ជនជាតិថៃម្នាក់ ដែលល្បីល្បាញដើរគាស់ផ្ទះប្រជាពលរដ្ឋខ្មែរ រួចចូលលួចយកទ្រព្យសម្បត្តិដ៏កក្រើកនៅក្នុងអាណាចក្រឃុំស្នឹង ស្រុកបាណន់ និងស្រុកដទៃទៀត ហើយត្រូវបាន
ខេត្តបាត់ដំបង ៖ ជនជាតិថៃម្នាក់ ដែលល្បីល្បាញដើរគាស់ផ្ទះប្រជាពលរដ្ឋខ្មែរ រួចចូលលួចយកទ្រព្យសម្បត្តិដ៏កក្រើកនៅក្នុងអាណាចក្រឃុំស្នឹង ស្រុកបាណន់ និងស្រុកដទៃទៀត ហើយត្រូវបានកម្លាំងការិយាល័យនគរបាលព្រហ្មទណ្ឌកំរិតស្រាល នៃស្នងការខេត្ត ធ្វើការស្រាវជ្រាវរហូតឃាត់ខ្លួនបាននោះ ពេលនេះត្រូវបានបង្ហាញមុខ ដើម្បីឱ្យមហាជនបានស្គាល់ នៅព្រឹកថ្ងៃទី១៥ ខែឧសភា ឆ្នាំ២០២២ មុនពេលរៀបចំសំណុំរឿងបញ្ជូនទៅតុលាការ។
តាមរយៈរបាយការណ៍នៃការិយាល័យព្រហ្មទណ្ឌកំរិតស្រាល ជនសង្ស័យម្នាក់នេះមានឈ្មោះ ថាវី ណងនុត ហៅ មូ ភេទប្រុស អាយុ៤៦ឆ្នាំ មានស្រុកកំណើតនៅស្រុកបាងកាក់ធុម ខេត្តភិស្នុលោក ប្រទេសថៃ។ ប៉ុន្តែចោរអន្តោរប្រវេសរូបនេះ បានចូលមកស្នាក់នៅគ្មានច្បាប់ទម្លាប់ក្នុងប្រទេសកម្ពុជា អស់រយៈពេល០៥ឆ្នាំកន្លងមកហើយ គឺស្នាក់នៅភូមិចម្លាងរម៉ាំងក្រោម ឃុំអូរសំរល ស្រុកសំឡូត ដែលបានប្រពន្ធជនជាតិខ្មែរនៅទីនេះ ដោយប្រកបមុខរបរធ្វើ «ចោរ»។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង ដែលដឹកនាំកិច្ចប្រតិបត្តិការនេះ ផ្ទាល់ ក្រោមបទបញ្ជារបស់លោកស្នងការខេត្ត បាននិយាយថា ជនសង្ស័យម្នាក់នេះ ត្រូវកម្លាំងរបស់លោកធ្វើការស្រាវជ្រាវរហូតឃាត់ខ្លួនបាន នៅរសៀលថ្ងៃទី១៣ ខែឧសភា ខណៈពេលកំពុងធ្វើដំណើរដល់ត្រង់ចំណុចភូមិភ្ជាវ ឃុំត្រែង ស្រុករតនមណ្ឌល ពោលគឺបន្ទាប់ពីកំពូលចោរគាស់ផ្ទះឆ្លងប្រទេសរូបនេះ ធ្វើសកម្មភាពគាស់ផ្ទះពលរដ្ឋម្នាក់កាលពីជាងមួយសប្ដាហ៍មុននេះ នៅក្នុងទឹកដីឃុំស្នឹង ស្រុកបាណន់។
