ខេត្តមណ្ឌលគិរី ៖ មហាជនរស់នៅខេត្តមណ្ឌលគិរី ដែលនិយមលេងបណ្តាញសង្គម Facebook កំពុងមានការចាប់អារម្មណ៏យ៉ាងខ្លាំង ក្រោយមានគណនីមួយឈ្មោះអេឡិច ចន្ទ្រា បានបង្ហោះព័ត៌មានជាច្រើនថា ថ្នាក់ដឹកនាំខេត្តមានជាប់ពាក់ព័ន្ធនឹងរឿងអាស្រូវពុករលួយ មិនត្រឹមតែប៉ុណ្ណោះ លោកតូច យ៉ុន ស្នងការនគរបាលខេត្តមណ្ឌលគិរី ក៏ត្រូវបានគណនីមួយនេះ បង្ហោះសារច្រើនជាងគេ ដោយបានចោទប្រកាន់លោកថា បានប្រព្រឹត្តឹអំពើពុករលួយជាច្រើនករណី ។
ឆ្លើយតបនឹងការចោទប្រកាន់របស់ម្ចាស់គណនីឈ្មោះអេឡិច ចន្ទ្រា ទំព័រ Facebook ផ្លូវការរបស់ស្នងការដ្ឋាននគរបាលខេត្តមណ្ឌលគិរី បានចេញផ្សាយព័ត៌មានបំភ្លឺកាលពីម៉ោង១រសៀល ថ្ងៃទី២៦ តុលា ២០១៦ ថា«ស្នងការដ្ឋាននគរបាលខេត្តមណ្ឌលគិរីសូមធ្វើការឆ្លើយតបទៅម្ចាស់គណនីហេ្វសប៊ុក ឈ្មោះអេឡិច ចន្ទ្រា (Link=> https://www.facebook.com/profile.php?id=100004689496574 ) ដែលគណនីឈ្មោះនេះបាន Post ព័ត៌មាននៅក្នុងគណនីរបស់ខ្លួនដោយនិយាយថា «វិញ្ញាសារប្រលងមហាស្រួល» ទោះជាវិញ្ញាសារប្រលងមហាស្រួលយ៉ាងណាក៏ដោយ ក៏ប្រលងចូលស្នងការដ្ឋានមណ្ឌលគិរីមិនជាប់ដែរសំខាន់មានលុយអោយជាប់ភ្លាម ពួកនេះស៊ីសំណូកចាប់ពីវាស់កំពស់ឡើងក្នុងការិយាល័យបុគ្គលិកជាដើម ។ អយុត្តិធម៌សំរាប់អ្នកគ្មានលុយ គ្មានខ្សែអយុត្តិធម៌សម្រាប់អ្នកម្ចាស់ស្រុកប្រលងមិនជាប់ អយុត្តិធម៌សម្រាប់កូនជនជាតិ តើនេះគេហៅថាពុករលួយ ឬ ស្អុយរលួយ? តើវាសនាប្រទេសជាតិនឹងទៅជាយ៉ាងណា?»។
សេចក្តីបំភ្លឺបានបន្តថា «ជាងនេះទៅទៀត ស្នងការដ្ឋាននគរបាលខេត្តមណ្ឌលគិរីសង្កេតឃើញថា គណនីហ្វេសប៊ុកខាងលើ បានសរសេរព័ត៌មានបំផុសបំផុលចោទប្រកាន់ ដោយគ្មានមូលដ្ឋានច្បាស់លាស់ ក្នុងការចេញផ្សាយនៅលើបណ្តាញទំនាក់ទំនងសង្គម វាយប្រហារទៅលើថ្នាក់ដឹកនាំជាន់ខ្ពស់ គ្រប់ជាន់ថ្នាក់ក្នុងខេត្ត ។
ដោយឡែក រាល់ពាក្យពេចន៍អត្ថាធិប្បាយទាំងឡាយ ដែលបានសរសេររិះគន់ឡើងទាំងអស់ខាងលើ គឺគ្មានចំណុចណាដែលផ្តោតទៅលើជាការរីះគន់ ដើម្បីស្ថាបនានោះទេ គឺជាការចោទប្រកាន់ដែលផ្ទុយពីការពិត ហើយគណនីហ្វេសប៊ុកមួយនេះ តែងតែយករូបភាព ដែលគ្មានប្រភពច្បាស់លាស់យកមកផុស ដើម្បីអោយសាធារណៈជនមានការយល់ច្រលំ» ។
ស្នងការដ្ឋាននគរបាខេត្តមណ្ឌលគិរីបានបញ្ជាក់ថា ការជ្រើសរើសបេក្ខជន បេក្ខនារី ឱ្យចូលបម្រើក្នុងក្របខណ្ឌកងកម្លាំងនគរបាលជាតិក្រសួងមហាផ្ទៃ គឺធ្វើឡើងទៅតាមលក្ខខណ្ឌ ដែលក្រសួងបានកំណត់ ។ ជំនាញយើងមិនទទួលយកបេក្ខជន បេក្ខនារីរូបណាដែលមិនមានលក្ខណៈសម្បតិ្ត ឬឯកសារគ្រប់គ្រាន់តាមលក្ខខណ្ឌឡើយ ។
ស្នងការដ្ឋាននគរបាលខេត្តមណ្ឌលគិរី ទទួលយកនូវការិះគន់របស់អ្នកដើម្បីស្ថាបនាការងារក្នុងអង្គភាព ប៉ុន្តែស្នងការការដ្ឋានមិនអាចទទួលយកបាននូវការនិយាយខុសពីការពិតនោះទេ ។
ចែករំលែកព័តមាននេះ