រាជធានីភ្នំពេញ ៖ ដោយយល់ឃើញពីសារសំខាន់នៃការអានសៀវភៅ ដែលមានចំណេះដឹងជាច្រើនបង្កប់ក្នុងអត្ថន័យ តារាចម្រៀង សុគន្ធ និសា បានធ្វើទស្សនកិច្ចផ្សព្វផ្សាយពីកម្មវិធីមួយឈ្មោះថា ជ្រុងបណ្ណាល័យនៅមន្ទីរពេទ្យ ដើម្បីគាំទ្រការផ្សាយអំណាន ជាមួយកុមារដែលសម្រាកព្យាបាលនៅមន្ទីរពេទ្យ ។
ការរៀបចំនេះ ធ្វើឡើងកាលពីព្រឹកថ្ងៃទី២៦ តុលា នេះ មន្ទីរពេទ្យកុមារជាតិរាជធានីភ្នំពេញ ។ នេះជាការផ្សព្វផ្សាយការអានជាមួយកុមារ ដែលមានតាំងពីឆ្នាំ២០០៨ ជ្រុងបណ្ណាល័យមន្ទីរពេទ្យ គឺជាគម្រោងរវាងអង្គការស៊ីប៉ា និងអង្គការយូនីសេហ្វ ដែលបានបង្កើតនូវជ្រុងបណ្ណាល័យមួយ សម្រាប់ការអានសៀវភៅរៀន និងកម្សាន្ត ។
នេះជាការចូលរួមកាត់បន្ថយភាពឈឺចាប់របស់អ្នកជំងឺ ក៏ដូចជាផ្តល់នូវភាពរីករាយផងដែរ ។ រហូតមកទល់ពេលនេះ ជ្រុងបណ្ណាល័យមន្ទីរពេទ្យមានចំនួន១៩ កំពុងបើកដំណើរការនៅរាជធានីភ្នំពេញចំនួន២ និង១៧ខេត្តនៅក្នុងប្រទេសកម្ពុជា ។ កញ្ញាសុគន្ធ និសា ដែលបានក្លាយជាទូតសុច្ឆន្ទៈនៃអង្គការស៊ីប៉ា បានថ្លែងថា ថ្ងៃនេះនាងមានទឹកចិត្តរីករាយ ដែលបានសហការជាមួយអង្គការស៊ីប៉ា បានចុះមកកាន់មន្ទីរពេទ្យកុមារជាតិ ធ្វើការផ្សព្វផ្សាយស្តីពីអំណានជូនដល់ប្អូនៗ កុមាររបស់យើង ដែលសម្រាកនៅមន្ទីរពេទ្យ ។
នាងថា ការណ៍ពិតរវាងនាង និងអង្គការស៊ីប៉ា បានផុតអាណ្ណត្តិគ្នាតាំងពីឆ្នាំ២០១៥មក ប៉ុន្តែដោយសារតែនាងមើលឃើញពីសារសំខាន់របស់អង្គការនេះ មានការជួយលើកកម្ពស់វិស័យការអានដល់ប្អូនៗ ក៏ដូចជាប្រជាជនទូទៅ ទើបនាងសុខចិត្តបន្តមាគ៌ានៅជាមួយអង្គការស៊ីប៉ាបន្តទៀត។នាងមិនមានការចុះកុងត្រាអ្វីទាំងអស់ជាមួយអង្គការខាងលើនេះទេតែជាការពេញចិត្តជួយពេញទំហឹង ។
បើសិនជាគាត់មានពេលមានកម្មវិធីណា ហើយាងអាចឆ្លៀតជួយបាន គឺជួយតែម្តង ។ ចំពោះប្អូនៗ កុមារដែលសម្រាកនៅមន្ទីរពេទ្យ នាងបានចុះមកសួរសុខទុក្ខ ហើយនាំពួកគាត់អានសៀវភៅផ្សេងៗ ដែលអាចជួយលើកទឹកចិត្តផ្តល់ចំណេះដឹងហើយមានការលេងល្បែងកម្សាន្តផ្សេងៗ ដើម្បីកុំឲ្យមានការអផ្សុកដេកតែនៅក្នុងបន្ទប់ឬបំបាត់ភាពឈឺចុកចាប់ ។
តារាស្រគត់ស្រគំរូបនេះបន្តទៀតថា នាងពិតជាមានចិត្តចង់ឲ្យកុមារកម្ពុជាយើងស្រឡាញ់ការអាន ព្រោះមើលទៅការអាននេះហាក់នៅមានកម្រិតអត់ទាន់ពេញនិយមប៉ុន្មាននោះទេ ដែលធាតុពិតការអានពិតជាមានសារសំខាន់បំផុត ជួយយើងឲ្យមានអនាគត ។ មិនត្រឹមតែប៉ុណ្ណឹងនោះទេ ក្រៅពីជួយផ្សាយការអានដល់កុមារ ក៏ធ្លាប់ចុះតាមរោងចក្រកាត់ដេរ ព្រមទាំងនៅតាមបណ្តាភូមិស្រុកមួយចំនួនទៀត ដោយនាងបានធ្វើការនេះ បានយ៉ាងពេញចិត្តលើវិស័យដ៏ល្អនេះ ។
ចែករំលែកព័តមាននេះ