លោកបានប្រាប់ថា បន្ទាប់ពីត្រូវឃាត់ខ្លួននាំយកទៅសួរនាំនៅការិយាល័យជំនាញ ជននេះបានសារភាពទទួលស្គាល់ថា ខ្លួនពិតជាបានធ្វើសកម្មភាពគាស់ផ្ទះប្រជាពលរដ្ឋលួចទ្រព្យសម្បត្តិគេមែន គឺធ្វើបានចំនួន០២លើក។
បើតាមរបាយការណ៍ដែលបានស្រង់ចម្លើយសារភាពរបស់ជនជាតិសៀមម្នាក់នេះ ជនសង្ស័យឈ្មោះ ថាវី ណងនុត ហៅ មូ បានសារភាពថា ខ្លួនធ្លាប់ធ្វើសកម្មភាពគាស់ផ្ទះគេ ចូលលួចទ្រព្យសម្បត្តិបានចំនួន០២លើក។ ដោយលើកទី១ នៅយប់ថ្ងៃទី១៩ ខែមេសា នៅចំណុចភូមិតាគ្រក់ ឃុំត្រែង ស្រុករតនមណ្ឌល មានម្ចាស់ផ្ទះឈ្មោះ ឆោម សំអាត ភេទប្រុស អាយុ៥២ឆ្នាំ ។ ហើយជនរងគ្រោះបាត់បង់ ខ្សែ.កមាស០៥ជី បន្ដោងមាស០៥ជី កងដៃប្លាទីន០៥ជី ខ្សែ.កប្លាទីន០៤ជី ចិញ្ចៀនប្លាទីនដាំត្បូង០១វង់ ចិញ្ចៀនប្លាទីនស្នាយ០១វង់ ចិញ្ចៀនពេជ្រ០១តំលៃ២,៨០០ដុល្លារ ប្រាក់ដុល្លាចំនួន២០០ដុល្លារ និងប្រាក់ខ្មែរចំនួន១០ម៉ឺនរៀល។
ចំណែកលើកទី២វិញ នៅវេលាទៀបភ្លឺថ្ងៃទី០៥ ខែឧសភា នៅចំណុចភូមិគរ ឃុំស្នឹង ស្រុកបាណន់ ដែលមានម្ចាស់ផ្ទះឈ្មោះ សាន សុខា ភេទស្រី អាយុ៤០ឆ្នាំ ជាអាជីករលក់សាច់ជ្រូក។ ហើយទ្រព្យសម្បត្តិដែលបាត់បង់រួមមាន ៖ ខ្សែ.កមាស០១តម្លឹង ខ្សែដៃមាស០១តម្លឹង ចិញ្ចៀនមាស០៥ជី ប្រាក់ខ្មែរចំនួន៥,៣លានរៀន និងប្រាក់ដុល្លារចំនួន១,០៥០ដុល្លារ។
ក្រៅពីនេះ ជនសង្ស័យខាងលើនេះ មិនបានឆ្លើយទទួលស្គាល់ថា ខ្លួនបានប្រព្រឹត្តនោះទេ។ ដូចជា ករណីគាស់ផ្ទះគ្រូពេទ្យម្នាក់ឈ្មោះ ម៉េង គឹមហួយ រស់នៅភូមិសំរោង ឃុំស្នឹង ស្រុកបាណន់ កាលពីព្រឹកថ្ងៃទី១៥ ខែមីនា កន្លងទៅនេះ ដែលបាត់បង់ទ្រព្យសម្បត្តិយ៉ាងច្រើនសន្ធឹកសន្ធាប់ តែជននេះបានបដិសេធថា «ខ្លួនមិនបានធ្វើសកម្មភាពគាស់ផ្ទះគ្រូពេទ្យនេះទេ»។
