើ បានបើកត្រាក់ទ័រស៊ីឈ្នួលវា.យដី ឱ្យប្រជាពលរដ្ឋក្នុងភូមិម្នាក់ឈ្មោះ ឃួន សុធា ភេទប្រុស អាយុ៤០ឆ្នាំ រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ ខេត្តប៉ៃលិន ដែលជាអ្នកជួលដីស្រែពីអ្នកភូមិផ្សេងទៀតដែរ។
ប្រភពដដែលបន្តទៀតថា លុះពេលរាស់ដីតាំងពីព្រឹក រហូតដល់ម៉ោង១១ ស្រាប់តែត្រាក់ទ័រផុងដីសើមក្បែរភ្លឺស្រែ បណ្តាលឱ្យកង់លិចទៅប៉ះជាមួយនឹងគ្រាប់មីនតោន ដែលនៅសេសសល់កាលពីសម័យសង្គ្រាមកប់ក្នុងដី បណ្តាលឱ្យផ្ទុះលាន់យ៉ាងកក្រើករងរបួសធ្ងន់ បង្កឱ្យមានការភ្ញាក់ផ្អើលតែម្តង។
ប្រភពដដែលបញ្ជាក់ថា ហើយគ្រានោះ ជនរងគ្រោះបានខ្ទាតចេញពីលើត្រាក់ទ័រជាច្រើនម៉ែត្រ សន្ល.ប់នៅលើវាលស្រែតែម្តង។
បច្ចុប្បន្ន ជនរងគ្រោះត្រូវបានសាច់ញាតិដឹកតាមរថយន្តសង្គ្រោះបន្ទាន់នៅមន្ទីរពេទ្យបង្អែកខេត្តប៉ៃលិន តែដោយសារសភាពធ្ងន់ធ្ងរពេក ក៏ប្រញាប់ដឹកជនរងគ្រោះបញ្ជូនបន្តទៅមន្ទីរពេទ្យខេត្តបាត់ដំបង។
សូមបញ្ជាក់ថា ៖ នៅត្រង់ចំណុចដីស្រែខាងលើ ត្រូវបានគេរាវរកគ្រាប់មីនរួចរាល់អស់ហើយ ប៉ុន្តែមិនដឹងជាយ៉ាងណា យូរៗម្តង ស្រាប់តែមានករណីផ្ទុះគ្រាប់មីនតោនរងរបួស និងខូចខាតត្រាក់ទ័រអស់មួយចំនួន ដែលធ្វើឱ្យប្រជាពលរដ្ឋមានការខ្លាចរអារយ៉ាងខ្លាំង ក៏សំណូមពរឱ្យខាងក្រុមការងារកំចាត់មីន ចុះទៅពិនិត្យ និងរាវរកគ្រាប់មីនបន្តទៀត ដើម្បីជួយដល់កសិករឱ្យមានសុវត្ថិភាពផងដែរ៕
ចែករំលែកព័តមាននេះ