យោងតាម អ.ស.បថា មនុស្សជាច្រើនសិបនាក់ក្នុងនោះមានប៉ូលិស៥០នាក់ ត្រូវពួកជីហាដក្រុមរដ្ឋអ៊ិស្លាមប្រហារជីវិត ខណៈកងទ័ពអីុរ៉ាក់វាយលុកចូលកាន់តែកៀកក្រុងម៉ូសស៊ុល ។
ការអះអាងនោះដែលស្ថិតក្នុងដំណាក់កាលដំបូងនៅឡើយអាចមកពីប្រភពជនស៊ីវិល និងរដ្ឋាភិបាលដែលពុំអាចលាតត្រដាងច្បាស់ដោយសារបញ្ហាសន្តិសុខ ។ នេះជាការលើកឡើងរបស់លោក RUPERT COLVILLE អ្នកនាំពាក្យនៃស្នងការជាន់ខ្ពស់ អ.ស.ប ខាងសិទ្ធិមនុស្សក្នុងសន្និសីទសារព័ត៌មានមួយនាទីក្រុងហ្សឺណែវ ។ លោកបញ្ជាក់ថា អំពើសាហាវព្រៃផ្សៃទាំងនោះរបស់ពួករដ្ឋអ៊ិស្លាមប្រព្រឹត្តរវាងថ្ងៃទី១៩ មក២៣ តុលា ខណៈកងទ័ពអីុរ៉ាក់កំពុងរុលឆ្ពោះមកកាន់ក្រុងម៉ូសស៊ុលជាទីតាំងធំចុងក្រោយរបស់ពួកជីហាដនៅអីុរ៉ាក់ ។
យោងតាម អ.ស.បថា នៅភូមិSAFINA ស្ថិតនៅចម្ងាយប្រមាណជា៤៥គ.ម ខាងត្បូងក្រុងម៉ូសស៊ុល ពួករដ្ឋអ៊ិស្លាមសម្លាប់ជនស៊ីវិល១៥នាក់ មុនពេលទម្លាក់សាកសពពួកគេទៅក្នុងស្ទឹងមួយប្រហែលជាដើម្បីបំភ័យអ្នកភូមិឯទៀតៗកុំឱ្យរត់ទៅណា ។
យោងតាមព័ត៌មានមួយចំនួនថា កាលពីថ្ងៃទី១៩ តុលានៅភូមិ SAFINA ដែរ ពួកជីហាដបានចងជនស៊ីវិល៦នាក់ភ្ជាប់ពីក្រោយរថយន្តមួយគ្រឿងដែលទាញអូសពួកគេជុំវិញភូមិក៏ព្រោះតែពួកគេស្ថិតក្នុងកុលសម្ព័ន្ធមួយដែលប្រមុខរបស់កុលសម្ព័ន្ធនោះជាអ្នកប្រឆាំងក្រុមរដ្ឋអ៊ិស្លាម ។
ម្យ៉ាងវិញទៀត កងកម្លាំងសន្តិសុខអីុរ៉ាក់រកឃើញសាកសពមនុស្ស៧០នាក់ដែលមានស្នាមគ្រាប់កាំភ្លើងកាលពីថ្ងៃទី២០ តុលា នៅភូមិ TOULOUL NASER ។ រួចនាថ្ងៃទី២២ តុលា មនុស្សរបស់ក្រុមអ៊ិស្លាមប្រហែលជាអ្នកសម្លាប់នារី៣នាក់និងក្មេងស្រី៣នាក់នៅភូមិ ROUFEILA ភាគខាងត្បូងក្រុងម៉ូសស៊ុល ។
ដោយឡែកយោងតាមអគ្គសេនាធិការកងទ័ពរុស្ស៊ីថា យន្តហោះចម្បាំងអាមេរិក១គ្រឿងបានវាយប្រហារសាលាសម្រាប់នារីមួយនៅភាគខាងត្បូងក្រុងម៉ូសស៊ុលកាលពីថ្ងៃទី២១ តុលា ។ កងយន្តហោះក្រុមចម្រុះនាំមុខដោយសហរដ្ឋអាមេរិកក៏ទម្លាក់គ្រាប់បែកលើបណ្តាសង្កាត់មានមនុស្សរស់នៅច្រើន បណ្តាសាលារៀនព្រមទាំងហេដ្ឋារចនាសម្ព័ន្ធស៊ីវិលឯទៀតៗទាំងនៅក្រុងម៉ូសស៊ុលទាំងនៅក្នុងខេត្តនីនីវ ហើយក្នុងរយៈពេលតែ៣ថ្ងៃចុងក្រោយនេះបណ្តាលឱ្យជនស៊ីវិលស្លាប់ជាង៦០នាក់និងរបួសជាង២០០នាក់ ៕
ចែករំលែកព័តមាននេះ