ប៉ុន្តែបើតាមប្រវត្តិសង្ខេបជនជាតិថៃឈ្មោះ ថាវី ណងនុត ហៅ មូ ដែលសមត្ថកិច្ចធ្លាប់តាមកំណត់ជាមុខសញ្ញា «ចោរ» គាស់ផ្ទះ និងធ្លាប់ចាប់ខ្លួនបានម្ដងផងនោះ គឺកាលដើមឡើយ ជននេះធ្លាប់ជាប់ពន្ធនាគារនៅប្រទេសកំណើតខ្លួនរយៈពេល០២ឆ្នាំ ពីបទ «ចោរកម្ម»។ ប៉ុន្តែក្រោយចេញពីពន្ធនាគារ ជននេះបានឆ្លងដែនមករស់នៅស្រុកខ្មែរ តាមរយៈប្រើប្រាស់ប័ណ្ណឆ្លងដែនស្របច្បាប់។
បើតាមសមត្ថកិច្ច បាននិយាយថា ការស្នាក់នៅក្នុងស្រុកខ្មែររបស់ជនជាតិថៃម្នាក់នេះពីមួយឆ្នាំទៅមួយឆ្នាំ បានចាប់ផ្ដើមមានបក្សពួកជាជនជាតិខ្មែរ ដែលមានសមាសភាពសុទ្ធតែជាមុខសញ្ញា «ចោរ» ហើយជំនាញពួកគេ គឺដើរគាស់ផ្ទះប្រជាពលរដ្ឋស្ទើរគ្រប់ទីកន្លែង ដែលកាលនោះ ក្រុមនេះមានរថយន្តជិះធ្វើសកម្មភាពទៀតផង។ កាលពីពេលកន្លងទៅ លោកចោរសៀមម្នាក់នេះ ធ្លាប់ត្រូវបានសមត្ថកិច្ចចាប់ខ្លួនបានម្ដង ក្នុងបទល្មើសគាស់ផ្ទះនេះ តែកាលនោះ ជននេះបានរត់រួចផុតពីដៃសមត្ថកិច្ចវិញ និងបានគេចខ្លួនបាត់ដំណឹងឈឹងរហូតមក ខណៈពេលសមត្ថកិច្ចបានតាមស៊ើបរកមុខជននេះរហូតដែរ។
ប៉ុន្តែបើទោះជាជននេះ បានព្យាយាមរត់គេចខ្លួនពូនអាត្មាយ៉ាងណាក្ដី បន្ទាប់ពីមានករណីគាស់ផ្ទះប្រជាពលរដ្ឋនៅភូមិគរ ឃុំស្នឹង ស្រុកបាណន់ កាលពីថ្ងៃទី០៥ ខែឧសភា នេះ និង ក្រោយពីជនរងគ្រោះបង្អុលបង្ហាញពីភិនភាគនៃជនល្មើស ទើបមន្ត្រីការិយាល័យជំនាញ ដាក់ការសង្ស័យភិនភាគខាងលើនេះ ទៅលើលោកចោរជនជាតិសៀមម្នាក់នេះ ដែលមន្ត្រីជំនាញធ្លាប់ចាប់ខ្លួនបានម្ដង។
លោក ឈឿង គឹមសុង បានបញ្ជាក់ថា ជារឿយៗជនជាតិថៃម្នាក់នេះ តែងតែដើរធ្វើសកម្មភាពគាស់ផ្ទះតែម្នាក់ឯង ក្រោយពីបែកហ្វូង។ ហើយកម្លាំងរបស់លោកបានធ្វើការស៊ើបអង្កេតជាប្រចាំ ដើម្បីស្វែងរកទីជម្រកដែលជននេះលាក់ខ្លួន រហូតលេចភិនភាគជននេះធ្វើសកម្មភាពចុងក្រោយ ទើបយើងស្រាវជ្រាររហូតឃាត់ខ្លួនជននេះបានជាថ្មីម្ដងទៀត។ យ៉ាងណាក៏ដោយ ជននេះបានសារភាពទទួលស្គាល់នូវទង្វើរបស់ខ្លួនហើយ។ ពេលនេះ មន្ត្រីជំនាញកំពុងសួរនាំ ដើម្បីចងក្រងសំណុំរឿងបញ្ជូនទៅសាលាដំបូងខេត្ត៕
ចែករំលែកព័តមាននេះ