រាជធានីភ្នំពេញ ៖ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន បានមានប្រសាសន៍ថា ដំណាំល៉្មើកំពុងមានការពេញនិយមនៅលើទីផ្សារពិភពលោក ក៏ដូចជាទីផ្សារនៅក្នុងតំបន់អាស៊ី ។ ការលើកឡើងនេះធ្វើឡើងក្នុងពិធីចុះអនុស្សរណៈរវាងក្រុមហ៊ុន៣គឺ ក្រុមហ៊ុនខេងឡាយ ខូអិលធីឌី នៃព្រះរាជាណាចក្រកម្ពុជា ក្រុមហ៊ុន Daily Green (Daily Green(2507) Co., Ltd នៃព្រះរាជាណាចក្រថៃ និងក្រុមហ៊ុន A.T.C. Supply (1993) Co., Ltd នៃប្រទេសអីុស្រាអែល នាព្រឹកថ្ងៃទី២៤ តុលា នៅសណ្ឋាគារភ្នំពេញ ។
លោករដ្ឋមន្ត្រីបន្តថា ក្រសួងកសិកម្ម រុក្ខាប្រមាញ់ និងនេសាទ និងរាជរដ្ឋាភិបាលកម្ពុជាបានកំណត់យកវិស័យឯកជន គឺជាក្បាលរថភ្លើងក្នុងការជួយជំរុញសេដ្ឋកិច្ចកម្ពុជាមិនអាចខ្វះបាន ជាពិសេស ផ្តល់ក្តីសង្ឃឹម និងជួយលើកស្ទួយជីវភាពរបស់កសិករខ្មែរ និងជួយដឹកនាំកសិផលទៅដល់ទីផ្សារក្នុងស្រុក និងអន្តរជាតិ ។
លោកបន្ថែមថា ល្ម៉ើ ជាដំណាំមួយប្រភេទដែលក្រសួងពិនិត្យឃើញថា មានសារសំខាន់ និងមានប្រាក់ចំណូលខ្ពស់សម្រាប់កសិករខ្មែរ ។ ប៉ុន្តែអ្វីដែលសំខាន់នោះ ត្រូវតែមានការគិតគូរពីរយៈពេលនៃការដាំដុះ ព្រោះថា រយៈពេលដែលទទួលផល គឺចាប់ពី៣ឆ្នាំឡើងទៅ ។ លោក ថា ៖ « បើមានរយៈពេលយូរក្នុងការទទួលផលនោះ កសិករគួរសិក្សាពីការដំណាំបឋមនៅក្នុងដំណាំលេ្មុីដូចកៅស៊ូ ដើម្បីទទួលផលបានខ្លះដូចជា សណ្តែក និងដំឡូងជាដើម » ។
លោករដ្ឋមន្ត្រីបញ្ជាក់ថា កសិករខ្មែរកំពុងចាប់ផ្តើមដាំដំណាំល្ម៉ើនេះ ដូច្នេះ សូមស្នើទៅក្រុមហ៊ុនត្រូវពិនិត្យ និងផ្តល់បច្ចេកទេសនៃការដាំដុះ ការថែទាំ ការប្រមូលផល និងវេចខ្ចប់ប្រកបដោយគុណភាពនិងអនាម័យ ដែលបច្ចុប្បន្ននេះ អ្វីៗត្រូវគិតពីផលិតផលស្បៀងជាសំខាន់ ។ ផ្ទុយទៅវិញ ប្រសិនបើយើងមិនបានគិតគូរពីគុណភាព និងអនាម័យនោះ ផលិតផលរបស់យើងគ្មានតម្លៃឡើយ ។ លោកបញ្ជាក់ថា ៖ « ការចុះអនុស្សរណៈរបស់ក្រុមហ៊ុនចំនួន៣នេះ គឺបង្ហាញពីការសន្យារបស់ក្រុមហ៊ុនក្នុងការទិញផលិតផលពីប្រជាជន ព្រោះថា នៅពេលចាប់ផ្តើមដាំដុះ ក្រុមហ៊ុននីមួយៗត្រូវចុះសន្យា ហើយក្រសួងកសិកម្មនឹងតាមដានពិនិត្យនូវកិច្ចសន្យានេះតាមអ្វីដែលក្រសួងរៀបចំជាគោលនយោបាយ » ។
លោករដ្ឋមន្ត្រីមានប្រសាសន៍ទៀតថា ៖ «ប្រជាពលរដ្ឋចង់ដាំដំណាំល្ម៉ើ ត្រូវទាក់ទងជាមួយក្រុមហ៊ុន ចំណែកក្រសួងកសិកម្មគ្រាន់តែត្រួតពិនិត្យតាមដានថា ការចុះកិច្ចសន្យាបានត្រឹមត្រូវឬអត់ ហើយផលិតផលនេះប្រាកដជាបានផលយ៉ាងណានៅពេលខាងមុខ ។ ដំណាំល្ម៉ើនេះជាការចូលរួមចំណែកមួយយ៉ាងធំធេង គឺ ១-ការប្រើប្រាស់ទឹកនៅកម្ពុជា ក្នុងការដាំដំណាំផ្សេងៗមានការកាត់បន្ថយ ២-កាត់បន្ថយការធ្វើចំណាកស្រុក និង៣-កាត់បន្ថយភាពក្រីក្រនៅកម្ពុជា » ។
លោក ខេង ច័ន្ថា អគ្គនាយកក្រុមហ៊ុន ខេងឡាយ ខូអិលធីឌី បានមានប្រសាសន៍ក្នុងពិធីចុះអនុស្សរណៈថា ក្រុមហ៊ុនលោកបានអភិវឌ្ឍន៍ដំណាំល្ម៉ើនៅក្នុងប្រទេសកម្ពុជា ដែលបច្ចុប្បន្ននេះ មានការិយាល័យ និងកសិដ្ឋានល្ម៉ើ២កន្លែងគឺ ១-នៅផ្លូវលេខ១០១១ ភូមិពោងពាយ សង្កាត់ភ្នំពេញថ្មី ខណ្ឌសែនសុខ ដោយមានតាំងកូនពូជល្ម៉ើគ្រប់ប្រភេទ ផ្ទាំងរូបភាព និងស្លាយបង្ហាញពីការអភិវឌ្ឍដំណាំល្ម៉ើ ព្រមទាំងមានតាំងលក់ផលិតផលធ្វើពីល្ម៉ើជាច្រើនប្រភេទផងដែរ ។ ២-ស្ថិតនៅក្នុងភូមិគោល ឃុំទួលព្រេច ស្រុកអង្គស្នួល ខេត្តកណ្តាល មានទំហំដីជិត១០ហិកតា ដែលមានចម្ការល្ម៉ើដាំរួចរយៈពេល១០ខែចំនួន៧ហិកតា និងពូជកូនល្ម៉ើដឹកមកពីប្រទេសថៃ មានអាយុចាប់ពី១ឆ្នាំដល់២ឆ្នាំ ចំនួន៥ម៉ឺនកូន ។
គួរបញ្ជាក់ថា ដំណាំល្ម៉ើចាប់ផ្តើមទទួលផលក្នុងរយៈពេល៣ឆ្នាំ ចាប់ពី៤០ទៅ១០០គីឡូក្រាមក្នុង១ដើម ហើយក្នុងរយៈពេល១០ឆ្នាំ អាចទទួលផលបាន៥០គីឡូក្រាមក្នុង១ដើម ៕
ចែករំលែកព័តមាននេះ